Read Poumei Naga HOSEA 10 Bible Online

HOSEA 10 - Poumei Naga bible

HOSEA 10

¹Israel mai haio shivei shoyu darkhabe ali büe. Puletao nou thou shipou pakhaie bashara ye thoyu buh sü soupou paloua baire; puletao vei teidei veipu pakhaie rah kukhe ye thoyu ki sü souvei pua baire.

²Puletao vei lüthou haio da-a baie; Chuo puletao nou mah souyu thaifüa vealaire. MAPAO nou puletao vei rathoyu ki taosü soushi wulai, alia puletao vei rathoyu buh sü souhawulai.

³Daiolouzü puletao nou haibüa paowe, “Etao hio vemai hae, daiolouzü Etao nou MAPAO ye pimoe, alia vemai nou Etaoye donou daie soupei lousüe?”

⁴Puletao nou kaozü moyu chipao sü paowe; dayu chaachou nou poa Vo sü souloua baiwe; südonou douhi pou-tsüpayu büa chikure sü pabaiwe.

⁵Bethaven hi buyu sana chode naye souhayu donou Samaria hi hrüa buyu mainou levea-a dopfülai. Bashara ye thoa buyu maitao alia napao maitao süna vanou alia sünavei kathe hayu donou choroa kralai.

⁶Bashara nasü Assaria vei veo adu naye kha peire donou potawulai, Israel maiye hrao soupeilai, alia puletao nou bashara ye thoyu donou hrao ngaolai.

⁷Dzünou dupfüa tayu süshei touli büa Samaria hi veo sü dupfüa ta bailai.

⁸Aven deichi hinou Israel mainou bashara ye thoa buyu ki nasü soushi wulai. Puletao nou poa sheelayu bu nasü raishu alia pouhou nou tsüpa phouloua bailai. Süthai puletao nou “Deichi, Etao ye kouh paolou-o, alia deitao, Etaoye paopeio” teanou paolai.

⁹Israel mainou mah souyu hai Gibeah teile hinou poa chu koute thaokhai tou moe; Gibeah reih hinou mah souyu mai hai ha-a bai mowu?

¹⁰Enou mah souyu mai haitao ye sü tudee souwulai, alia puletaoye sü souvea peilai; puletao ye dure donou tyahrü kukhe maiye save dzüloulai, alia puletao nou mah soupou leyu donou souveawulai.

¹¹Israel mai hai teile lihio shekhai touyu choha ali büa tah tanü showe, alia veishoa buyu puh ngu hisü Enou phaodao khai peimoe; ana chuo Enou puh te hisü phaodao thouloua sa-a nou vah khou souwu laire. Enou Judah maiye pa phou polai alia Israel maiye pa tah daolai.

¹²Acheche nasü neletao lah vuthoulo, tobai soumoa leshiyu nasü chilo; thoutai vuthou khaitouyu deisü shalo, daiolouzü chuki hai MAPAO ye phouyu teilere, sükulouzü puhnou ve neletao ye teirü büa ha sü peilai.

¹³Ana neletao nou mah thou sü vuthouwure, südonou kaozü moyu nanou chiloua bailai, neletao nou dayu shithou sü touloure. Daiolouzü neletao nou rheiluki alia reihmai pouyu nanou loucheloua baire.

¹⁴Südonou neletao hrohinou büroyu reih sü soupalai, alia neletao vei reihbu teitei hai souhawulai, Shalman mainou Betharbel maiye souhayu büa neletao hrülai ye sü souhakhai tiwulai.

¹⁵Haibüa neletao hia soupeilai, Oh Israel maitaore, daiolouzü neletao nou vah ashi khaikho nou soua baire. Reih soutare toulouzü neletao vemaiye sü souhawulai.