Read Poumei Naga JOEL 2 Bible Online

JOEL 2 - Poumei Naga bible

JOEL 2

¹Zion hinou shabe sü nghoukhaio; Sheeyu avei deichi hinou pai ra peikhaio! Deisühi hrüa buyu mai hrülaiye pa pingu theo, daiolouzü MAPAO vei teithesü velaire, haihai nghitei tire,

²maiyu alia zhiyu teithe, teihao chaoyu alia zhiteiyu teithe! Mai-zhi nou deichi sühao louyu büa reihmai sü pouso-a alia khouko buso-a velaire; sübüyu hai raiki pakhai mohie, mokhai-a bonakha hi koutea papulai moe.

³Puletao palo alia thailova tha ahai khei hisü meinou taoloure. Puletaoye donou teidei sü Eden kipei kuwe, ana puletao thaisü kiyu rekou ali soutare, alia halia sholou more.

⁴Puletao hai rhei zhai büre, alia pfüa reih souyu rhei kua puletao nou hukou-e.

⁵Rheiluki paikho büa, deichi peitaoh hisü chopare, rouvao meitao sou-a, reih soure donou khouko bushoyu reihmai kua laire.

⁶Puletao nghoujü hinou maikhe maisü levea bure, ae mai hrülai pah hisü zhu hazhi tare.

⁷Reih souveimai kua puletao nou hukouwe, puletao nou reihmai büa bouvo va taopawe. Puletao nou lahkuku vei bosü takouwe, puletao ludu hinou puhtao nou thaichü moe.

⁸Puletao alinou aliye khomoe, lili bo hinou tae; puhtao nou reih basei khesü souphe poloue, alia puletao ye halinoua nuchao loumoe.

⁹Puletao nou nuhdu hisü paloulou-e, puletao nou bouvo peiva hia tupaloue, puletao nou kipei hia taopa loulouwe, vaomai libüa vabomü khe hinou loulouwe.

¹⁰Puletao nghoujü nou deiphao sü ngure, ratei-a shire. Teinghei alia khouh sü zhitare, alia vu hai-a vamo tare.

¹¹MAPAO nou puh reih mai hisü paowe, Daizhou dusa puh reih mesü; puhvei kharochi zümai hai khouko pfüshoe. Cheche vuzünou, MAPAO vei teithe hai dushoe ae pishoe; hai thaonou healousü-e?

¹²MAPAO nou paoe, “Ana chukoute-a, ne lü teitei nou pei-a, lüh loua nou, alia kra-a dopfü lounou ahi dakhai velo;

¹³Nevei sabanü nou mo-a ne lethou nou ratholo.” Ne MAPAO Ramai hi dakhai velouo, daiolouzü puh hai zhuvea süyu alia leshi süyu Ramaie, puh hai shososou-a rarou baie, zhuvea sü-e alia ashi soumaiye souvea moa nou khaipeire donou phou-a bue.

¹⁴Puhnou dakhai ledaloua, alia neletao nou Ramai MAPAO hie tou-so sheela peikhai touyu hai shiha peia thaodai peiyu hai thaonou sülai?

¹⁵Zion hinou shabe sü nghou khaio; vuh ali lüh louo; maisouye sheetou tea save jüre donou kukhaio;

¹⁶maisouye save jülouo. Vejüa buyu maisouye sü sousheelo, tsümai taoye save jülo, nahmai-a save jülo, naonao buyu nahmai koutea save jülo. Nghisha soulai tea buyu na-a pa puh kisü thaowu-o, nghilai tea buyu napai-a pa puh buh sü thaowo.

¹⁷MAPAO vei napao maitao, alia puh vah souyu maitao ye pa rathoki bomü phi ae rashilayu buh kohinou kra-a panou paokhaio, “Oh MAPAOwo, nevei maitaoye vupeilaio, alia tyahrü khemai panou ngaora-a konüyu tyaonah soupeisouo. Daidonou puletao nou Etao ye haibüa paolai, ‘Puletao vei Ramai daiki bue?’ ”

¹⁸Süthai MAPAO nou puhvei teidei donou lenou peishulai alia puh maikhemai pei hi zhuvea peishulai. Ramai nou dei ye pa thoushi pulouyu

¹⁹MAPAO nou puh maitao hi chila peie, “Zhukhaio, Enou neletao hi touso alia theadzü seipeilai, alia neletao nou rukhalai; alia Enou nele tyahrü ye pa tyahrü kukhe hrohinou ngaorayu na hai pa soupu khailai moe.

²⁰Reikou soureih puonaye sü neletao hinou doushoa hulailai, alia hupoho deikiyu ae zhizhi-a buyu buh hisü khaiwulai, süpa hilao bumaiye sü teinghi palao zai hi hukou khailai, alia süthailao bumaiye sü teinghi loulo zai hi khaiwulai; puletao vei tangiyu kaisü ngipalai, daiolouzü Puhnou khupayu vah sü soupeie.

²¹“Oh dei taore! Ngaopi khaisouo, va salouo, daiolouzü MAPAO nou khupayu vah soupeire.

²²Rekhaona taore, ngaopi souo, daiolouzü rekou heiphao khesü daizhao-a bure; süübe khesü thoushi-a bure, doushi alia darkhabe hai-a shiveih sho-a shi bure.

²³“Asalo, Oh Zion hi buyu maitao, Ramai MAPAO hinou vasalo, daiolouzü Puhnou ka-teisha teirü sü seive zhi peire, daoraiki büa puhnou ka-hou teirü sü neletao nou khalousü rükouh peire.

²⁴Chathai khesü thou nou phoulai, Tei alia sülai khesü zhaoh alia theadzü nou phoulyalai.

²⁵Enou neletaoye dure donou seiveyu reihme: Khazü haiki, khatsüku, khaikhre alia khazü taonou toulouyu khesü Enou neletao hi dakhai peilai.

²⁶Neletao nou tounge touloulai alia khasho loulai, ae neletaoye donou khupa soupeiyu Ramai MAPAO ye paosholo. Alia amaitaoye hrao peipu khailai more.

²⁷Neletao nou süloulai süolouzü E hai Israel mai hrohinou bue tiyu, alia E hai neletao Ramai MAPAO-e, E moa nou rah kusü ali-a hae tiyu hai neletao nou süloulai. Süthai amaitaoye hrao peipu khailai more.

²⁸“Süsho phajü thaisü, Enou mai hrülai hi arako lakouh peilai; ne nahpoutu ae ne nahnaotu taonou rachi paolai, tsümai taonou me mulai, alia nahle mainou zho ngaolai.

²⁹Süzhou teithe Enou neletao vei kilai soua buyu nahpoutu ae nahnaotutao maitao hia arako lakou peilai.

³⁰“Enou rakiva ae deiphao hie khupayu vah soungaolai, zhe, mei ae meikhao büa nou soungaolai.

³¹MAPAO vei khupayu ae ngaopi shoyu teithe vemojü hio, teinghi sü zhitalai, alia khouh hai zhe datalai,

³²Süthai MAPAO zhih kuyu mai hrülai nou khailu louyu ngaoloulai; daiolouzü MAPAO nou paoyu thaifüa, vupalouyu maisü Zion deichi peiva ae Jerusalem hinou bulai, alia hria buyu mai hai MAPAO nou kulouyu maitao-e.”