Read Poumei Naga DANIEL 9 Bible Online

DANIEL 9 - Poumei Naga bible

DANIEL 9

¹Mede maikhü hinou hrüveyu Xerxes (Ahasu-ers) nahpoutu Darius nou Babilon teidei hi veo soue.

²Puhnou vekoulouyu po araina hisü Daniel, Enou Sheeyu larübvü nasü phoua Jerusalem nuhdu nahai po rainai soushi khaiwulai tea MAPAO nou rachipaolawo Jeremiah hi paopei khaitouyu sü tsüchoa bue.

³Südonou Enou lousah banaolou, vonai nalou alia azhuh Ramai MAPAO hi pfürei veloua soutaosou lüh-a puh hi veachi paoe.

⁴Enou Ramai MAPAO hi avei maitao nou mah soukhai touyu khesü paopa-a veachi paoe, “Oh MAPAOwo, dushoyu ae khupa shoyu Ramai, newo vo soukhai touyu nahai veikhai timoe, alia neye leshiyu mai ae nenou zho lükhai touyu nahai soupfüa buyu mai hisü nevei tobai soumoyu leshi hai bue.

⁵“Etao nou mah sü soupfüwure, kaomo zümoyu khesü soupfüwure; alia nenou kharochi peikhai touyu khesü pfüthore ae zhaido aveih na hinou hrülou moa tarei tawure.

⁶Eletao vemai, vemai nahpoututao, Etao paipao, ae Etao teidei hi mai hrülai nou ne kilai, rachipaola-apei maitao nou ne chi paoyu khesü noupei bare.

⁷Oh MAPAO, newo louzü cheche-e, ana Etao louzü, Judah teidei hinou hrüyu mai-a, Jerusalem hinou hrüyu mai-a, alia Israel mai hrülai, buh holo hailo nou hrüa buyu nenou vah ashi ae mah souyu donou hulai rarou khaitouyu mai hrülai hai lah Etao pei hi veashoyu sü pove loua baie.

⁸Etao vemaitao, peikho maitao, alia paipao maitao nou haongu vah sü soupfüwure alia ne hisü mah souwure.

⁹Etao nou ne chi zümoa mahmo souyuma, Oh MAPAOwo, newo louzü maiye zhuvea süe alia khailupa peia baie.

¹⁰Oh MAPAO Eletao Ramai, Etao nou ne chi zümore alia nevei kilai rachipaola apei maitao nou chikha peiyu khesü tamore.

¹¹Israel mai hrülai nou ne chi zümoa chikha khesü pfüthowure alia tarei tare, alia nevei kilai Moses nou chikha rükhai peiyu hi chaa khesü lah Etao pei hi poveloua baie, daiolouzü Etao nou kaomo zümoyu mah sü souwure.

¹²Nenou Etao hi ae Etao peikho maitao hi soulai tea paoyu nasü nenou soupeie. Nenou Jerusalem pei hi tudee peiyu büa deiphao hi buyu nuhdu kukhe ali hiro tudee peimo hie.

¹³Moses vei chikha larübvü hi rüthoukhai touyu tudee laiyutao teitei hai Etaoye tudee peire, ana Etao hai kaomo zümoyu ae mahmo souyu hinou le daloua ne jüpa soure donou phoumoe, alia ne vei zhuvea nasü kholou moe, Oh MAPAO Ramaie.

¹⁴Südonou MAPAO Eletao vei Ramai puhnou tudee laiyu nasü soudaloua Etao pei hi pove peie, daiolouzü puhnou souyu vah teitei hai chechea baie, alia Etao nou puh pai sü keipei moe.

¹⁵“Ejipt teidei hinou nevei maitaoye nenou khupa soua sapa peiyu nasü, zhou koute ne zhih ngaimoa buyu Oh Ramai MAPAOwo, Etao nou mah sü souwure, Etao nou kaomo zümoyu khesü soupfüwure.

¹⁶Oh MAPAOwo, raichoki nenou Etaoye vupeiyu büa, nevei lekha rarou nasü nevei sheeyu deichi, nevei Jerusalem nuhdu hinou zhuvea nou polai peia baio; daiolouzü Etao vei mah ae Etao paipao maitao nou soukhai touyu mahtao donou Jerusalem alia nevei mai hrülaiye sü Eletao pehao hinou hrüa buyu tyahrütao vei zünü soua bure.

¹⁷Südonou chuo Oh Etao Ramai, ne kilai Enou veachi paoyu ae khoyu paisü kei peio, soushi khaitouyu nevei Rathoki nasü soushu dakhai peio, soushu dakhai peilouzü mai hrülai nou neye Ramaie tea süloulai.

¹⁸Oh avei Ramai, Eh vei veachi keipeio, Etao nou veayu sü zhupeio, alia Etaoye soushi khaitouyu ae ne zhih poa buyu nuhdu nasü zhupei khaio. Enou veachi paoyu hai ahi acheche buyu vanou moe, ana nevei zhuvea leshi vanou khoa baie.

¹⁹Oh MAPAOwo, Etao mah khaipeio. Oh MAPAOwo, Etao veachi keipeio. Oh MAPAOwo, zhuvea nou vah sü soushu peio! Mai hrülaiye panou neye Ramaie tea süloure donou zhuvea nou teile nasü pona peisou baio, daiolouzü nuhdu hainasü ae mai haitao hai nevei baie.”

²⁰Enou avei mah ae avei maitao Israel maivei mah paopa-a alia MAPAO Ramai hinou puhvei sheeyu Rathoki nasü soushu dakhai peire donou veachi paoe.

²¹Enou veachi paoa buyu phaki, raiki avei zho hinou ngaoyu rakivamai Gabriel nou koukhe posheelayu teile hinou ahi zhaove-e.

²²Puhnou ahi ve haibüa paoe, “Daniel, ne hi panou ratsü ae tsüsüyu peire donou E vewe.

²³Nenou Ramai hi veachi paota arai hinou, nenou khoyu nasü puhnou noupeiwure, alia süsü ne hi paopeire donou E vewe, daiolouzü Ramai nou neye leshie. Südonou chipao nasü tsücholo ae zho ngaoyu nasü sütou toulo:

²⁴“Ramai nou nevei maitao ae neletao vei sheeyu nuhdu nasü mah ae ashi hinou khailupa peire teile hai po anai nai nou rainai loulai hie. Mahmo khesü khailu peilai, ae teisa panou kaozü hinou hrüre donou soushu peilai, alia zho ngaoyu ae rachi paokhai touyu khesü panou vete peilai, alia sheeyu Rathoki nasü soushu dakhai peilai.

²⁵Haitao hai sülo: Jerusalem nuhdu nasü soushu dakhaire donou kharochi peire ae Ramai nou theadzü napei khaitouyu süthai apei maina vere hai po anai tyanou anai loulai hie. Jerusalem nuhdu nasü veishoyu maisou ludu ae khoushoyu reihbuh khe loua nou soushu dakhai loulai, alia süsü po rairoua ahai tyanou anai loulai, ana süpha teile hi veahoyu teile ali soulai.

²⁶Sübüyu teile akhai hisü kou Ramai nou dopei khaitouyu süthai apei naye sü mainou southawulai. Nuhdu ae Rathoki nasü khouko pfüshoa reih hulouyu veo nahpoutu nanou soushi khaiwulai. Akhai teithe hisü soureih souyu ae soushi peiyu hai dzüdu veyu büa veloulai.

²⁷Puhnou po anai lihai mai taoli hi khoushoyu vo ali thoulai, alia sübüyu teile dahli takouyu phaki, puhnou posheelayu khesü panou soumoa nukhai bailai. Ramai nou puhye donou souda khaitouyu teile akhai koumo koute puhnou Ngaopi Shoyu vakou maivei rah ae bashara khesü Rathoki hi pove khailai.”