Read Poumei Naga EZEKIEL 4 Bible Online

EZEKIEL 4 - Poumei Naga bible

EZEKIEL 4

¹Ramai nou paoe, “Thailaiyu maipure, naichuh ali ne nghoujü hinou khipfülo, ae sünavei hisü Jerusalem nuhdu zhai büa rüthoulo.

²Süthaisü nuhdu nahai poloua soushikhai touyu vei shee soungao loure donou sünavei pehao hisü kivo hai khohao khailo, reikhaobu soukhailo, fühaobuh soukhailo, ae pehao veishi hisü reihbasei poa nou buyu zhai sü southoulo.

³Hukhao ali polo ae sünanou kivo phasoua ne ae nuhdu kohisü khailo. Nevei pah sü nuhdu hilova rei-a bulo, nuhdu nasü mainou hulou poloure donou bure ae sünasü hulou poloure hai nenou soulai. Shee hai zhaibüa Israel maivei tyahrü hisü soupeilai.

⁴“Süthaisü nevei nalova nou kou dazülo ae Enou Israel maitao nou soumah khaitouyu vei tudee nasü ne pei hi pokhai peilai. Puletao vei mahmo donou teithe 390 hai nenou veaho-a nou sühinou bulai. Puletao nou veaho laiyu nasü po ali vei hai teithe ali phasoua nenou pfüa nou bulai.

⁶Nenou sünasü bucheyu thai, zhoulova reilo ae teithe raidai hai Judah maitaoye tudee laiyu nasü nenou veaho-a nou bulai. Puletao nou veaho laiyu sü po ali hai teithe ali phasoua nou bulai.

⁷“Nevei ngheithou hai Jerusalem nuhdu nasü haoloua soushiyu nasü zhutei-a nou bulo. Nenou bahzü züloua nuhdu pei hisü veahoyu ae hashi vepare rachi khesü paopeio.

⁸Enou neye sü rai nou phukhailai, sübüa nuhdu nasü mainou hulou soushikhai loumo koute hai neye panou holo hailo reilou ho-a bulai.

⁹“Chuo southou, süthou, toushi, hrathou ae shithou sü polo. Sütao hai poloua thouhrülo ae raokhao khaolo. Nenou nalova nou dazüa buyu teithe 390 hisü nenou sütao hai tou nou bulai.

¹⁰Neye panou teithe ali hi raokhao gram 230 sü toulai, süsü teithe ali hi bakha ali toua bailai.

¹¹Neye panou dzüa daotu ke-a bailai, süsü teithe ali hi panou dzü pai ahai ke-a bailai

¹²Maivei baaki nou poa nenou mei sü souloua süpei hinou raokhao hai khaotoulai ae raokhao sü mai hrülai nou zhingaoyu buh hinou toulai.”

¹³MAPAO nou paoe, “Enou Israel maiye vakou maivei teidei hi soupho rarou khaipeiyu thai, chikha hinou soupfüso tea paopei khaitouyu nasü haizhai büa Israel mainou touso hai toulai.”

¹⁴Ana Enou chila peie, “Oh Ramai MAPAOwo, Eye panou sübüa souso! E hai lah Eye souzhai khaimo hie. E na-a bukinou zhou koute hai lah nou thaiyu sou moa rekhaonatao nou southayu sou hai toukhai timo hie ae sheemoyu touso hai Enou toukhai toumo hie”

¹⁵Südonou Ramai nou paoe, “Sükulouzü veire, Enou neye panou choba nou poa mei souloua nevei raokhao sü khaoloulai”

¹⁶Ramai nou haibüa paopue, “Thai bailaiyu mainare, Enou Jerusalem hi touso pfüve louyu ludu nasü soude laiwulai. Sühinou hrüyu maitao hai ngaopi shopoa nou raokhao sü sühdou hinou douloua nou toulai ae dzühai levea-a nou kelai.

¹⁷Puletao hisü touso hai chelujü shoa nou hrülai ae puletao hai levea poa nou alinou aliye zhulai ae puletao hai puletao vei mahmo hinou hakata-a bailai.”