Read Poumei Naga EZEKIEL 33 Bible Online

EZEKIEL 33 - Poumei Naga bible

EZEKIEL 33

¹MAPAO nou ahi haibüa paoe,

²“Thai-a bailaiyu mainare, teidei ali hi Enou soureih seive peiyu phaki dai vepawe touyu khesü paopeio. Teidei sühinou hrüyu maitao nou mai ali hai panou reihkhao soure donou dopalouwe.

³Puhnou ngaobamai laiyu zhingao louzü, ngaobamai laire touyu sü maikhe mai hi paopi peiwe.

⁴Hakinou mai ali nou paopi peiyu hai süa buyuma puhnou le peimoa buyu hinou ngaobamai nou tave puhye southa louzü, puhnou thaiyu hai lah puhvei mah baie.

⁵Puhnou thaiyu hai lah puhvei mah donou baie, daiolouzü puhnou paopi peiyu nasü le peimore. Hakinou puhnou paopi peiyu nahai le peilouzü puh sü turei paloua bailai.

⁶Hakinou reihkhaoyu mai nanou ngaobamai hai laiyu zhingao-a buyuma puhnou paopi peilou moa ngaobamai nou tave mah soua buyu maitao hai southare toulouzü, puletao nou thaiyu vei mah hai reihkhaoyu maina pei hi koulai.

⁷“Chuo, thai-a bailaiyu mainare, Enou neye Israel maitao vei reihkhaoyu maina soupeiwure. Enou ne hi paopeiyu khesü nenou puletao hi paopi peilai.

⁸Hakinou Enou mai ashi mai aliye thailaire tea paosüpa peiyu thai, nenou puhye paopi pei moa puhye panou ledalou moa mah souyu hinou thaitare toulouzü, puhnou thaiyu vei mah nasü ne pei hi koulai.

⁹Hakinou nenou mai ashi maina hi nenou paopi peiyuma puhnou züba-a vah ashi souyu nasü baimoa puh hai mah mai ali soua thaire toulouzü, nevei hrirai nasü khailupa peilai.”

¹⁰MAPAO nou ahi haibüa paoe, “Thai-a bailaiyu mainare, Israel maitao nou haibüa paoyu nasü puletao hi paopu peio: Etao nou mahmo soukhai touyu ae kaozü moyu vah souyu donou Etao hai veahore. Südonou Etao hai shitare, kabüa Etao sü hriloulai?

¹¹Cheche vujünou Ramai MAPAO E hai hriyu Ramai thaifüa mah mai ali nou thaiyu sü ngaoloua E hai lesa moe tea puletao hi paopeio. Ewo louzü puhnou mah souyu bailoua hrilouyu nasü nou jüpapu hie. Südonou Oh Israel maitaore, vah ashi souyu sü thaowu-o. Neletao daisounou thainüwe?

¹²“Chuo thai-a bailaiyu mainare, mai aveih mai alinou mah souta louzü, puhnou vah aveih soukhai touyu taonou puhye khailupa peilou hoe tea Israel maitao hi paopeio. Hakinou mai shimai ali nou vah ashi khesü soumore toulouzü puhye sü tudee peilai moe ae hakinou mai aveih mai ali nou vah ashi mahmo sü soutare toulouzü, puhvei hrirai hai khailupa peilai moe.

¹³Enou mai aveih mai ali hi puhye ahri nasü peilai tea chaachou soukhai touyuma, puhnou raichoki vah aveih soukhai touyu khesü khare tea tsücho loua vah ashi ae mah souta louzü puhnou vah aveih soukhai touyu khesü Enou licho peilai moe. Puh hai lah puhvei mah donou thai-a bailai

¹⁴Enou mai ashi mai aliye thailaire tea paoyuma, puhnou mah souyu khesü bai-a vah aveih ae kaozü vah khesü soutare toulouzü,

¹⁵süolouzü hakinou poupao louyu mainanou puh hi na bandha khaitouyu nasü puhnou lukhai peire toulouzü, moa puhnou vaolouyu na khesü lukhai peilouzü, hakinou puhnou mah souyu hai bailoua hriloure vei chikha nasü thaifü loure toulouzü puh sü thailai moe ana hriloua bailai.

¹⁶Enou puhvei mahmo khesü khaipeilai ae puh hai hri loulai, daiolouzü puhnou kaozüyu vah ae vah aveih sü soutare.

¹⁷“Ae nevei maitao hai Enou souyu nasü kaomoe tea nou paowe! Moe, puletao vei ludu sünou kaomo vanou baie.

¹⁸Achecheyu mai ali nou vah aveih nasü soumoa vah ashi souta louzü, puhnou süvanou thailai.

¹⁹Mai ashimai ali nou mahmo souyu nasü thaokhaiwua kaozüyu vah, veiyu vah soutare toulouzü, puhvei hrirai hai khailupa loulai.

²⁰Ana Israel maitaore, Enou souyu hai nasü kaomoe tea neletao nou paore. Neletao nou souyu vah thaifüa Enou neletaoye sü chikulai.”

²¹Etaoye nüpoa tayu po kiahai khouh kirou vei khoukha angou zhou hai Jerusalem hinou mai ali hai turei paloua nuhdu nasü kaodu tare tea ahi ve paoe.

²²Mai süna vemozü khei-zhou hai, MAPAO vei dushoyu khouko hai ahi ve-e. Thainesho shona hai mai sünanou ahi veyu phaki, MAPAO nou Eye raolou süyu khouko hai peidakhai peie.

²³MAPAO nou ahi paoe,

²⁴“Thai-a bailaiyu mainare, Israel maivei teidei, soushi khaitoua buyu nuhdu hinou hrüa buyu maitao nou haibüa paoe: Abraham hai mai ali kheibaie ae puhye teidei veishi nou peie. Etao hai mai taoli bue. Südonou chuo teidei sü Etao vei soulaire.

²⁵“Ramai MAPAO Enou puletao hisü haibüa nou paowe tea paopeio: Teidei sühisü chua neletao nou sou hai souzhe koa nou tou bue. Neletao nou bashara khesü tho-a nou bue. Neletao nou maiye southa datha-a nou bue. Kabüa neletao hai teidei sünasü neletao vei soulai tea tsüchowe?

²⁶Neletao hai neletao vei khoche nou louchewe, ngaorayu vah khaikho nou soua bubaie ae mai hrülai nou khulou hai soure, kabüa neletao nou teidei sü thaolou laige?

²⁷“Hria buyu Ramai MAPAO Enou soushi khaitouyu nuhdu hinou hrüa buyu maitao hai southalai tea paowe tea puletao hi paopi peio.Teidei sühi hrüa buyu maitao hai panou rekhaona nou touloua bailai. Deichi vanou ae lyaqulu hinou tutsüa buyu maitao hai sounou ashi hinou thai-a bailai.

²⁸Puletao vei teidei sü Enou soushiwua panou pata-a bailai ae puletao nou khaophu soua buyu khouko nasü panou akhai soua bailai. Israel maivei deichi khesü Enou pa ngaopi shoyu soupeilai, sübüa panou mailia tasühao bulai moe.

²⁹Maikhe maitao nou mah souyu donou puletaoye Enou tudeeyu phaki ae puletao vei teidei soushi peiyu thai, puletao nou E hai MAPAO-e touyu sü süloulai.”

³⁰MAPAO nou haibüa nou paoe, “Thai-a bailaiyu mainare, nevei maitao nou nuhdu vei kivo hinou tave jüyu phaki moa kijü nou tave jüyu phaki puletao nou nevei ko sü phakuwe. Puletao hai mai alinou ali hi haibüa paoe, MAPAO nou zhou daichi paolaisa taho kei laishe.

³¹Sübüa avei maitao nou tave meime souloua nenou puletao hi paoyu chi khesü keiwe, ana puletao hai nenou paoyu chipao khesü thaifüa hrümoe. Puletao vei müli hiolouzü chipao lako aveih lih nou pao-a nou bue, ana puletao hai dutounüa vah haso ashi soukoute-a bubaie.

³²Ne sü puletaoye donou lou rao veisho-a lesha lou souyu ae kei veishoyu gaigou da-a lou souyu mai ali büa baie. Puletao nou nevei chipao khesü keinou louwe, ana chipao ali koute-a puletao nou zülai moe.

³³Ana nevei chipao teitei hai cheche-a vepapei louzü, rachipaola peiyu mai ali hai puletaoye koa nou bue touyu sü puletao nou süloulai.”