Read Poumei Naga DANIEL 2 Bible Online

DANIEL 2 - Poumei Naga bible

DANIEL 2

¹Nebukhadnezzar nou vekoulouyu po ahai kousü puhnou me ali mue, alia me süna muyu donou puhsü levea shore ae zhithoulou hore.

²Südonou puhnou keingumai, kheikhupado sümai, keingumai ae hrürayu mai hrülaiye tave puhnou me muyu nasü daitouwe touyu paopeio tea kupoa ve-e. Puletao nou veo nghoujü hi tave lalouyu phaki,

³Veo nou puletao hisü paoe, “Enou me ali mue, ae me süna vei artha daitouwe touyu E sülou nüyu donou ale veare.”

⁴Puletao nou veo hisü Aram mai la hinou chila peie, “Oh veowo! Ne kilai Etao hi nevei me nasü paopeio, sütoulouzü Etao nou süna vei ko sü daitouwe touyu paolapa peilai.”

⁵Veo nou puletao hisü chila peie, “Enou haibüa maisou hisü paopawure: Neletao nou avei me ae süna vei artha paolapei more toulouzü, neletaoye sü souvava nou daodewulai, alia neletao vei ki-lu khesü soushi khaiwulai.

⁶Ana neletao nou avei me nasü paoloua ae sünasü daivanou mue touyu paolapa peilouzü, Enou neletaoye sapeina, buu ae kushoa tsükhou peiyu sü ngaolai. Südonou avei me ae süna vei artha sü ahi paopeio.”

⁷Puletao nou veo hisü paopue, “Oh veo aduwo, nevei me nasü Etao hi paopeio, sütoulouzü Etao nou ne hisü nevei me paolapa peilai.”

⁸Veo nou puletao hi chila peie, “Enou neletaoye soutaosou süwe, süolouzü neletao nou teile khothoupu loulai touwe, daiolouzü Enou paoyu na hai cheche vuzüre touyu neletao nou süloure:

⁹Süsü neletao nou me nasü ahi paopei more toulouzü neletao mai hrülaiye raibütoua Enou tudeelai. Neletao nou ahi da-a paolai tea bua baie, daiolouzü neletao nou teile sü data bailai tea tsüchowe. Südonou Enou muyu me nasü ahi paokhaio, ae süna vei artha sü daitouwe touyu E sünüwe.”

¹⁰Hasüyu maitao ae keinguyu maitao nou veo hisü chila peie, “Veo nou jüpa-a khoyu nasü paopei loure deiphao hi mai aliro hae. Dushoa buyu vemai ali koutea haibüyu hai puhvei teingumai, hasü hangaoyu mai hi noukhai toumo hie.

¹¹Veo nou nouyu hai tatei shore. Ramai nou paopeikhai deinou deiphao mainou veo vei me nasü paopeilou hoe, ae rah khesü deiphao mai hrohi hrümoe.”

¹²Haibüa paopei khaie, veo sü lekhasho loure alia Babilon hi hrüyu hasümai hrülaiye southawo tea kharochi peiwure.

¹³Südonou hasü hangaoyu mai hrülaiye sü southawo tea kharochi peiwure, sühisü Daniel alia puhvei samaitao-a louwe.

¹⁴Süthaisü Babilon hi hasümai hrülaiye southawo tea kharochi lüthou peikhai touyu veo vei reihmai peikhowo Ariok hi Daniel nou taho chilako aveih nou

¹⁵“Daisou nou haibüa khoushoyu chi hai veo nou souwe?” tea noue. Ariok nou Daniel hi daivanoue touyu sü paopeie.

¹⁶Daniel nou veo hi tave puhvei me nasü daivanoue touyu paopei loure donou teile thoupu peilaio tea kholoure.

¹⁷Süthaisü Daniel nou puh ki hi ve puhvei samaitao Hananiah, Mishael, ae Azariah hisü ko khesü paopeie.

¹⁸Puhnou samaitao hisü sülouho khupayu nasü rakibu Ramai hinou veachi paoa nouloumo louzü shire, sütoumo louzü puletao hai-a Babilon hi hasü-hangaoyu maitaoye koa hashu laire tea paoe.

¹⁹Süthaisü khupa sülouho nasü süzhou khei Daniel vei zho hinou ve ngaopeie. Süthaisü Daniel nou rakibu Ramai ye paoshowe:

²⁰“Ramai zhih sü teisa paosholo, Hasü ae khouko hai puh vei baie.

²¹Puhnou phateile sü souda peiwe, vemaiye popa pothou peiwe; Puhnou tsüvei mai hi tsüsü thoupeiwe, ae tsüsüyu mai hisü tsüdo peiwe.

²²Puhnou tateiyu ae sülou hoyu khesü süngao peiwe; teizhi hinou buyu khesü puhnou süwe, ae teiva sü puhye koa bue.

²³Enou neye khuhao-a kalo paowe, Oh E paipao vei Ramai; daiolouzü nenou Eye ratsü ae pfüchi sü peie, alia Etao nou veachi pao-a khoyu nasü ahi süngao peie, daiolouzü nenou ahi veo nou sülou nüyu nasü süngao peiwure.”

²⁴Babilon hi hasü hangaoyu mai hrülaiye southare donou veo nou dopa khaitouyu reihmai peikhowo Ariok hi Daniel nou ve paoe, “Babilon hi hasü hangaoyu maitaoye southa khaiso, Eye veo hi salou peio, Enou veo vei me nasü paopeilai alia süsü daivanoue touyu puh hi paolapa peilai.”

²⁵Süthaisü Ariok nou theashoa Daniel ye sü veo nghoujü hi salou peie, alia puhnou veo hisü haibüa paoe, “Judah teidei hinou nüpoa veyu maitao hrohinou veo vei me ae süsü daivanoue touyu paopeilou süyu mai ali Enou ngaoloua salaire.”

²⁶Veo nou Daniel (puhvei zhih kukhe ali hai Belteshazzar tea kuwe) hisü paoe, “Enou me muyu ae süna vei artha daitouwe touyu nenou paopeilou süwu?”

²⁷Daniel nou veo hi chila peie, “Hasüyu mai, khei-khupado sümai, teingumai, keingumai, moyuma pousouyu mai alinoua Oh Veowo, nenou paoyu nasü paopeilou hoe.

²⁸Ana khupayu tatei teitei süngao peiyu Ramai ali raki hinou bue, ae puhnou haithai daidai vepalai touyu Veo Nebukhadnezzar ne hi süngao peiwe. Enou nevei me ae nenou zhia buki zho ngaoyu nasü paopeilai, süsü haibüwe:

²⁹“Oh Veo, nenou züphao hinou züa buyu phaki, khupa sülouho süngao apeio nanou haithai daidai vepalai touyu hai ne hi süngao peiwe.

³⁰Sülou hoyu nasü ahi süngao peiyu hai, Enou mai kukhe jünou tsüveipuyu donou moe, ana sünasü daivanoue touyu veowo, neye panou douloure donou baie, ae nenou tsüchoa buyu nasü neye panou süloure donou baie.

³¹“Oh Veo, nenou maizhurai ali dushoa daokhai toua nevei zho hinou ngaoe. Maizhurai sünasü dushoe ae paivava nou ne nghoujü nou lakhai toue, ae süna hai zhuposhu ngaopi shoe.

³²Maizhurai süvei pei hai sana veikayu tyanou soukhai toue; khao ae baokao hai shahu nou soukhai toue;

³³Phi sü hu nou soukhai toue; alia phipha hai dahli hu nou ae dahli hai nai nou soukhaitoue.

³⁴Nenou sünaye zhua buyu phaki hinou, maili noua daimoyu chuh ali nou lukou hu ae nai koa hrüa nou soukhai touyu phi hisü deipei khaie maizhurai nasü peposa tare.

³⁵Süthaisü hu, nai, baosahu, shahu ae sana taosü posasa tare, alia teilüki chathaibu hinou thouba khesü teikhai nou hüpoa tayu büa hüsha takhaire. Ana maizhurai daokhai touyu neye khyaphoyu chuh nasü dulailaipa deichi adu ali büa deiphao teitei holoure.

³⁶“Nevei me nasü haikue. Chuo Enou sünavei artha sü daitouwe touyu Puo Veo, ne hisü paolapa peilai.

³⁷Vemai pei nou veo soua buyu Oh Puo Veo, rakibu Ramai nou neye vedei, khouko, pfüchi, mainou tsükhouyu alia kathe sü peie.

³⁸Puhnou deiphao teitei, rekhaona alia teihi raohou veishi neye panou khore donou ne bah hi thoupeie. Sana nou soukhai touyu pei nasü ne-e.

³⁹Nevei veo thailo hai ne jünou lülou hoyu vemai ali nou veo soulai, alia süthailo hai asü chena soua baosahu vei vedei nanou deiphao teitei khasa-a hrülai.

⁴⁰Süthaisü vedei adai chena sü hu büa khousholai, daiolouzü hu nou poa hali hala soupepo louyu büa vedei süna nou araitao vei veteidei teitei sü soupe souposasa khaiwulai.

⁴¹Nenou süthaisü phipha ae phitoutu khesü nai alia hu nou koa hrüa soukhaitoua ngaoe; süsü daitouwe toulouzü vedei süna hai ahai soua dadewulai. Ana sühisü nenou nai ae hu thouhrüa soukhai touyu sü ngaoyu büa vedei taoli hi hai hu büa khousholai.

⁴²Phipha ae phitoutu hisü nai ae hu nou thouhrüa soukhai touyu büa vedei sünasü füteidei taoli hi hai khoulai alia taoli hi hai khoulai moe.

⁴³Alia nenou hu ae nai koa nou thouhrüa soukhai touyu ngaoyu büa puletao hai alinou aliye shanghei souloua koa hrülai, ana hu ae nai koa hrülou shiyu büa puletao hai hrüloulai moe.

⁴⁴Vemai sütao nou nuh teidei khoa buyu phaki hinou, rakibu Ramai nou veteidei ali soushulai, alia sümaiye sü hasou kilia soushilou hoe, mokhaia mai kukhe nou veiloulai moe. Veteidei haina nou veteidei kukhe pfüphouye sü souhalai alia akhai soulai, ana vedei haina nou teisa vei soua bulai.

⁴⁵Deichi ali hinou chuh ali mai linoua daikhai toumoa kou hu, baosahu, nai, shahu ae sana nou soukhai touyu maizhurai nasü khyapesa khaitouyu nenou ngaoe. Oh Puo Veo, Ramai nou haithai daidai vepalai touyu ne hi süngao peiwe. Nenou me muyu alia süsü daitouwe touyu Enou ne hisü kaotou touyu hinou paopeiwure.”

⁴⁶Süthaisü Veo Nebukhadnezzar nou pei pfüna kouloua Danielye khurüe ae puhye kainüvei nou meideia posheela peio tea kharochi peie.

⁴⁷Veo nou Daniel hi paoe, “Nevei Ramai hai rah kukhe veishi jünou dukayu Ramaie alia vemaitao vei MAPAOe, ae sülouho khupayu khesü süngao peiyu Ramaie, daiolouzü nenou tatei shoyu ae khupa shoyu nasü paosüpa peiwure.”

⁴⁸Süthaisü veo nou Daniel ye tsükhou shopeie ae buu peie, alia puhye panou Babilon teidei teitei pei hi khore vahdubu thoupeiwure, ae Babilon hi hasü hangaoyu mai hrülai pei hi panou peikhowo sü soue.

⁴⁹Daniel nou veo hi khoyu thaifüa puhvei samai asütao - Shadrak, Meshak ae Abednego puletaoye panou Babilon teidei khore donou vahdubu thoupeiwure, ana Daniel louzü veo vei chikuyu ki hinou bua baie.