Read Poumei Naga EZEKIEL 35 Bible Online

EZEKIEL 35 - Poumei Naga bible

EZEKIEL 35

¹MAPAO nou ahi haibüa paoe,

²“Thai-a bailaiyu mainare, Edom maivei tyahrü sü Enou aetou more tea paopeio.

³Maikhe maitao hisü Ramai MAPAO Enou haibüa pao-a nou bure tea paopeio: Edom maivei deichitaore, Enou neletaoye ngaobayu nasü souta laire! Enou neye soushiwua souha khaiwulai.

⁴Enou neletao vei nuhdu khesü soushilai, ae neletao vei teidei sü soupa rarou khaiwulai; süthaisü neletao nou E hai MAPAO-e touyu sü süloulai.

⁵“Nenou Israel maiye raichoki nou zhou koute hai hraikoute-a baie, ae puletao nou veahoyu phaki ae puletaoye akhai sou-a tudee peiyu phaki nenou puletaoye sü southa peie.

⁶Südonou chuo Ramai MAPAO E hai cheche vuzünou hriyu Ramai thaifüa athai nasü neletao vei soulai ae neletao mailia tureipa louhoe. Neletao hai maiye southa mahre, ae southa dathayu nasü neletaoye thaifüa talai.

⁷Enou Edom maivei deichi khesü soushi souhalai ae sühinou veihao soua tayu mai hrülaiye sü southawulai.

⁸Enou deichitao hisü thaiphao nou poa raopeilai ae soureih hinou thaiyu maitao vei thaiphao sünou deichi hi ae deikho hisü poa raokhai peilai.

⁹Enou neye sü teisa donou soushi khaiwulai, ae mailia panou nevei nuhdutao hisü hrüpulai moe. Süthaisü neletao nou E hai MAPAO-e touyu süloulai.

¹⁰“Neletao nou tyahrü ahai vei teidei, Judah ae Israel maivei teidei hai neletao vei souloulai ae thaoloulai tea paore. Enou puhai vei Ramai MAPAO-e.

¹¹Südonou chuo Ramai MAPAO E hai hriyu Ramai thaifüa neletao nou lekha payu, maiye ngaoraiyu donou ae avei maitaoye ngaorayu donou Enou paoh khapeilai. Neletao nou puletao hi soupeiyu thaifüa Enou neletaoye tudee peiyu hai puletao nou süloulai.

¹²Süthaisü neletao nou Israel maivei deichitao hai paoshi-a puletao vei deichi khesü soushire ae chuo neletao vei soulou laire tea paoyu MAPAO Enou süloure touyu hai neletao nou süloulai.

¹³Neletao nou chipao lako ashi khenou khaophu soua Eye paoshiyu sü Enou chouloure.”

¹⁴Ramai MAPAO nou paoe, “Enou neye soushi souhakhai toupeilai, ae ne sü kaodu tare touyu ko hai deiphao mai hrülai nou süloua asasholai,

¹⁵nenou avei maitao, Israel maiye soushi peiyu phaki asa shoyu büa puletao-a asalai. Seir vei deichitao, Edom maivei teidei veishi hai soushi souhawulai. Süthaisü mai hrülai nou E hai MAPAO-e touyu süloulai.”