Read Poumei Naga EZEKIEL 36 Bible Online

EZEKIEL 36 - Poumei Naga bible

EZEKIEL 36

¹MAPAO nou paoe, “Thai-a bailaiyu mainare, Israel maivei deichitao hi Ramai MAPAO Enou paoyu avei chipao hai keilo tea paopeio. Israel maiye ngaobayu maitao nou lesasho-a ne vanou haibüa paoe, ‘Chuo daohdao nou buyu deichi khesü Etao vei soulaire!’

³“Südonou Ramai MAPAO Enou paoyu khesü rachipaola peio. Kinapa soua buyu tyahrütao nou Israel maivei deichi khesü poloure ae soushiwure ae puletao nou Israel maiye sü ngaophou moa paoshire.

⁴Südonou chuo Ramai MAPAO Enou Israel maivei deichi deiraotao, deikhotao, soushi khaitoua thaowua tayu buhtao, ae soushi khaitouyu pehao hinou hrüyu tyahrütao nou konüa buyu nuhdutao hi paoyu avei chipao khesü keinoulo.

⁵“Südonou Ramai MAPAO Enou avei lekha rarou hinou pehao hinou buyu tyahrütao, matsüsoua Edom mai pei hisü hraitalai. Puletao nou asah soua ngaoraiyu hinou avei teidei hai lah puletao vei souloure donou poloure.

⁶“Südonou Israel maivei teidei hi rachipaola peio; deichi deiraotao ae deikhotao hisü Ramai MAPAO Enou avei ngaoraiyu rarou lekha hinou tyahrütao pei hi aetoulai moe tea paopeio, daiolouzü puletao nou neye ngaophou moa soutai sounou peie.

⁷Ramai MAPAO Enou chaachou soua paowe, süolouzü pehao hinou buyu tyahrütao hai hraongu soupei vuzülai.

⁸Ana Israel maivei deichitao hisü süübe khesü sünghou lapaloulai ae rashithou hai avei Israel maitao donou shipeilai. Neletao hai thasho-a nou ki hisü dakhai veloulai.

⁹Enou neletaoye kozho peilai ae cheche vuzünou neletao vei teidei hisü panou daotou pulai ae taimou hai thoupu loulai.

¹⁰Enou neletaoye sü soupoupa peilai, neletaoye panou nuhdutao hisü hrülai ae soushikhai touyu buh veishi sü panou soushupu paloulai.

¹¹Enou maikhe mai-a ae kikhaorüa tyakayu sü peilai. Neletao hai raichoki jünou pousholai, ae neletao hai nahmai alao hrülai. Neletao nou raichoki hrüyu bütoua panou sühisü hrülai ae raichoki jünou pua Enou neletaoye sü savayu hai peilai. Süthaisü neletao nou E hai MAPAO-e touyu süloulai.

¹²Avei Israel maitaore, Enou neletaoye sü lah neletao vei teidei hisü sa-a dakhai ve panou hrüpu loulai ae neletao vei nahmaiye panou houzüpu khaitoulai moe.

¹³“Ramai MAPAO Enou paoe, maikhe mainou teidei haina hai maiye nütouyu teidei-e ae tyahrü haina sü lah vei nahmai vei shaotou shaosoyu tyahrüe tea paoyu sü cheche-e.

¹⁴Ana chu thainou teidei hainasü maiye nütouyu ae lah nahmai vei shaotou shaosoyu tyahrü alie tea panou paopulai more. Haisü Ramai MAPAO Enou paowe.

¹⁵Teidei hainasü tyahrü kukhe mainou konüyu moa ngaophou moa paoshiyu haisü panou choupu ngaopulai more. Teidei hainasü lah nahmai vei shaotou shaosoyu tyahrü ali hai panou soupulai more. Haisü Ramai MAPAO Enou paowe.”

¹⁶MAPAO nou ahi haibüa paoe,

¹⁷“Thai-a bailaiyu mainare, Israel maitao nou teidei hai hi hrüa buyu phaki, puletao nou hrüyu hrü ae vah haso soupfüyu khenou teidei hainasü puletao nou souzhaiwure. Puletao vei zhaidou ae hümamai hai naotumai ali nou khoukhou hi zhe ta-a naanou hinou sheemoa buyu ali bütoua Enou ngaoloure.

¹⁸Südonou puletao hisü avei lekha rarou hai panou vere, daiolouzü puletao nou teidei hai hinou maiye southa dathare ae puletao nou bashara khesü thotayu donou teidei hainasü souzhai khaiwure.

¹⁹Puletao nou hrüyu zhaidou ae soupfüa buyu vah haso khesü Enou jüpa more, südonou Enou puletaoye sü vakou maivei tyahrütao hi hupho rarou laiwure.

²⁰Puletao nou tayu veishi hisü puletao nou avei sheeyu zhih sü souzhai peia bai-e, daiolouzü maikhe mainou haibüa paoe, ‘Mai haitao hai MAPAO vei maitao-e ana puletao nou puhvei teidei sü thaokhaiwua tare’.

²¹Israel maitao nou tayu buh veishi hisü puletao nou avei sheeyu zhih hai souzhai peire, südonou avei sheeyu zhih donou Enou puletaoye sü licho loure.

²²“Südonou chuo Israel maitao hisü Ramai MAPAO Enou haibüa paowe tea paopeio. Enou soupfü laiyu hai nasü Israel maiye donou moe, ana neletao nou tayu buh veishi hi souzhai peiyu avei sheeyu zhih donou soua bailai.

²³Enou tyahrütao hi neletao nou souzhaiyu avei sheeyu zhih aduso nasü soungao peiyu phaki, puletao nou E hai MAPAO-e touyu sü süloulai. Enou tyahrütao hi E hai sheewe touyu sü neletao hinou soungao peilai.

²⁴Enou neletaoye sü tyahrü teitei hinou ae tyadei veishi hinou lah neletao vei teidei hisü sa-a dakhaive peilai.

²⁵Enou neletaoye sü sheeyu dzü nou poa kasho peilai ae neletaoye basharatao nou alia na kukhe nou souzhai khaitouyu khesü soushee peilai.

²⁶Enou neletaoye lüthou ashu ae tsüle ashu hai peilai. Neletao vei lüthou, chuh büa khousho-a nou rochiyu nasü Enou popha peilai, ae maichi züyu lüthou sünou thoupeilai.

²⁷Enou avei rako sü neletao hi thoupeilai, ae neletaoye panou avei chikhatao hinou talai ae avei kharochi khesü neletaoye panou soutaosou züa nou hrüloulai.

²⁸Süthaisü Enou neletao vei puopao hi peikhai touyu teidei hinou neletao hai hrülai. Neletao hai avei mai soulai ae Enou neletao vei Ramai sü soulai.

²⁹Neletaoye soushi souzhai peiyu teitei hinou Enou neletaoye vupa peilai. Enou taimoutao hisü veisho-a shishipeio tea kharochi peilai, ae tokaayu sü ngaopulai moe.

³⁰Enou neletao vei rashibe ae dou hi thoudzü hai panou veishoa papeilai, sübüa neletaoye panou touha sohayu vanou tyahrütaoye panou ngaophou moyu sü soupulai moe.

³¹Neletao nou vah ashi souyu ae kaozü moyu vah soukhai touyu khesü licho loulai ae neletao nou mahmo soukhai touyu donou neletao hai lah neletaoye ngaoralai.

³²Oh Israel maitaore, Enou soupfüyu hai khesü neletao vanou soupei moe touyu hai neletaoye panou sülou nüwe. Ewo louzü neletao nou soupfü khaitouyu vahtao donou pa hraongu ae veahoyu sü neletaoye panou ngao-a nou bunüe. Haisü Ramai MAPAO Enou paowe.”

³³Ramai MAPAO nou paoe, “Enou neletaoye neletao vei mahmo teitei hinou soushee peiyu phaki, Enou neletaoye panou neletao vei nuhdutao hi hrüpu loulai ae soushikhai touyu nuhdu khesü panou soushu loulai.

³⁴Neletao vei dou hinou veihao soua tacho tayu maitao nou dou haihaio southoupu louhore tea paoyu khesü neletao nou daotou daosopu loulai.

³⁵Mai hrülai nou haibüa paolai, süolouzü teidei hai nasü raichokio hihro vaohro büa bubaie, ana chuo Eden kipei bütou toure ae nuhdu khesü soushi souhawua thaotayu khesü chuo soushupu loure, mai ve hrüa nou buloure ae veisho-a kaopo hai-a pohao loure.

³⁶Süthaisü kinapa soua buyu tyahrütao, shokhai toua buyu maitao nou soushi khaitoua buyu nuhdutao hai soushu peiyu ae shitayu teideitao hai souveipu louyu sü Ramai MAPAO Enou-e touyu hai süloulai. Ramai MAPAO Enou hai sü soupeilai tea chaachou souwure ae Enou hai sü soupeilai.”

³⁷Ramai MAPAO nou paoe, “Enou Israel maiye sü panou ahinou soukha peio tea khopulai, ae Enou puletaoye sü zhaokhome hinou zhaotu hai alao poupayu büa soupoupa peilai.

³⁸Zhaotu hai raichoki Jerusalem hinou khonü nüyu phaki posheelare donou phoutao-a buyu bütoua soushi khaitouyu nuhdutao hisü mai khe mainou hrüphou loulai. Süthaisü puletao nou E hai MAPAO-e touyu süloulai.”