Read Poumei Naga EZEKIEL 5 Bible Online

EZEKIEL 5 - Poumei Naga bible

EZEKIEL 5

¹MAPAO nou paoe, “Thai-a bailaiyu mainare, khoche heiveih shoyu ali poloua nevei khoumai ae nevei mai veishi sü saiwuo. Süthaisü saikhai touyu maitao hai sühdou hinou zha asü soua doupa khailo.

²Zha ali hai nuhdu nasü mainou poloua soushi khaiwua tayu thai nuhdu hinou polou mei deipeio. Zha asü hinou zha ali hai nevei khoche sünou daosasa loua nenou nuhdu vei pehao hi tayu phaki raopoa tapeio. Shokhai toua buyu taosü teikhai hi laipa peio ae Enou avei khoche poloua sütao hai thaihu talai.

³Mai daotu hai pokhai loua nevei sah kainghou hinou jükhailo.

⁴Süthaisü daotuli hai popaloua mei hi thou dei peikhaio, sübüa panou mei sü deikhaio. Mei sünanou Israel maivei tyahrü veishi hisü taopoa nou talai”

⁵MAPAO Ramai nou haibüa paoe, “Jerusalem nuhdu nasü zhukhaio, Enou puhye sü deiphao toutsü hi khaipei khaitoue ae tyahrü hrülai nou puhye sü sühao poa nou bue.

⁶Ana Jerusalem nou avei kharochi khesü züba-a rulare ae tyahrü kukhetao jünou maishipure ae puhvei pehao hinou buyu maitao jünou paochi hai zübapu loure. Jerusalem nou avei kharochi ae chikha khesü züba-a malaiwure.

⁷Jerusalem Ramai MAPAO Enou paoyu sü keinou loukhaio, Neletao avei chikhatao ae avei kharochi khesü zübayu donou neletao hai neletao vei pehao hinou tyahrütao jünou veahoyu sü daopua nou bue. Neletao hai tyahrü kukhe maivei zhaidou khesü fütare.

⁸Südonou Ramai MAPAO Enou neletao hai Eye ngaobayu maitao büa neletao hi paowe. Tyahrü hrülaiye panou ngaore donou Enou neletaoye tudee peilai.

⁹Daiolouzü Enou ngaorayu vah haso veishi hai neletao nou soupfüre, südonou Enou raichoki soukhai moyu ae haithai naki-a soulai moyu nanou Enou Jerusalem sü tudee peilai.

¹⁰Süvanou Jerusalem hinou buyu pfüpuo maitao nou puletao vei nahmai hai toulai, ae nahmaitao nou puletao vei pfüpuoye toulai. Enou neletaoye sü shisho-a nou tudee peilai ae shokhai toua buyu maitao hai hupho rarou laikhai toupeilai.

¹¹“Ramai hai hri-a buyu donou ae hai sü MAPAO Ramai vei chipao thaifüa Enou neletaoye sü zhuveayu halia ha-a nou neletaoye sü daode laiwulai, daiolouzü neletao nou avei Rathoki sü souzhai peiwure ae ngaorayu vah ashi khaikho hai neletao nou soupfüre.

¹²Zha asü soukhai touyu hinou neletao zha ali hai sounou souyu hinou ae khü-züyu hinou nuhdu hinou thailai; zha ali hai nuhdu vei vakou hinou khoche hinou thailai; ae shokhai toua buyu zha ali hai hupho rarou laiwua panou khoche nou poloua thaihu talai.

¹³“Enou rukha loumo koute hai avei lekha rarou sü neletao hi velai. Haibüyu khesü neletao hi vepare toulouzü, MAPAO Enou neletao hi paopeiwure ae neletao nou chilee cheche moyu donou vepa-a baie touyu hai neletao nou süloulai.

¹⁴Neletao vei pehao hinou hrüyu tyahrütao nou neletaoye ngaolouyu phaki, puletao nou neletaoye konülai ae neletaoye ngaora-a nou tavai ta-a bailai.

¹⁵“Avei lekha rarou hinou Enou neletaoye tudee peilai ae sünasü neletao vei pehao hinou buyu tyahrütao nou ngaoloua ngaopi sholai. Puletao nou neletaoye ngaora shopoa nou zhulai ae neletaoye konü peilai.

¹⁶Neletao nou ngaotou ngaoso-a buyu touso veyu ludu khesü Enou soude laiwulai ae neletaoye panou khü-züa nou bulai. Neletao nou khü-züa veayu hai neletaoye souhare donou vouloushu ali nou kapeiyu büa veasho-a nou bulai.

¹⁷Enou houzüyu sü neletao hi seive peilai ae rekhaona khesü neletao vei nahmaitaoye panou southare donou seive peilai ae Enou neletao hisü sounou ashi, choroyu, taidayu ae soureih sü seive neletaoye southalai. MAPAO Enou haisü paowe.”