Read Poumei Naga EZEKIEL 9 Bible Online

EZEKIEL 9 - Poumei Naga bible

EZEKIEL 9

¹Süthaisü Ramai nou haibüa shusoua raoyu sü Enou choue, “Nuhdu naye tudee-a soushire maitaore, haihi takoulo. Reih basei khesü polo.”

²Süteilebü hinou mai arou hai rathoki vei reilova buyu rokhubomü hinou tapare, ae puletao mai hrülai nou reih basei hai powe. Puletao mai ali hai züzüyu sabanü nou banaowe, ae puh hai rülou veiyu nali poa bue. Puletao mai hrülai nou baosahu nou soukhai touyu posheelabu nghoujü hinou kou la loure.

³Süthaisü Israel mainou Ramai vei khouko ava shouh pfüyu khaonatao hinou vapare, ae rathoki vei kikhubomü hisü koure. MAPAO nou deizüzüyu sabanü banaoyu mainaye sü kuloua nou haibüa paoe,

⁴“Jerusalem nuhdu veishi hisü tasühao takhaio, ae nuhdu hai hinou vah ashi ae ngaorayu vah soukhai touyu levea dopfü buyu maitao pu vasü larücha daopeie.”

⁵Süthaisü Ramai nou kukhe maitao hisü haibüa paoyu hai Enou choue, “Puhye nuhdu hisü thaifü talo, ae maiye southa takhaio. Mai ali koute-a shokhai peiso, ae mailia zhuvea peiso

⁶Tsümai ae nahlemai, naotumai, pfümai ae nahmaitou sümoa mai taidu hrülai nou southa khai-o. Ana pu hi larücha daokhai touyu maitaoye sü mailia southaso. Neletao nou rathoki hai hinou southa poa talai.” Südonou puletao nou rathoki hinou la-a buyu Israel maivei süthai-apei maitao hinou southa poa nou tare.

⁷Ramai nou puletao hi paoe, “Rathoki sü souzhai khaio. Hai hisü thaiphao nou pothou phoutao khaio. Vah sü soutakhaio.” Südonou puletao nou nuhdu hi maikhe maiye sü southa tare.

⁸Puletao nou maiye southa-a buyu teile hisü E lah likhei sühinou la-a nou bue. Enou apah sü deiphi pfükou khailoua haibüa shura soua sha-e, “MAPAO Ramai, nenou Jerusalem ye sü lekhayu donou shokhai toua buyu Israel mai hrülaiye southa khai-a bailaidou?”

⁹Ramai nou chila peie, “Israel ae Judah maitao nou haohao soumoa mah khesü soukhai toue. Puletao nou teidei veishi hisü maiye datha southare, Jerusalem hisü mahmo nou southou phouchü khaipeiwure. MAPAO, E hai puletao vei teidei sü thaokhaire ae puletaoye ngaolou hore tea puletao nou paore.

¹⁰Ana Enou puletaoye leshi peilai moe; Enou puletao hisü puletao nou mai hi soupfüyu bütoua soupeilai.”

¹¹Süthaisü daizüzüyu sabanü banou-a buyu mai nanou dakhai veloua MAPAO hi haibüa paoe, “Nenou kharochi peikhai touyu nasü soupeiwure.”