Read Poumei Naga EZEKIEL 34 Bible Online

EZEKIEL 34 - Poumei Naga bible

EZEKIEL 34

¹MAPAO nou ahi haibüa nou paoe,

²“Thaire maipu nare, Israel maiye süthai peiyu maitao hai Ramai nou aetou more tea paopeio. Ramai MAPAO Enou puletao hi haibüa pao-a nou bure tea paopeio. Israel maivei zhaokhao maitao, neletao hai daizhou koute vealaisa! Neletao hai lahye kikoloua nou zhaotu khesü zhupei more.

³Neletao nou chonaodzü sü kewe, soumaisah nou banaowe, ae zhaotu veikayu tyanou datouwe, ana neletao zhaotu khesü kikopei moe.

⁴Neletao nou lülou hoyu taoye soukha peimoe, sounou souyu taoye sü souvei peimoe, zhizhu louyu taoye sü zhimü hai phupei moe, motayu taoye sü sa-a dakhai ve peimoe, moa hatayu taoye sü phouta moe, neletao sütao soupeiyu thaosü, neletao nou zhaipou shisho-a puletaoye sü khopeie.

⁵Zhaotu khesü zhaokhowo hayu donou puletao hai raroupoa tare ae rekhaona nou puletaoye southaloua touloure.

⁶Südonou avei zhaotu khesü deichi kuyu ae deitao veishi hi raroupoa tare. Puletao hai deiphao teitei hi rarou tare ae mai linoua puletaoye sü phouta more ae zhupei more.

⁷“Chuo zhaokho maitaore, Ramai MAPAO Enou neletao hi paoyu avei chipao sü keilo.

⁸E hai cheche vuzünou hriyu Ramai thaifüa neletao hai avei chipao keilouyu nou veipulai hie. Avei zhaotu khesü zhaokhowo hayu donou puletao sü rekhaonatao nou southaloua touloure. Avei zhaokho maitao nou puletaoye phoure hai romore. Puletao hai lahye donou likhei choloua zhaotu khesü kiko peimore.

⁹Südonou zhaokho maitaore, Enou paoyu sü keilo.

¹⁰Ramai MAPAO Enou neletao hai avei ngaobamaire tea Enou paosü pawe. Enou avei zhaotu khesü neletao hinou povai laiwulai, ae neletaoye panou puletao vei zhaokhomai sü soupukhai toulai more, ae Enou neletao-a panou lah neletaoye kiko loulai moe. Enou avei zhaotu khesü neletao hinou vupa loulai ae puletaoye sü panou toupulai more.

¹¹“Ramai MAPAO Enou neletao hisü paowe, süolouzü E lah avei zhaotu khesü phouloulai ae puletaoye sü kiko loulai,

¹²zhaokho mai ali nou puhvei zhaotu rarou-a buyu khesü save jüloua kiko peiyu bütoua Enou souloulai. Puletao nou teimai teizhi buh hinou ae kaozhou ashi buh hinou raroupoa tayu khesü Enou pove jüloulai.

¹³Enou puletaoye sü vakou maivei teidei hinou sapa loulai, puletaoye save jüpeilai, ae puletaoye lah puletao vei teidei hi save khaipeilai. Enou puletaoye süthaisa-a Israel maivei deichitao ae reitou tao hi save peilai ae puletaoye veisho-a buyu hiphao hinou kiko peilai.

¹⁴Enou puletaoye panou kaozhou vei-a Israel maivei deichitao hinou ae deikhotao hinou alia poudai veisho-a buyu hiphao hinou pa pou hai phoutoulai.

¹⁵Enou lah avei zhaotu khesü kholoulai ae puletaoye panou busore buh sü Enou phoupeilai. Haisü Ramai MAPAO Enou paowe.

¹⁶“Hatayu khesü Enou phouloulai, motayu khesü Enou sa-a dakhaive loulai, zhizhu khaitouyu zhimü khesü Enou phupeilai, sounou souyu khesü Enou souvei peilai; ana hübo veiyutao ae khouchi vei-a buyu khesü Enou souhawulai, daiolouzü E hai kaozü ae acheche souyu zhaokhowo nasüe.

¹⁷“Südonou chuo avei zhaotu taore, Ramai MAPAO Enou neletaoye sü chiku laire ae aveih maitao hai mai ashitao hinou pokupa khaiwulai ae zhaotutao hai nghitu hinou pokupa khaiwulai.

¹⁸Neletao kamai-a poudai aveih khesü toulouyu hai-a rukha moa toushoyu khesü phi nou deisasa peiwe! Neletao nou dzü leireiyu sü kelouyu thai, dzü sü soukü peiwe!

¹⁹Avei zhaotu kukhetao sü nenou phi nou deisasayu khesü toulai ae nenou dzü souküyu sünou kelai.

²⁰“Südonou chuo Ramai MAPAO Enou paowe, süolouzü Enou zhaotu khouko buyutao ae lülou hoyu zhaotutao kohisü chikulai.

²¹Neletao nou lülou hoyu ae sounou souyu zhaotutao sü zhaokhome hinou vakou boupalai peiwe.

²²Ana Enou avei zhaotu khesü vupa peilai ae puletaoye sü panou souchoro peipulai moe. Enou avei zhaotu khesü alili nou chikulai ae aveih tao hai ashi tao hinou pokupa peilai.

²³Enou avei kilai David veo büyu vemai ali hai puletao hi peilai ae puhnou puletaoye sü kaozü hinou kiko peilai.

²⁴MAPAO Enou puletao vei Ramai soulai, ae avei kilai David veo büyu vemai ali nou puletaoye khasa-a nou hrülai. Haisü Enou paowe.

²⁵Enou puletaoye panou kaozhou ashi daokhai toulai moe touyu vei vo ali puletaoye koa soupeilai. Enou teidei hi rekhaona ashi buyu teitei sü hulai peilai, sübüa panou avei zhaotu khesü kaozhou vei-a dou hinou hrülai ae vaohro hinou pa züzhilai.

²⁶“Enou puletaoye sü shiha peilai ae puletaoye panou sheeyu avei deichi nasü sühaopoa nou hrülai. Sühisü Enou ha peilai ae puletao nou jüpa-a buyu teile hisü Enou teirü hai panou rükou peilai.

²⁷Süübe khesü panou rashithou shipeilai ae dou khesü panou veisho-a chamou hai papeilai alia puletao vei teidei hisü panou kaozhou ashi aliro daomoa vaphi tea nou pa hrüloulai. Enou avei maitaoye phupfüa buyu hurai nasü phapeiyu thai ae puletaoye qila panou soua buyu maitao hinou panou lahdo soulouyu thai, puletao nou E hai MAPAO-e touyu sü süloulai.

²⁸Tyahrü kukhe mainou puletao vei na khesü soushipulai moe, moa rekhaonatao nou puletaoye southalou-a toupulai moe. Puletao hai kaozhou vei-a hrüloulai ae mailinoua puletaoye sü soupipulai moe.

²⁹Enou puletao vei teidei sü panou chamou hai veisho-a papeilai ae teidei hisü panou khüzüyu hai bupulai more. Tyahrü kukhe maitaoye panou puletaoye ngaophou moyu sü soupulai moe.

³⁰Enou Israel maiye vupeiwe ae puletao hai avei maitao-e touyu hai mai hrülai nou süloulai. Haisü Ramai MAPAO Enou paowe.

³¹“Neletao hai avei zhaotu-e Enou kikoyu avei zhaotutao-e ae E hai neletao vei Ramai-e,” tea Ramai MAPAO nou paoe.