Read Poumei Naga HOSEA 1 Bible Online

HOSEA 1 - Poumei Naga bible

HOSEA 1

¹MAPAO vei chipao hai Beeri nahpoutu Hosea hi Uzziah, Jotham, Ahaz alia Hezekiah nou Judah hi veo soua buki alia Joash nahpoutu Jereboam nou Israel mai hi veo soua buyu teile hinou veyu haitaoe.

²MAPAO nou raikai nasoua Hosea hi haibüa paoe, “Taho khakhayu naotumai aliye ne chapfü soure donou polouo alia khakhapfü hinou nahmai hrülo, daiolouzü teidei hainasü MAPAO ye thaoyu vanou shishoyu khakhapfü ali soutare.”

³Süvanou puhnou taho Diblaim nahnaotu Gomer ye naloue alia honapai nou pou pfüloua nahpoutu ali naloue.

⁴Alia MAPAO nou puh hi paoe, “Puh zhih hai Jezreel tea salo, daiolouzü phajütou thaisü Jezreel zhe kükouyu donou Enou Jehu kikhamai hi veayu peilai, alia Enou Israel maivei vedeisü panou khai souwulai.

⁵Süzhou teithe Enou Jezreel deikho hinou Israel mai vei voulou sü rashawulai.”

⁶Honapai nou poupfü puloue alia nahnaotu ali naloue. Süthaisü MAPAO nou puh hi paoe, “Puh zhih sü Loruhamah tea salo, daiolouzü Enou Israel maiye zhuveayu moa khaipeiyu bupulai moe.

⁷Ana Enou Judah kihikha maiye zhuvea peilai, alia puletao Ramai MAPAO Enou puletaoye vupa peilai; voulou, khoche, rhei, alia reihmaitao vanou Enou puletaoye vupeilai moe.”

⁸Puhnou Loruhamah ye nao phayu thai, poupfü puloue alia nahpoutu ali naloue.

⁹Süthaisü MAPAO nou paoe, “Puh zhih sü Lo-ammi tea salo, daiolouzü neletao hai Amai more alia E-a neletao vei Ramai more.”

¹⁰Ana Israel maitao hai teithe li zai hi vünai bülai, süzhou mai linoua puletao ye duloulai moe, mokhaia puletao hrüh chosha louho soulai; “Neletao hai Amai moe” tea paoyu thaosü, “Hriyu Ramai nah khemai” tea Enou puletao ye paolai.

¹¹Judah mai alia Israel maitao hai pove jüloulai, alia puletao vei peikhomai ali puletao nou dopa loulai, alia puletao nou teidei hi natao hai poloulai, daiolouzü Jezreel vei teithe nasü dusolai.