Read Poumei Naga AMOS 3 Bible Online

AMOS 3 - Poumei Naga bible

AMOS 3

¹Oh Israel maitaore, Enou Ejipt teidei hinou sapa peiyu kihikha mai hrülai, MAPAO vei chipao haisü keilo,

²“Deiphao hi buyu tyahrü hrülai hrohinou, neye likhei Enou sü-a baie; südonou nenou soumah khaitouyu teitei donou Enou neye tudeelai.”

³Paolou moa nou mai ahai koa veidu tazholou veivu?

⁴Souveo linou hali-a daomoa vaohro hinou ra-a baiwu? Souveo teunou halia nülou moa nou puh buh hinou rakhaiwu?

⁵Rüh lia soukhai moa nou raohouye muloua baiwu? Hali noua daimoa rüh sü kapa khailaiwu?

⁶Reih vei shabe nghoupayu phaki, nuh hi buyu maikhe mai nou pimoa bulaiwu? MAPAO nou seive moa nou maikhe mai hi veahoyu sü ve khailaiwu?

⁷Rachi paola-apei mai hi süngao peikhai toumoa MAPAO Ramai hai haliro souwu moe.

⁸Souveo nou ra louzü, thao nou pimoa bulaige? MAPAO Ramai nou paolouzü, thao nou puh chi pao moa buloulai?

⁹Ejipt alia Ashdod vei reihkhaobu aveihtao khevai nou hrüa buyu maikhe mai hisü haibüa paopeio: “Samaria ye haopoa buyu deichi hinou ve jüloua sühi büroa choroshoa buyu alia sühinou mah souyu khesü zhukhaio.”

¹⁰MAPAO nou paoe, “Mai haitao hai puletao vei ki veih hisü maiye taidayu ae mai hinou saolouyu nanou pove phoutao khaitoua bubaie. Puletao hai kabüa kaozü vah sü soulai touyu hai sümoe.

¹¹Südonou ngaobamai ye panou puletao teidei sü sühao loulai, maiye duloure robomü khesü panou souhawulai, alia puletao vei reihkhobu khesü mainou pa saoloua bailai.”

¹²MAPAO nou paoe, “Zhaokhomai li nou souveo mü hinou phikao ahai moa nyou ali saopa louyu büa, Samaria hinou vashoa hrüa buyu Israel mai daotou likhei vupaloua bailai.

¹³Chuo keilou khaio, alia Jakob kihikha mai hisü rai-a paopu peikhaio,” teanou Khoukhoulai MAPAO nou paoe.

¹⁴“Israel mainou soucho layu vanou Enou tudee laiyu teithe hisü, Bethel hinou rathoyu buh khesü Enou souhawulai, alia rathoyu buh kai khesü daphekouh dei hi khaiwulai.

¹⁵Teisai vei ki ae teilü vei ki teanou soukhai touyu ki khesü Enou soushi souhawulai. Mutei shoa paongi nou soukhai touyu ki ae dushoa soukhai touyu ki khesü soushi souhawu bailai.”