Read Poumei Naga DANIEL 11 Bible Online

DANIEL 11 - Poumei Naga bible

DANIEL 11

¹Mede mai khü hinou hrüveyu Darius nou vekou louyu po araina hisü Enou puhye soukha peie alia soukhou peie.

²Alia Enou chuo ne hi paopeire chipao hai cheche-e.” Rakivamai nanou paoe, “Parsia vedei hi vemai asü hrüve pulai, ae vemai adai chenanou puletao teitei jünou kini nipu sholai hie. Puhnou kini nipayu phaki alia khouko veikheyu phaki, puhnou Grik maivei vedeiye sü souchoro peilai.

³“Süthaisü khouko pfüshoyu vemai ali palai, ae puhnou dushoyu vedei nasü kholai alia puhnou sounü pfünü khesü puh dosoua soupfü loulai.

⁴Puhnou sübüa khouko pfüsho payu phaki, puhvei vedei sü dade adai soua bailai. Puhvei vebuh hisü maitya kukhemai nou pa veo soua bailai, ana puletao hai puh büa khouko bulai moe.

⁵“Süthaisü khekounou buyu Ejipt teidei hinou khoushoyu vemai ali palai, ana puh jünou puh khehinou buyu peikhomai ali nou khoupu palai, ae puhnou khoyu vedei sü dusholai.

⁶Po daotu thaisü Ejipt hi veo nou Sairia hi veoye koa chavei lathaore donou vo soulai, alia puhnou puh nahpaiye sü Ejipt veo hi peilai. Ana puhai nou soukhai touyu vo nasü phasho laimoe, alia honapai, honapai khapu, honapai vei nahmai, ae puhye koa veyu kilai mai hrülaiye sü southa bailai.

⁷Thashoa nou honapai vei kityarai mai ali nou pa veo soulai. Puhnou Sairia veo hisü reih huloulai, ae puhnou reih sü ngaloulai.

⁸Puhnou puletao vei basharatao, shahu ae sana nou soukhai touyu mutei paikhao khesü Ejipt hi potawulai, alia po daotu lihai puhnou reih soumoa kaona-a bulai.

⁹Süthaisü reilo buyu Sairia veo nou khelo buyu Ejipt maivei teidei hisü reih huloulai, ana puhnou reih hulou loumoa lah teidei hi dakhai ta-a bailai.

¹⁰“Sairia hi veo puhvei nahpoutu maitao nou soureih soure donou reihmai taoli soudaloua dzüdu büa puletao ngaobamai hisü reih soutalai.

¹¹Süthaisü khelo buyu Ejipt hi veo nou rarou sholoua takhe reilo buyu Sairia veoye reih zülai, alia puhnou Sairia veo vei reihmai taoliye sü nükhaiwulai.

¹²Puhnou reih veiloua reihmai taoliye southa louyu vanou ae nükhai louyu vanou puhsü khaophu sousho palai, ana puhnou phashoa veikou laimoe.

¹³“Süthaia reilova buyu Sairia veo nou raiki jünou reihmai poupua tudakhai loulai, alia po daotu thaisü puhnou reihmai me aduli ae reih basei soutaosou tupfüloua dakhai kou reih soupulai.

¹⁴Süphaki mai alao nou Ejipt veoye sü hraitalai. Alia Daniel, nevei maitao hrohinou lekha ashi kamai-a nou zho ngaoyu nasü panou vete loure donou reih sü soulai, ana veilou laimoe.

¹⁵Südonou reilova buyu Sairia veo nou veishoa soukhai touyu nuhdu khesü poloua bailai. Ejipt maivei reihmaitao hai reih zülou hoa bailai, pfüchi veishoyu ae khouko bushoyu reihmai koutea khouko ha-a bailai.

¹⁶Sairia reihmaitao nou sounüna thaifüa puletao nou souloua bailai, daiolouzü mai ali koutea puletao nghoujü hi lalou laimoe; alia puletao nou Apaokhai touyu Teidei hisü louloulai, ae sükhe teitei hai puletao vei khakhe hinou bua bailai.

¹⁷“Sairia hi veo nou puhvei khouko teitei nou thouloua puhye ngaobayu vedeitao pei hisü reih soutalai. Puhnou süsü soure donou puh nahpaiye puh hi peia puhye koa reih soulai, ana puhsü veilou laimoe, moa süsü puhye donou kaozho aveih ngaolou laimoe.

¹⁸Süthaisü puhnou zaidu pehao hinou buyu vedei taoli hi reih soulai alia puhnou ngaloulai, ana puhvei khaophu nasü vakou maivei vedei hinou hrüyu mai ali nou souhawu bailai, alia puhnou khaophu souyu büa puh hisü soudakhai peilai.

¹⁹Veo nou lah puhvei vedei hisü dakhai talai, ana puh phi süloua kaota bailai ae puhye ngaomo ta-a bailai.

²⁰“Süthaisü puh thaosoua pa vekoulouyu mai ali nou vedei sünasü soudu souso loure donou peikhomaiye sü panou kikha khatalai; ana teile jütou hinou puhye sü southa bailai, puhye southayu sü lekha rarou hinou laimoe, aliro soureih souyu hinou laimoe.

²¹“Süthaisü puh thailo pa veo soulaiyu nasü vetya moyu mai ashimai alinou pa veo soulai, lichokhai timoa buyu teile hinou puhnou vedei sü poloulai.

²²Mai taralia puhye dulouzü, Ramai vei Napao peichana koutea puhnou souhawu bailai.

²³Puhnou koa vo souloua tyahrü taoli hinou do ashitya koloulai, alia puhnou khoyu vedei hai tai-a buyuma puh sü khoulailai ae dulailai palai.

²⁴Puhnou kheikhei soua kini buyu teidei khesü soureih souvelai, ae puhnou puhvei paipao mainou soukhai toumoyu vah khesü soulai alia reih souyu hinou ngaolouyu kini khesü puh thaifüa laiyu maitaoye koa zhiloulai. Puhnou veishoa soukhai touyu nuhdu khesü reih soure donou tsüchoa soudalai, ana puhsü teile phasoa bukoulai moe.

²⁵“Puhnou soutaosoua dushoyu ae khoushoyu reihmai me ali saloua khekou buyu Ejipt veo pei hisü reih soulai. Ejipt hi veo-a reihmai taoli saloua reih sü dulai, ana puhsü pahshia bailai, daiolouzü puhye sü shodo souloua lalou bailai.

²⁶Puhye sü puh khenou buyu peikhomai, puhye koa touso zhoyu mainou puh hisü shodo ashi soupeia puhvei reihmai taoliye sü souhawulai alia southa bailai.

²⁷Süthaisü vemai ahai sünou koa touso zholai, anou puhai tsüle hiolouzü do ashili choa alinou ali hi dachi paolai, ana puhai nou jüpa-a phouyu khesü ngaoloulai moe, daiolouzü apaokhai touyu akhai teile sü vemo hie.

²⁸Sairia hi veo sünou reih souyu hinou polouyu kini taoli pfüloua lahvei teidei hisü dakhai talai, ana puh nou Ramai vei maitao rathoyu zhai nasü souhawure donou tsücho talai. Puh sü lah sounü pfünüyu khesü soupfü loulai alia lahvei teidei hisü dakhai talai.

²⁹“Phazütou thaisü puhnou Ejipt vedei hisü reih souloupu khailai, ana haina vu hiolouzü raichoki bülai moe.

³⁰Daiolouzü Rom mainou puhye sü dzüluki hinou veloua reih zülai, alia puhsü ngaopia thaikhai ta-a bailai. “Süthaisü puhnou rarouloua Ramai vei maitaoye souhawure donou vah soutalai. Puhnou Ramai vei maitao rathoyu zhai hinou bulouhoa dakhai tayu maivei chi sü potalai.

³¹Puhvei reihmaiye panou tave Rathoki ae posheelayu buh sü souzhai khaiwulai, ae shokou meideia Ramai ye sheelayu zhai khesü souhawulai alia ngaorayu vakou maivei bashara ae rathoyu zhai sünou puletao nou pove khailoulai.

³²Do ashi hinou veo sünou lahvei rathoyu zhai thaokhaiwua dakhai tayu mai taoli vei soukha poloulai, ana Ramai chi züa buyu maitao nou puhye sü reih soua dulai.

³³Tsüveiyu süthai-apei maitao nou maitaoliye kaozü hinou doupeilai. Ana phazütou thaisü, puletao kamai-a nou khoche hinou thailai, kamai-a nou mei nou deithawulai, ae maitaoliye sü puletao vei nakhesü shaoloua hukhamai soua sapoa tawulai.

³⁴Puletao nou sübüa vea nou buyu phaki, Ramai vei maitao nou soukha doutu ngaoloulai, anou puletaoye soukhayu maitaoli hai lahvei kaozhou aveih ngaoloure donou soua bailai.

³⁵Tsüveiyu süthai-apei maitaoli ye sü southawulai, ana haibüyu vanou maikhe maiye souveipu peilai ae sousheepu peilai. Haibüa nou soukou laiyu hai Ramai nou akhai teile dade khaitouyu nasü koumo koute soulai.

³⁶“Sairia hi veo nou lah sounü pfünü khesü soupfü loulai. Puhnou khaophu soua rah jünoua puhnou dupu hie alia Khoukhoulai Ramai jünoua puhnou dupu hie tea lah puhye paolai. Puhnou haibüa savayu ae veia bukou laiyu hai, Ramai nou puhye tudee laiyu teile vemo koute puhnou bukou loulai. Ramai nou soure hai puhnou tsüchoda khaitouyu bütoua soupeilai.

³⁷Veo nou puhvei paipao maivei rah khesü ae naotumai nou jüpayu rah khesü ngaophou laimoe. Puhnou rah teiteiye sü ngaophou laimoe, daiolouzü puh sü lah puhye sütao teitei jünoua dupu hie tea choloulai.

³⁸Puhnou rah sükhe thaosü, nuh teidei khoyu rah, puhvei paipao mainou sükhai toumoyu rahye sü tsükhou talai, alia sana, shahu, chuh mutei, ae veishoyu sapeina khenou poa puhye sü tho talai.

³⁹Puhvei vedei vuloure donou puhnou vakou maivei rah kheye thoyu maitao soukha phou talai. Puhye adusona ae peikhowo tea popeiyu maiye sü puhnou tsükhou peilai, alia puletaoye sü maitaoli pei hi panou khoyu vahdubu peilai, ae sümaitaoye teidei sü buu phasoua dezhi peilai.

⁴⁰“Sairia hi veo vei teile akhai koumo jüve hi, Ejipt hi veo nou puh hi reih soukhelai, ana Sairia hi veo nou puhvei khouko teitei nou thouloua rüraipoyu büa rheiluki, rheipfüyu mai, ae dzüluki khesü pfüloua reih sü dulai, alia dzüdu veyu büa puhnou tyadei taoli hi reih sü huloulai.

⁴¹Puhnou Apaokhai touyu Teidei hia reih huloulai alia mai thethe sü puh bah hinou kaotalai, ana Edom ae Moab maivei teidei alia Ammon mai vei teidei matsütao hai puh bah hinou tupa loulai.

⁴²Puhnou tyadei haitao hi reih souveyu phaki, Ejipt maivei teidei hai-a puh bah hinou tureipa louhoe.

⁴³Puhnou Ejipt hi sana, shahu, ae muteiyu navei teitei hai potawulai. Alia puhnou Libia mai ae Sudan mai vei teidei-a ngaoloulai.

⁴⁴Süthaisü teinghi palova nou ae reilo vanou ko sü chouloua puh sü ngaopi talai, ae puhnou rarou sholoua reih sü soulai ae maitaoli ye southawulai.

⁴⁵Puhnou dushoyu puhvei sahpao sü zaidu ae sheeyu deichi kohinou soukhai loulai, ana mai ali koutea puhye soukha peire mai ha-a puhsü thaita bailai.”