Read Poumei Naga JOEL 1 Bible Online

JOEL 1 - Poumei Naga bible

JOEL 1

¹Pithuel nahpoutu Joel hi MAPAO vei chipao haibüa ve-e:

²Hai choulo, nele tsümaitao, keilo, teidei haihi hrüa buyu mai hrülai! Neletao vei teile hi moa neletao vei puopao mai teile hi haibüyu vepa homoe?

³Haihai nele nahmaitao hia paokhaio, alia neletao nahmai panou puletao nahmai hi paopeio, alia puletao nahkhemai panou bonakha hi paopeio.

⁴Khazü haiki nou toushoyu khesü, khatsüku nou touloure, Khatsüku nou toushoyu taosü, rou khazü nou touloure, Khazü nou toushoyu haia, khaikhre nou touloure.

⁵Zhaoh shozhia buyu maitao, kaishulo, alia krakhaio; alia dopfü khaio, zhaoh shozhia buyu mai hrülai, daiolouzü zhaoh soure darkhashi sü neletao hinou polaiwure.

⁶Daiolouzü tyahrü kukhe nou A teidei hisü reih souvere, Puletao hai khouko pfüsho-e alia puletao hai chohao louho soue, Puh huh hai kipeikhaodu huh büe, alia hei veiyu hai kipeikhaodu huhnü büe.

⁷Puletao nou Etao vei darkhabe khesü souhare, alia doushibe khesü toukhai loure, Sükao-a tousha loure alia sübotao-a jüde laire.

⁸Khapu soulai tea nouto khaitouyu poutu thaiyu donou loupai nou dopfüa krayu büa dopfülou khaio.

⁹MAPAO vei ki hi touso na posheela khaitouyu khesü hare. MAPAO vei naanou soubuyu napao maitao sü levea dopfüa bure.

¹⁰Ludou khesü shitare, deisü dopfüre; daisounou tiyuo routhou sü souhare, zhaoh sü thetare, theadzü sü hatare.

¹¹Levea khaio, lutata-a laimaitao, dopfü khaio, darkha peida soulai maitao, daiolouzü southou, shithou alia dou hi chachi loure thou sü hare.

¹²Darkhabe khesü kitare, doushibe sü hatare. Vajüshithou, nghashi alia phoshi, ae ludou hi buyu süübe veishi nou kita khaire.

¹³Oh napao maitaore, soukousah banoulo alia dopfülou khaio, kouli likhaio, rathoyu ki hinou vah soua bumaitao! Rathoki hi veloua nou kheimathe dopfüa bulouo! Daiolouzü poa sheela laiyu thoudzü khesü Ramai vei ki hi hazhi toure.

¹⁴Maisou ye kuve jüloua tovai rei-a lüh khaio, tsükhemai alia teidei hai hi hrüa buyu mai hrülai nou Ramai MAPAO ki hi save jülouo, alia MAPAO hisü kra khokhaio.

¹⁵Iyaho! MAPAO vei teithe sü nghitei tire, Khoukhoulai MAPAO nou soushi souha laiyu teithe sü velaire.

¹⁶Etao vei nghingao hinou touso, alia savayu khesü Ramai vei ki hinou hatare mowu?

¹⁷Taimou khesü deikhe hinou maohare, na pojükhaiyu ki khesü hare; thoubao khesü shitare, daisounou tiyuo thou sü hare.

¹⁸Kikhaorütao hai-a choro-a rare! Heiphao hi poudai hayu donou chokhome sü veare; alia zhaotu khe-a veasho tare.

¹⁹Oh MAPAO, ne hi Enou kra-a khowe, daiolouzü rükou heiphao khesü meinou deiwure, alia dou hi süübe khesü meinou taokhaire.

²⁰Rekhaona koutea ne hi kra-a bure, daiolouzü reitou dzü khe-a thetare, alia heiphao teitei hai meinou dei khaiwure.