Read Poumei Naga EZEKIEL 41 Bible Online

EZEKIEL 41 - Poumei Naga bible

EZEKIEL 41

¹Süthaisü mai nanou Eye Sheeyu Buh, kide chülü hisü sapoa nou loue. Puhnou kide sühi talouyu ludu sü douzhue: Süna hai mitar asü thoue,

²ae mitar angou due, alia kivo holova-a ae hailo-a mitar ahaida shoua soukhaitoue; Puhnou kide nasü douyu phaki, süna hai sah soyu nou mitar kai bue, ae jha duyu nou mitar kirou bue.

³Süthaisü puhnou Eye kide akhai hisü saloue. Puhnou kide süna hi talouyu vei ludu nasü doue; sünahai mitar ali thouwe ae mitar asü due, alia kivo hai mitar asüda shoua nou soukhaitoue.

⁴Puhnou kide süna douzhu-e, ae süna hai sha-jha-a deibütoua mitar kirou nou soukhaitoue. kide haina hai kide touchüna talapoa nou louwe. Süthaisü puhnou ahi “Kide haina hai Sheesheelaiyu Buh nasüe,” tea paoe.

⁵Mai nanou Rathoki vei kivo khevai shouyu nasü douzhuyu phaki, süsü mitar asü bue. Rathoki vei kivo veishi hisü kide mitar ahai ahai dua nou souhaove khaikhai toue.

⁶Kide haitao hai kisho asü soua bue, ae kisho ali hinou kide hai shirou shirou bue. Rathoki vei kivo vakou nou khokhai touyu tao hai kisho khevai vei kivotao jünou poupua nou khokhai toue, sübüa kidetao hai panou kivotao hinou boloua paive ha kukhe hi paimu moe.

⁷Südonou Rathoki vei kivo hai vakou nou zhuyu phaki pei hinou deiphi koute hai shouyu sü raibütoua nou zhingao-a baie. Rathoki vei kivo vakou, kidetao vei vakou nou dushoyu sho ahai dokhai toue, sübüa sühinou kisho touchüna hi ae kisho kipeitaoh hi taopawe.

⁸Kide haitao vei vakou kivotao hai mitar ahaida shouwe; Rathoki vei reilova kidetao hinou kikhu ali bue, ae khelova nou kikhu ali bue. Rathoki vei kipei hinou rathoki teitei sü tasühao loure donou mitar ahai-da dua nou souhaove khaitoua Enou zhingao-e. Haina hai deiphi jünou mitar asü hai kua nou soukhai toue ae hainasü Rathoki vei kivotao hi kidetao vei beikhei koa nou souche khaitoue. Rathoki vei pehao veishi hi dei sakhai-a nou napao maitao nou poa vah soure donou mitar kirou hai khaikhaitoue.

¹²Rathoki vei teinghi loulova dei sakhai-a buyu thailo hai ki ali mitar raidai-ngou sa so-a ae mitar shiangou hai jha dua nou soukhai toue; sünavei kivo hai mitar ahaida shoua nou khokhai toue.

¹³Mai nanou Rathoki sü douyu phaki süsü mitar raingou bue, ae Rathoki thailova-a deisayu hinou poa teinghi loulo ki buyu nahi koute-a mitar raingou bue.

¹⁴Rathoki vei nghoujülo, deisakhai-a buyu lova süna-a mitar raingou bue.

¹⁵Puhnou ki shasoyu hai ahai kheinou douyu phaki süna-a mitar rainghou bua nou douloue. Rathoki hi talouyu kide, Sheeyu Buh, ae Sheesheelai Buh

¹⁶haitao hai deiphi hinou poa vabomü hi khete hai lukhao nou kivo souho khaitoue.

¹⁷Rathoki vei kikha hai kikhu hi khete sü kivo va hisü zhainga daothou khaitoue,

¹⁸Sütao hai nghabe ae shou pfüyu khaona khesü daothou khaitoue. Zhainga southou khaitouyu hai nghabe ali ae shouh pfüyu khaona ali tea reirei nou kikha teitei hisü soukhaitoue. Hrikhaona ali nou pah ahai pfüe:

¹⁹Maizhu pfüyu nanou nghabe hilova reiwe, ae souveo pah pfüyu nanou alilo vatha reiwe. Hai zhaibüa kivova veishi hisü southou khaitoue,

²⁰dephi hinou poa kikhu hi khete sü zhainga haibüa southou khaitoue.

²¹Sheeyu Buh vei kikhu dekatao hai dushoyu raibütoua soukhaitoue. Sheesheelai Buh hi taloure vei nghoujü hinou süü nou soukhaitouyu posheelabu ali bütoua nou bue.

²²Haina hai mitar ali-ada kuwe ae mitar ali jha due. Haina vei kainghou hi dekatao, beikheiyutao, ae thakayu veishi hai süü nou soukhai toue. Mai nanou ahi haibüa paoe, “MAPAO vei nghoujü hinou buyu taibel nasü hainare.”

²³Sheeyu Buh hi taloure vei ludu akhai hinou kikhu ali bue ae Sheesheelai Buh hi taloure ludu akhai hia kikhu ali bue.

²⁴Kikhutao hai ali vanou ahai southou khaitoue, ae touchü hinou holo hailo hroupayu ae khuthouyu sü southou khaitoue.

²⁵Sheeyu Buh hi kikhutao hisü kivo va hi southouyu bütoua nghabe ae shouh pfüyu khaonatao zhurai hai daothou khaitoue. Ae taloure vei kide nahi kikhu vakou houpayu nasü süü nou souho khaitoue.

²⁶Kide sünavei thapolo vasü vabomü bue, ae kivotao hisü nghabe nou zhainga veisho-a southou khaitoue.