Read Poumei Naga AMOS 2 Bible Online

AMOS 2 - Poumei Naga bible

AMOS 2

¹MAPAO nou paoe, “Moab mainou lü asü-dai soucho soulayu donou, puletaoye tudee laiyu nasü Enou polaiwu laimoe. Puletao hai Edom maitaoye ngaophou moa nou vemai khesü mei deithou vounai vipeire.

²Südonou Enou Moab maivei teidei hisü mei seikouh peilai, alia süsü panou Kerioth rokhubomü khesü deihawulai, ae Moab maiye sü panou pai shurao soua shayu alia shabe nghouyu hrohinou thai bailai.

³Enou Moab maiye khosa-a hrüyu alia peikhoyu mai hrülaiye sü southalai.”

⁴MAPAO nou paoe, “Judah mainou mah soukhai khaiyu donou, puletaoye souvea laiyu nasü Enou polaiwu laimoe; daiolouzü puletao nou MAPAO vei chikha nasü malaiwure alia puhvei kharochi khesü zümore, ana puletao paipaoye süthai mah tayu bashara nanou puletao ye süthai mah potare.

⁵Südonou Judah pei hi Enou mei seivalai, alia panou Jerusalem hi reihkhaobu khesü deihawulai.”

⁶MAPAO nou paoe, “Israel mainou lü asü dai soucholah-a mah souyu vanou, puletaoye souvea laiyu nasü Enou polaiwu laimoe; daiolouzü puletao nou acheche nasü shahu nou lealoure, alia touha-a vealaiyu maiye sü phikha pali nou zholoure.

⁷Puletao hai vealai mai ae lülouho maiye taina-a baire alia touha-souha laimaiye ludu hinou vakou khaopa pei-a baire; Puonah ahai khinou naotumai aliye sabu sazüa baire. Sübüa puletao nou sheeyu avei zhih sü soushiwure.

⁸Posheelayu buliki puletao hai paozho pfüyu mai vei sabanü nou poa züe, alia zho toulouyu pousha nou poa hrülouyu zhaoh nasü pove Ramai ki hinou shoe.

⁹“Ana Amaitaore, neletaoye donou Enou Amor maiye sü souha khaitou peie, puletao sah shoyu hai sedar süübe kue, alia chesüübe büa khoue; Enou puhvei pei hi rashithou ae khehi maa khesü souhapeie.

¹⁰Neletaoye Enou Ejipt teidei hinou sapa peie, alia panou Amor mai teidei poloure donou vaohro hinou po raidai süthai sa-a tapeie.

¹¹Enou neletao nahmai kamai-a panou rachipaola-apei mai soure donou alia kamai-a panou Nazir mai soure donou doloue. Oh Israel maitaore, süsü cheche mowu? tea MAPAO nou paoe.

¹²Ana neletao nou Nazir maiye sü panou zhoah sotare, alia rachipaola-apei maitaoye sü panou achi paobare.

¹³Südonou chuo Enou neletaoye sü rheiluki hi rouko thou phoutao peiyu phaki khopa-a nyakouhyu büa panou neletao-a veashoa nou khopa-a nyakouhlai.

¹⁴Tuvei shoyu mai-a tutalou laimoe, khoushoyu mai-a puletao vei khouko sü bupu laimoe, alia reihmai koutea lah puletao vei hrirai khailu palou laimoe.

¹⁵Reihlou povei mai-a lalou laimoe, alia tuvei shoyu mai-a tupalou laimoe, alia rhei pfüyu mai-a puletao vei hrirai khailu palou laimoe.

¹⁶Süzhou teithe hisü khuvei shoyu reihmai koutea puletao vei basei thaokhai-a baitou teanou tuta bailai,” tea MAPAO nou paoe.