Read Poumei Naga EZEKIEL 48 Bible Online

EZEKIEL 48 - Poumei Naga bible

EZEKIEL 48

¹Reilova deirai hai Mediterranean Zai vei teinghei palova nou poa Hethlon nuhdu, Hamath vei vedei deirai hi koute-e. Israel mai khü alili nou teinghei palova deirai hinou poa teinghei loulova Mediterranean Zai hi koute hai reilova nou poa khelova hai haibüa nou shoshonou ngaolai: Dan Asher Naphtali Manasseh Ephraim Reuben Judah

⁸Teidei süthaitao hai matsüsho-a poa vah soure donou dadekupa khailo. Haisü reilova nou khelova koute hai kilomitar kiahaida hai jha dulai, ae khü ali hi peiyu bütoua teinghi palova nou teinghi loulova koute sa sotoua nou peilai. Rathoki hai hinou soulai.

⁹Teidei hai hinou kilomitar kiahai-da sa shoyu ae kilomitar kirou jha duyu sü MAPAO ye donou soukupa peilai.

¹⁰Napao maitao-a sheeyu hai hinou puletao vei zha ngaolai. Puletao vei zha soure donou kilomitar kiahaida hai teinghi palova nou teinghi loulova koute hai peilai, ae kilomitar angou hai reilova nou poa khelova koute peilai. MAPAO vei Rathoki hai fühao haitao vei toutsü hinou soulai.

¹¹Fühao haitao hai Zadok vei tyaosholea hinou hüveyu napao maitaoye donou peilai. Puletao hai chilee chechetou tea nou avei kuvah sü souwe, ae Israel mai kukhetao nou vah ashi souyu alia Levi mai kukhe nou kaozü moyu vah souyu hisü louzho moe.

¹²Südonou puletaoye sü Levi maivei teidei thaisho, sheekayu füdei nasü puletao hi peilai.

¹³Levi maitao-a napao maitao vei khelova nou füdei hai veisho-a nou peilai. Puletao vei füdei-a teinghei palova nou teinghei loulova koute hai kilomitar kiahai-da, ae reilova nou khelova koute hai kilomitar angou peilai.

¹⁴MAPAO hi sousheeloua peithoukhai touyu teideitao hai veikayu teidei-e, südonou teidei haitao sü mai linoua zhotoulai moe, moyuma poa füdei kukhe lealai moe, moa mai hi peidalai moe. Haisü sheewe ae MAPAO vei baie.

¹⁵Pokupa khaitouyu füdei vei nalova kilomitar kiahai-da sa shoyu ae duyu nou kilomitar ahai-da hai sheemoe, ana haisü vah kukhe poa soure donou khailai. Nuhdu nasü füdei haitao vei tsülü hinou soulai,

¹⁶ae haisü sa-jha-a panou deitou toulai, süsü holo-a ae hailo-a mitar 2,250 noulai.

¹⁷Nuhdu vei pehao veishi hisü mitar 125 hai dei sakhai-a nou khailai.

¹⁸Sheeyu vei dei buyu thaitao, shokhaitoua buyu deitao, teinghei palova nou poa teinghei loulova kouyu kilomitar angou ae duyunou kilomitar ahai-da hai nuhdu hinou hrüyu maitao panou tatah toulai.

¹⁹Nuhdu hinou hrüa buyu mai taralia füdei hai hisü tadaotoua bailai.

²⁰Südonou toutsü hinou pokupa khaitouyu füdeitao hai nuhdu soure donou peiyutao noupu loua sa-jha hai kilomitar kiahai-da bulai.

²¹Teinghei palova nou poa teinghei loulova buyu füdei haitao hinou Rathoki souyu füdeitao hai loulai, napao maitao vei füdei, Levi maitao vei alia nuhdu vei füdeitao-e, süthaisü shokhai toua buyu füdeitao hai veo nahpoutu vei-e. Haisü teinghei palova deirai hi koute-e, ae teinghi loulova sü Mediterranean Zai hi koute-e, alia reilova Judah maivei deirai hi khe-e ae khelova hai Benjamin maivei teidei hi kou-e.

²³Dei dekupa khaitouyu hinou khelova buyu teideitao hai ngaolou moa buyu khü alili nou dei zha alili hai teinghei palova deirai hinou teinghei loulova Mediterranean Zai hi koute ae reilova nou poa khelova koute hai haibüa khü alili nou ngaolai: Benjamin Simeon Issakar Zebulun Gad

²⁸Gad maitaoye peikhai touyu teidei khelova deirai hai Tamar hinou teinghei loulova kou Kadesh vei dzübvü buyu hi koute, süthaisü teinghei loulo reilova hai Ejipt maivei deirai hinou Mediterranean Zai hi koute-e.

²⁹Ramai MAPAO nou haibüa paoe, “Hai zhaibüa Israel maitao nou teidei sü khü khü nou zhiloulai, ae hai khesü puletao vei soulai.”

³⁰Jerusalem nuhdu hi taloure hai rokhubomü kiahai bue. Kivo adai dai hinou mitar 2,250 bue, ae kivo alili hinou rokhubomü asüsü bue, ae rokhubomü sütao hai Israel maivei khütao zhih nou sapei khaitoue. Reilova nou buyu kivo hi rokhubomütao zhih hai Reuben, Judah, ae Levi; teinghei palova kivo hi buyu rokhubomütao zhih nou Josef, Benjamin, ae Dan; khelova kivo hinou buyu rokhubomütao zhih nou Simeon, Issakar, ae Zebulun; ae teinghei loulova kivo hinou buyu rokhubomütao zhih nou Gad, Asher, ae Naphtali toue.

³⁵Nuhdu vei kivo khohao khaitouyu veishi hai sa shoyu mitar thekü bue. Nuhdu sünavei zhih hai chu thainou “MAPAO Sü HAIHI BUE!” tea kutalai.