Read Poumei Naga EZEKIEL 42 Bible Online

EZEKIEL 42 - Poumei Naga bible

EZEKIEL 42

¹Süthaisü mai nanou Eye süthaisa-a vakou vei chikubu ae Rathoki reilova nou soukhai touyu ki hisü sapoa nou loue; süsü Rathoki vei teinghei loulova nou soukhai touyu ki nahinou kadou moe.

²Ki haina hai sha soyu nou mitar raingou so-e ae jha duyu nou mitar kaingou due.

³Ki sünahai alilo vasü Rathoki vei kijü mitar kirou deisa-a buyu hilova reiwe, ae alilo va nou kijü buyu chikubu hi talouyu ludu hilova rei-a soukhaitoue. Haina hai deisho asü soua khokhe khaitoue.

⁴Ki haina vei reilova nou ludu hai mitar angou du ae mitar raingou so-a nou soukhaitoue, ae sü pe hinou talouyu bo hai phapei khaitoue.

⁵Deisho kukayu hinou soukhai touyu kidetao hai deisho touchü na ae teiku hi buyu kidetao jünou taipu hie, daiolouzü kide sütao hai thailova pa-a nou soukhai touyu donou taipu hie.

⁶Kide sütao hai kisho asü soua nou soukhaitoue, anou vakou nou soukhai touyu ki kukhe büa deka hai thoumoe.

⁷Deido nayu hinou soukhai touyu vei kivo vakoutao hai veisho-a nou soukhai toue, süsü mitar kaingou so-e, ae haisü ki sha dali-e; alia sho-a buyu mitar kaingou hisü kide southou khaitoue. Deido kuyu na hiolouzü ki sha veishi hai kide southoukhai khaitoue.

⁹Teinghei palova nou kou ki dukhai hinou kide ahai buyu khelova süsü kijü hinou chikubu vei kivo haotayu hinou chikubu hi taloure ludu nasü bue. Rathoki vei khelova-a ki sübütou touyu ali hai Rathoki vei teinghi loulova nou buyu ki hinou doushomoa nou ali bue.

¹¹Kide süna vei nghoujü hia reilova nou buyu raibütoua ludu sü soukhaitoue. Ludu haina-a dushoyu, zhaingatao ae talouyu ludu khesü reilova vei raibütoua baie.

¹²Khelova buyu kidetao hisü teinghei palova nou talouyu ludu ali bue, sühinou kikhevai hisü ludu taloue; ae sühinou kide dadeyu vei kivo ali bue.

¹³Mai nanou ahi paoe, “Ki haina ahai kheinou sheewe. Ki sühai hinou napao maitao nou talou MAPAO vei nghoujü hinou sheekayu posheela khesü touwe. Napao maitao nou kide süsü sheeyu donou sheekayu posheela khesü khailai: thoudzü vei posheela ae mah vei posheela moa paokha peiyu vei posheela khesü sühi khailai.

¹⁴Napao maitao nou Rathoki hi veloua puletao nou vakou tapalai touyu phaki, puletao nou sheeyu sabanü banaopoa MAPAO vei kuvah souyu khesü kide hai hi phakhaiwulai. Puletao nou sabanü kukhe nou banouloua nou maisou vejü buyu hrohisü tapalai.”

¹⁵Mai nanou Rathoki khevai doure douche louyu thai, puhnou Eye teinghi palova vei rokhubomü hinou sapaloua Rathoki vei kijü hai doue.

¹⁶Puhnou douyu süü nasü poloua teinghei palova sü douve-e, ae sühai mitar 250 bua nou douloue.

¹⁷Süthaisü puhnou reilova, khelova ae teinghi loulovatao hai doue; sütao alili hinou sha soyu hai mitar 250 bukhai toue,

²⁰Sübüa Rathoki vei fühao hai sha-jha raibüa mitar 250 bukhai toue. Kivo sünou sheeyu natao hai sheemoyu tao hinou soukupa khaiwure.