Read Poumei Naga DANIEL 10 Bible Online

DANIEL 10 - Poumei Naga bible

DANIEL 10

¹Parsia hi veo Sairas nou vekoulouyu po asü kousü Belteshazzar tea kuyu Daniel hi chipao ali paosüngao peie. Chipao sünasü cheche-e, ana süloure hai tateishoe. Haina hai puh hi puhvei zho kounou shozü nou paongaotou tupeie.

²Süphaki, hapta asü lihai Enou dopfüa kra nou bue.

³Hapta asü chemo koute Enou touso aveih tya toumoe, zhaoh-a somoe, alia theadzü na-a peia kumoe.

⁴Potei hi khouh arai navei khoukha kaidai zhou, Enou dushoyu Taigris reipe hinou la-a bue.

⁵Sühinou anghithou hepa zhuyu phaki, mai ali züzüyu sah ba-a ae puhvei khyakho hai veishoyu sana nou khopfüa bue.

⁶Puh pfüphao hai chuhva büwe, ae puh pah hai teireiyu büwe, puhvei nghithou hai meikei ali büe. Puhvei phibah hai souphou khaitouyu baosahu büwe alia puh pai hai mai soudu nou raoyu kho büe.

⁷Zho nasü E likhi ngaoa baie. Eye koa laiyu mai hrülai nou zho nasü ngaomoe, ana puletao nou ngaopi shopoa tutare ae tuchü takhai toure.

⁸E lah likhei khupashoyu zho nasü zhua baire, südonou avei pfüchi sü hazhi tare, ae azhuh hai-a tyaku tare alia avei khouko sü hatare.

⁹Süthaisü Enou puh paisü choue, alia Enou puh pai sü chouloua apah deiphi pfünakou holoure ae E sü tsü hatare.

¹⁰Ana bah ali nou thaikou Eye pailashu peie; ae aphibah sü ngudoudoua buhie.

¹¹Rakivamai nanou ahi paoe, “Oh Daniel, Ramai nou neye leshie. Enou paoyu chipao taosü soutousou keitou tulo, ae latou tulo, daiolouzü Eye ne hi seivewe.” Puhnou ahi chipao haitao pao-a buyu phaki, E sü lashu loure ana shihrührüa buhie.

¹²Süthaisü puhnou ahi paoe, “Daniel, ngaopiso, daiolouzü nenou tsüsüyu ngaoloure donou Ramai nghoujü nou nakouloua veachi paoyu nasü, süzhou teithe hinou nevei veachi sü noupeiwure, alia nevei veachi nasü chila peire donou E ve-a baie.

¹³Parsia vei vedei khoyu rakivamai nanou Eye teithe kaili nuchao loure. Ana rakivamai hi peichayu Maikhel nou Eye ve soukha peie, südonou Enou puhye Parsia hi khaiwua haihi vewe.

¹⁴Enou haihi ve neye panou haithai nevei maitao hi daidai vepa laiyu taosü süloure donou vewe. Haihai akhai teithe hi vepare vei zho ngaopeiyu nasüe.”

¹⁵Puhnou ahi haibüa chi paoyu phaki, Esü apah deiphi pfünakou loure alia raolou hore.

¹⁶Süthaisü mai büyu rakivamai ali nou avei mütai kou puh bah nou daipeie, süthai sünou amü hepaloua pailoue. Anghoujü nou la-a buyu nahisü Enou paoe, “Apaopuwo, zho ngaoyu na vanou Esü avei pfüchi hare.

¹⁷Apaopuwo, ne kilai E kabüa apaopuye chiphalou khailaige? Daiolouzü apfüchi hare, ae assü hailou hore.”

¹⁸Süthaia mai büa buyu nanou Eye deipu peie ae Eye soukhoupu peie.

¹⁹Puhnou ahi paoe, “Ramai nou neye leshi shoe, südonou ne ngaopiso, kaonayu sünou ne hi bulo, khouchilo ae khuveilo.” Puhnou ahi paoyu thaisü, avei pfüchi pare alia puh hi haibüa Enou paoe, “Apaopuwo, nenou ahi paolaiyu taosü paopei khaio, daiolouzü nenou Eye soukhou peire.”

²⁰Süthaisü puhnou paoe, “Enou ne hi veyu hai daivanou vewe touyu ne süho moe? E taho Parsia teidei khowo rakivamai naye reih soulai hie, alia Enou tayu thaisü, Grik mai teidei khowo rakivamai nanou velai.

²¹Ana acheche larübvü hinou rüthou khaitouyu nasü Enou ne hi paopeilai: Puletaoye reih züyu hisü Eye soukha peire mai kukhe ali-a hae, neletaoye soukha peiyuna rakivamai Maikhel likhi baie.