Read Poumei Naga EZEKIEL 7 Bible Online

EZEKIEL 7 - Poumei Naga bible

EZEKIEL 7

¹MAPAO nou ahi haibüa paoe,

²“Thai-a bailaiyu mai nare, Ramai MAPAO Enou Israel mai hi haibüa paowe tea paopeio: kainghou adai hinou buyu deiphao sü akhai soulaire.

³“Chuo Israel maiye donou akhai soure teile vere. Avei lekha rarou nasü neletao pei velai, daiolouzü neletao nou soupfü khaitiyu na thaifüa neletaoye sü chikulai. Neletao nou ngaorayu vah haso soukhai touyu teitei sü Enou paokha peilai.

⁴Enou neletao mai ali koute-a phapeilai moe, moyuma zhuveayu hai ali-a bupeilai moe. Neletao nou vah haso ashi soukhai touyu donou neletaoye Enou tudee peilai, sübüa neletaoye panou E hai MAPAO-e touyu sü süloulai.”

⁵MAPAO Ramai nou haibüa nou paoe, “Neletao hisü veahoyu ali pei hinou veahoyu kukhe ali hai velai.

⁶Ha veishi nou chekhore. Akhai sü vere. Neletao hai hazei toure.

⁷Teidei sühinou hrüyu maitao vei akhai soure teile sü vere. Büraroua bure teile, deichi vanou khonüh nüa bupu more teile sü nghiteire.

⁸“Thasho-a nou avei lekha rarou nasü neletao hi velaire. Neletao nou soupfüyu vah thaifüa enou neletaoye sü chikulai, ae neletao nou ngaorayu vah soukhai touyu teitei sü Enou neletaoye paokha peilai.

⁹Enou neletaoye vupa peilai moe, moyuma zhuvea leshiyu hai titoulia ngaopeilai moe. Neletao nou vah haso ashi soukhai touyu thaifüa enou neletaoye sü tudee peilai, sükua neletaoye panou E hai MAPAO-e touyu sü süloulai ae Enou neletaoye tudee peia baie touyu sü panou süloulai.”

¹⁰Israel maiye soushi soukanghiyu teile sü velaire. Kaozü moyu ae taidayu sü phoutao loure, ae khaophu souyu sü pousho loure.

¹¹Taida-a zü-veiyu hai mai shiyu poupapua baie. Puletao mai lia shopeilai moe, puletao vei nangi, naveih alao buyutao, moyuma puletao vei kathe khesü halia shokhai peilai moe.

¹²Teile sü velaire, na hüyu moa zhoyu nasü ngaomo tare teithe sü nghire, daiolouzü Ramai vei tudee nasü mai hrülai hi raibütoua velaie.

¹³Huha souyu maitao nou na hüloua souhakhai touyu khesü ngaodakhai loumo kinou puletao hai thaita-a bailai, daiolouzü Ramai vei lekha hai mai hrülai hi velai. Mai ashi maitao hai hriloulai moe.

¹⁴Shabe sü nghoupare, ae mai hrülai nou souda loure, ana mailia reihbu hisü talou more, daiolouzü Ramai vei lekha rarou hai mai hrülai hisü raibütoua vere.

¹⁵Kijüdu hisü taida vayu ae kikha hisü rahta rahvu ae tokaa nou bulai. Vakou nou buyu maitao hai khoche vanou thailai, ae nuhdu khevai nou buyu maitao hai rahta rahvu ae tokaayu vanou thai-a bailai.

¹⁶Mai daotuli hai turei paloua deichi vanou pa bulai, ae puletao hai khao büa puletao vei mahmo donou dopfüa lea nou bulai.

¹⁷Puletao vei bah sü lülouhoa bailai, ae puletao vei khoubou hai shihrührüa bulai.

¹⁸Puletao mai hrülai hai soukousah nou banoulai, ae puletao hai ngaopiyu nou ngupoa nou hrülai. Puletao pei sü sailaiwulai, ae puletao hai hraongu pfüa nou bulai.

¹⁹Puletao nou puletao vei shahu ae sana khesü komoyu na ali büa shilaiwulai, daiolouzü MAPAO vei rarou lekha hai puletao hi veyu phaki, shahu moa sana sünou puletao vei thainüyu nasü rukha soupei louhoe, moa puletao vei pou sü souphou peiloulai moe.

²⁰Teile ali hi hai puletao vei hüvei sho-a buyu zhusanatao donou puletao hai khaophu soua nou bue, ana puletao sütao hai poa nou ngaorayu bashara sü souloure, südonou MAPAO nou puletao vei nangi hai panou puletaoye donou sheemoyu na ali soupeiwure.

²¹MAPAO nou paoe, “Enou puletaoye sü vakou maivei bah hi thaothou peilai, ae puletao vei nangi khesü panou mai ashi maiye poloulai ae puletao nou sütao hai souzhaiwulai.

²²Avei rathoki hinou kini khaiyu buh hi talou souzhaiyu phaki, ae maivei shaotou mainou daphe dakho peiyu phaki avei zhu hai pfüa reita-a bailai.

²³“Ha teitei nou haokao-a bukhai toure, teidei hisü maiye dathayu mainou phoutao loure, ae nuhdu veishi hisü taidayu ae züvei vayu nou phoutao loure.

²⁴Enou shikayu tyahrütao sü nuh teidei hai hi save thou peilai, ae puletaoye panou nelatao vei ki sü thaoloulai. Puletao nou neletao vei rathoyu buh hai souzhai peiyu phaki, neletao hi khoukayu maitao vei pfüchi sü Enou souha peiwulai.

²⁵Veahoyu ae chorosoua hrülaiyu teile sü velaire. Neletao nou kaonayu nasü phoutalai, ana ngaolou khailai moe.

²⁶Veahoyu ali pei hinou veahoyu kukhe ali hai veloulai, ae tobai soumoa ko ashi khesü thaokhai toumoa neletao hisü veloulai. Neletao nou rachipaola peiyu maitao hisü puletao nou ngaoyu khesü paongao peio tea kholai. Napao maitao nou maikhe mai hi halia paodou peiloulai moe, ae tsümaitao nou maikhe mai hi halia doupeilai moe.

²⁷Veo sü dopfüa bulai, ae veo vei nahmaitao hai areih hata-a bailai, alia maikhe mai hai ngaopi-a nou ngupoa nou bulai. Neletao nou soupfü khaitouyu veishi donou enou neletaoye tudee peilai, ae neletao nou mai hi chilou kupeiyu bütoua Enou neletaoye sü chiku peilai. Hai vanou E hai MAPAO-e touyu neletao nou süloulai.”