Read Poumei Naga EZEKIEL 6 Bible Online

EZEKIEL 6 - Poumei Naga bible

EZEKIEL 6

¹MAPAO nou ahi haibüa paoe,

²“Thai-a bailaiyu mai nare, Israel maivei deichitao hisü zhulo ae avei chipao khesü puletao hi paopeio.

³Israel maivei deichitao hi MAPAO vei chipao hai keilo tea paopeio. Ramai MAPAO Enou deichitao ae deiraotao alia deikhotao hi paoyu avei chipao hai keilo tea paopeio; Maikhe mainou Basharaye thoyu buh khesü Enou khoche seive souhalai.

⁴Posheelabu khesü dakhosasa laiwulai ae poukai nüvei deiyu buh khesü soukho laiwulai. Sühinou buyu maitaoye sü puletao vei Basharatao nghoujü hinou southalai.

⁵Enou Israel maivei thaiphao khesü puletao vei Basharatao nghoujü hinou lairarou khaipeilai ae puletao vei rao khesü posheelabu pehao hi laikhai peilai.

⁶Enou Israel maivei nuh teitei hai souhalai sübüa puletao vei posheelabu ae Basharatao hai soushi laiwulai; ae puletao vei poukai nüvei deiyu posheelabu khesü souphe soupho laiwulai alia puletao nou soukhai touyu na veishi hai hata-a bailai.

⁷Maikhe mai hai buh likinou thailai ae thaimoa shokhai touyu maitao nou Eye MAPAO-e tea süloulai.

⁸“Enou neletao kamai-a panou thaimoa tureipa loulai ae puletao sü tyahrü kukhetao hi porarou khaipeilai.

⁹Sübüa puletao hai hukhamai soua vakou nüpoa talai. Puletao nou buh sütao hinou Eye licholai ae puletao nou Eye louche moa basharataoye jüpapua thoyu donou Enou rarouloua puletaoye tudee peiwe touyusü puletao nou süloulai. Puletao nou vah ashi ae kaozü moyu soukhai touyu donou puletao hai lah puletaoye ngaora-a bulai.

¹⁰Puletao nou E hai MAPAO-e touyu sü süloulai ae Enou puletao hi paopi peiyu khesü da-a nou halia moyu hinou paomoe touyu hai puletao nou süloulai”

¹¹MAPAO Ramai nou haibüa paoe, “Neletao bah taokhaio! Neletao vei phi sü dei deikhaio! Israel maitao vah ashi ae ngaorayu vah soukhai touyu teitei donou levea-a kralo. Puletao hai soureih souyu moa tokaa veyu hinou moa sounou soua thai-a bailai.

¹²Kadou kounou buyu maitao hai sounou soua nou thailai; nghia buyu maitao hai soureih hinou southawulai, shokhai toua buyu maitao hai houzüa thai bailai. Puletao hi avei lekha rarou veyu nasü puletao nou süloulai.

¹³Puletao vei thaiphao khesü basharatao hi, posheelabu pehao hi, kuyu deichitao hi ae deichi peitaoh hi, süübe daiyu phi hi, phesüübe dutao phi hi, ae puletao vei basharatao hi poukai nüvei meidei peiyu posheelabu tao hinou raroupoa thai-a buyu sü ngaolouyu phaki maikhe mainou E hai MAPAO-e touyu puletao nou süloulai.

¹⁴Enou puletao pei hisü abah thaipa puletao vei tyadei veishi hai khelova nou buyu radeiki hinou poa reilova buyu Reblah hi khete hai soushi souhakhai toupeilai. Israel mainou hrüyu buh ali koute-a shokhai peilai moe. Süthaisü mai hrülai nou E hai MAPAO-e touyu sü süloulai.”