Read Poumei Naga DANIEL 4 Bible Online

DANIEL 4 - Poumei Naga bible

DANIEL 4

¹Veo Nebukhadnezzar nou deiphao hinou hrüyu mai hrülai hi, tyahrü teitei hi ae la kukua paiyu maitya veishi hi haibüa chi paotae: “Neletao mai hrülai nou savayu sü soulou theo!

²Kukulai Ramai nou ahi khupa shoyu ngao-a buyu nasü neletao hi paosü ngaowe.

³“Puhvei khupayu hai daizhou koute dusa! Puhvei khupa vah hai daizhou koute khouko busa! Teisa puhnou veo sü soulai; ae puhnou mai khaphao teitei hisü khasa-a hrülai.

⁴“Veo Nebukhadnezzar E hai, avei vebuh hinou savashoa ae tounü sonü buche-e.

⁵Ana Enou zhia buyu phaki ngaopi shoyu me ali mue, alia süna vanou Eye sü daichosho baire.

⁶Südonou Babilon hi hrüa buyu hasü hangaoyu mai hrülaiye sü puletaoye panou avei me nasü daivanou mue touyu paolapa peire donou Enou ahi vewo tea kharochi peie.

⁷Süthaisü teingumai, khei khupado sümai, pouro soumai, ae keingumai hrülai sü tave-e, alia Enou puletao hi Enou me muyu nasü paongaoe, ana puletao mai aliro avei me nasü daivanoue touyu ahi paola peilou more.

⁸Süthaisü akhai khailai nasoua Daniel nou ahi taloue (Puh zhih hai avei rah na zhih raia Belteshazzar tea kuwe). Sheeyu Ramai vei rako hai puh hi bue, südonou Enou avei me nasü puh hi paoe:

⁹Oh Belteshazzar, teingumai, khei khupado sümai, pouro soumai, ae keingumai hrülai peikhowo, Sheeyu Ramai vei Rako sü ne hi bue touyu Enou süwe, ae sülouho khei khupayu hai-a neye donou tateiyu hae. Enou me muyu nasü haibüwe ae süsü daivanoue touyu ahi paopeio.

¹⁰“Enou zhia buyu phaki, ame kounou süübe dushoyu ali deiphao touchü hinou paopa-a ngaoe.

¹¹Süübe sünasü dulailai kulailai khe tei tsüre, alia deiphao hi hrüyu mai hrülai nou süübe sünasü zhingaoe.

¹²Sünavei sünghou khesü hüveishoe, ae deiphao mai hrülai toulousü rashithou sü shia bue. Rekhaona khenou sünavei teikhü hinou ve baia bue, alia raohou khesü sünavei botao hinou phe soua bue, ae hrikhaona hrülai nou sünavei rashithou sü haitoue.

¹³“Enou sünaye sü zhua tsüchoa buyu phaki, leikeia khoyu rakivamai ali hai raki vanou takouyu Enou zhingaoe.

¹⁴Puhnou pai chishoa haibüa shae: ‘Süübe nasü vikhao laiwo, bo khesü shaode khaio, sünghou khesü khourai laiwo, alia rashithou khesü porarou laikhaio. Hrikhaona khesü süna khu hinou hulaiwo ae raohou khesü sünavei botao hinou hulaio.

¹⁵Ana sünavei süümü nasü hurai nou phuloua deiphi hi khaikhaitouo, sübüa deiphi hinou buyu pounghou khesü koa panou buwo. “‘Puhye sü panou vidzü nou kou cha-a rekhaona ae pounghou koa hrüwo.

¹⁶Po anai koute puhye sü panou maivei tsü pfümoa rekhaona vei tsü pfüa hrülai.

¹⁷Haibüa nou chikude peiyu hai leikeia khoyu rakivamai nanoue, süsü daivanoue toulouzü Kukulai hi abuwo Ramai hai deiphao maivei vedei hia puhvei khouko bue, alia puhnou vedei nasü mai tarali hia peinüyu mai hisü peilou süe touyu deiphao mai hrülaiye panou süloulai.’

¹⁸“Veo Nebukhadnezzar, Enou me ali haibüa mue. Südonou chuo Belteshazzar, Enou me muyu nasü daivanoue touyu paolapa peikhaio, daiolouzü avei vedei hi hrüyu hasü hangaoyu mai hrülai hai avei me sü paolapa peilou hore, ana nenou paolapa peilou süe, daiolouzü Sheeyu Ramai vei Rako sü ne hi bue.”

¹⁹Süthaisü Belteshazzar tea kua buyu Daniel hai teile phazütou lihai khupa sholoua tsü hare. Veo nou Daniel hi paoe, “Belteshazzar, ne Enou me muyu na vanou mokhaia sünasü daivanoue touyu donou ngaopiso.” Belteshazzar nou chila peie, “Oh Apaopuwo, nevei me nahai neye donou moa nevei ngaoba maiye donou baie toulouzü daizhou koute veilaisa!

²⁰Nenou dushoyu ae kushoa khe rakiva deiyu süübe ali ngaoyu nasü deiphao mai hrülai nou zhive ngaokhai toulou süe.

²¹Süna vei sünghou hai hüvei shoe, hrikhaona hrülai nou toulou süyu rashithou tao-a bue, ae süübe süna vei khu khenou rekhaona baia bue alia botao hinou teihi raohou khenou phe soua bue.

²²“Oh Veowo, veishoa nou ae kushoa nou buyu süübe nasü neye paowe. Nevei aduso hai rakiva khetere, alia nenou khasa-a hrüyu hai teidei akhai hi koutede.

²³Nenou süübe sünaye zhua buyu phaki, rakiva nou rakivamai nou takou haibüa paoe, ‘Süübe nasü vikhao laiwo, ana sünavei bei hai deiphi hi khaipeio. Puhye sü panou vidzü kou cha-a ae rekhaona ae pounghou koa panou po anai koute hrüwo.’

²⁴“Oh Puo Veo, süsü daivanou paowe toulouzü, Kukulai hi Abuwo Ramai nou ne hi haithai daidai panou vepalai touyu süngao peiwe.

²⁵Süolouzü neye maisou hrohinou hulaiwulai, ae neye panou rekhaona taoye koa hrütalai; Kukulai hi Abuwo Ramai nou deiphao mai vedei pei hia khosa-a hrüwe alia puhnou vebuh sü peinüyu mai hi peiwe touyu nenou süloumo koute po anai hai neye panou chode ali büa poudai toulai, alia neye rakiva nou kouyu vidzü panou ne pfüphao sü koucha-a hrülai.

²⁶Rakivamai nanou süümü nasü hurai nou phuloua khaikhaitouo touyu hai, Ramai nou deiphao teitei hai tukha-a bue touyu nenou süloure toulouzü neye panou thaimoa nevei vedei nasü dakhai ne hi peilai.

²⁷Südonou, Oh Puo Veowo, Enou paoyu hai ne zülo. Mah sü soupuso, acheche vah sü soulo alia veaholai maiye zhuvea peio, sütoulouzü ne hai savapua hrüloulai.”

²⁸Haitao teitei hai Veo Nebukhadnezzar hi vete hote-e.

²⁹Khouh kiahai cheyu phaki, puhnou Babilon vei vemai fühao puhvei ki peitao hinou ta-a buyu phaki,

³⁰Puhnou haibüa paoe, “Haizhou koute veishoyu Babilon nuhdu hai, avei kathe ae khouko popa ngaore donou Enou soulou mowu?”

³¹Veo nou chipao haitao paoche loumo kinou raki vanou pai ali haibüa shakoue: “Oh Veo Nebukhadnezzar, nevei vedei hai ne hinou potawu laire.

³²Neye mai hrohinou hulaiwulai, alia rekhaona taoye koa panou sa-a hrülai, ae chode ali büa neye panou poudai toulai. Kukulai hi Abuwo Ramai nou deiphao maivei vedei teitei pei hi khasa-a bue alia puhnou vebuh sü peinüyu mai hi peia baiwe touyu nenou süloumo koute po anai hai nenou sübüa hrülai.”

³³Paokhai touyu chipao haitao hai Nebukhadnezzar hisü thashoa vepa chechere. Puhye mai hrohinou hulaiwure, alia chode ali büa panou pou toutare. Puhvei pfüphao hisü vidzü nou kouh shore, ae puhvei vasou hai lühche mai shoa mai chüpare, alia puhvei bahtsü nghoukao hai raohou vei phitsünghoukao shore.

³⁴“Po anai cheyu teithe zhousü, Nebukhadnezzar, Enou rakiva hi nghithou hepa zhue, alia avei tsü sü ahi dakhai veloue. Enou Kukulai hi Abuwo, teisa nou hria buyu Ramai ye tsükhoue ae Puhye paoshowe. Puhnou teisa adu-so nasü soua hrülai, alia puhvei vedei hai akhai touyu hae.

³⁵Puhye donou deiphao mai hai hazhotou lia moe; rakivamai ae deiphao mai hrülai hai puhvei khakhe hinou bue. Mai tarali nou puhye dulou hoe, mokhaia puhnou souyu vah khesü daivanou souwe tea noulou hoe.

³⁶“Avei tsü ahi dakhai veyu phaki, Eye tsükhouyu, khuhaoyu, kathe aveih ae avei vedei sü ahi dakhai peie. Avei peikhomaitao ae hasü hangaoyu maitao nou Eye dakhai popeie, alia avei vebuh sü raichoki jünoua dupua ae tsükhoupua Eye dakhai peie.

³⁷“Chuo, Nebukhadnezzar Veo, Enou Rakiva Veoye sü tsükhoua puhvei veisodu khesü paoshowe, daiolouzü puhnou souyu vah teitei hai kaoe, ae puhvei ludu nasü züe; alia khaophu soumaiye puhnou sounakou peilou süe.”