Read Poumei Naga DANIEL 3 Bible Online

DANIEL 3 - Poumei Naga bible

DANIEL 3

¹Veo Nebukhadnezzar nou mitar kainai sashoyu ae mitar asü phali jha duyu maizhurai ali sana nou souloua Babilon nuhteidei Dura tea kuyu deikho hisü sholakhai loure.

²Süthaisü puhnou puh khehinou buyu peikhomai hrülai, vemai nahpoutu hrülai, nuhteidei khoyu mai, kaozü zhua vah soupeire mai, kini pojüyu mai, chilou kupeiyu mai, alia puhvei vedei hinou peikhomai hrülaiye puhnou soukhai touyu maizhurai nasü sathoure donou veloukhai toupeio tea kharochi peie.

³Sana nou soukhai touyu maizhurai nasü sathoure donou buh sühisü peikhomai hrülai nou ve la-a bukhai loure.

⁴Süthaisü chi shayu mai ali nou haibüa shusoua chi sü shae, “Deiphao kainghou adai hinou hrüa buyu mai hrülai, tyahrü veishi ae la kukua paiyu mai hrülai, neletao hisü haibüa soulo tea kharochi peiwe:

⁵Neletao shabe, gaigu, lanabvü, khubvü alia poa lou souyu basei natao khosü nghoupayu pai choure toulouzü, veo Nebukhadnezzar nou sana nou soukhai touyu maizhurai naye pei pfüa nakou tholai.

⁶Mai tarali noua sünaye pei pfüa nakou thomoyu maiye sü thalasou mei hinou deithea bailai.”

⁷Südonou mai khemai nou shabe, gaigu, lanabvü, khubvü alia poa lou souyu basei natao khosü nghoupayu pai choulou khaie, mai hrülai nou pei pfüa nakou Veo Nebukhadnezzar nou sana nou soukhai touyu maizhurai nasü thoe.

⁸Haibüyu phateile hinou Babilon hi kamaia nou Jihudimaiye mah dukakhai peire zhoukao aveih nasü poloure.

⁹Puletao nou Veo Nebukhadnezzar hisü paoe, “Oh Veo, neye panou duso nasü soulou theo!

¹⁰Oh Puo Veo, nenou kharochi peiwure, süolouzü mai taralia nenou sana nou soukhai touyu maizhurai nasü shabe, gaigu, lanabvü, khubvü alia poa lou souyu basei natao khosü nghoupayu pai chouloure toulouzü pei pfüa nakou tholai,

¹¹alia mai taralia pei pfüa nakou thomoyu maiye sü mei deitoutou khaitouyu bvü hinou pothou deitheawulai tea kharochi peikhaitoue.

¹²Ana Puo Veo, nenou Babilon teidei hi panou kholai tea vahdubu thoupei khaitouyu Jihudimai - süolouzü Shadrak, Meshak ae Abednego mai haitao hai nenou kharochi peikhai touyu nasü zübare. Puletao hai nevei rah nasü thomoe ae nenou soukhai touyu maizhurai nasü pei pfüa nakou khurü moe.”

¹³Süthaisü Veo Nebukhadnezzar nou rarou sholoua Shadrak, Meshak ae Abednegoye sü puh hi saveo tea paore. Südonou puletaoye sü veo nghoujü hi sa-a vere.

¹⁴Veo nou puletao hisü noue, “Oh Shadrak, Meshak ae Abednego, neletao nou avei rahye thomoe alia Enou sana nou soukhai touyu maizhurai nasü khurü moe touyu chechewu?

¹⁵Chuo neletao nou shabe, gaigu, lanabvü, khubvü alia poa lou souyu basei natao khosü nghoupayu pai choure toulouzü neletao pei pfüa nakou maizhurai nasü thokhaio. Sübüa neletao nou pei pfüa nakou tho more toulouzü neletaoye sü mei hi laithou deithealai. Neletaoye abah hinou vupapei lousüyu rah kukhe bue tea neletao nou chowu?”

¹⁶Shadrak, Meshak ae Abednego nou Veo hisü chila peie, “Oh Puo Veo, haina vanou la Etaoye vupa loure ludu phoulai moe.

¹⁷Etao nou thoa buyu Ramai nanou Etaoye mei hinou ae ne bah hinou vupa peilai toulouzü vupapei shulai.

¹⁸Ana puhnou vupapei moyuma, Oh Puo Veo, Etao louzü nevei rahye tholai moe, alia nenou sana nou soukhai touyu maizhurai nasü khurükhailai moe.”

¹⁹Süthaisü Veo Nebukhadnezzar nou Shadrak, Meshak ae Abednego puletao pei hisü rarousho loure alia puh zhuh hai tyaku tare. Südonou puhnou meifü nasü raichoki jünou vu anai mei deithou soupulo tea kharochi peiwure.

²⁰Veo nou puhvei reihmaitao hrohinou khoukayu maitaoliye panou Shadrak, Meshak ae Abednego puletaoye sü rai nou phuloua meifü hisü laithouwo tea kharochi peiwure.

²¹Südonou puletaoye sü puletao nou banaoyu sabanü noupu rai phuloua meifü hisü laithoure.

²²Veo vei kharochi hai chishoyu donou ae mei deikhai touyu meifü nahai souleyu donou Shadark, Meshak ae Abednego puletaoye kaopokou meifü hi laithouyu maitaoye sü mei nou deitheawure.

²³Alia rai nou phumu khaitouyu Shadrak, Meshek ae Abednego puletao hai soushoyu meifü hisü deloure.

²⁴Süthaisü Veo Nebukhadnezzar nou khupashoa buh hinou lashu loure alia puhvei paodou apei maitao hisü noue, “Etao mai asü likhei rai nou phuloua meifü hisü laithou baimowu?” Puletao nou chila peie, “Ovai, Etao mai asü likhei meifü hisü laithoua baie.”

²⁵Veo nou paoe, “Neletao-a zhukhaio, Ewo mai adai meifü hinou rai phumoa ta-a buyu zhingaoe; ae puletao vasou hi mei taomoe, alia mai adai chena hai rakivamai büa bue.”

²⁶Süthaisü Veo Nebukhadnezzar nou meifü vei kikhu bomü hisü kouloua “Shadrak, Meshek ae Abednego, Khoukhoulai Ramai vei kilai maitao, neletao vakou tapalo” tea pai kushoa kue. Südonou puletao nou vakou tapa loure.

²⁷Süthaisü buh sühinou vejüa buyu vemai nahpoutu maitao, nuh teidei khoyu maitao ae vedei hi peikhomai hrülai nou puletao mai asütaoye mei nou deidei moyu shatya kou zhue. Puletao vasou hisü mei nou deiyu paomo deinou puletao vei peishupo ali koutea mei ramoe, alia puletao vei sabanüa mei deimoe ae puletao hisü meikhao kai-a ngimoe.

²⁸Veo Nebukhadnezzar nou paoe, “Rakivamaiye seive puhvei kilai maitaoye vupa peiyu Shadrak, Meshak ae Abednego Ramai ye paosholo! Puletao hai avei kharochi koutea züba-a ae rah kukhe liye thore jüo thaiyu koute ngaopi moa lah puletao vei Ramai ye thoa baie.

²⁹“Südonou chuo Enou tyahrü hrülai hi, mai hrülai hi ae la tyakukua paiyu mai veishi hisü kharochi haina peiwe, süolouzü mai tarali noua Shadrak, Meshak ae Abednego Ramai ye ngaophou moa paoshi louzü, puhye sü souvava nou daodesasa khaiwulai alia puhvei ki-lu khesü soushi khaiwulai, daiolouzü rah kukhe taralia haibüa khailupa peilou hoe.”

³⁰Süthaisü Veo nou Shadrak, Meshak ae Abednego puletaoye sü Babilon vedei hinou kupuyu vahdubu hi popa khaipeiwure.