Read Poumei Naga AMOS 4 Bible Online

AMOS 4 - Poumei Naga bible

AMOS 4

¹Bashan hi chokü büa toutu toupa hrüvei shoa khaitouyu Samaria hi naotu maitao, touha maiye souvea-a laiyu maitao, lülou homaiye soutai sounou peiyu maitao, alia cha khemai hi “Zhaoh solai pove khaio” tea paoyu naotu maitao, chipao haisü keilo.

²Ramai MAPAO hai sheeyu vanou haibüa chaachou souwure: “Neletao ye rai nou khipoa tayu teithe sü vevu zülaire: neletao hrülai hai kha büa khasü nou süpoa takhai toulai.

³Neletaoye sü süthai poakou kivo koyu hinou sülai pawulai,” tea MAPAO nou paoe.

⁴Khoukhoulai MAPAO nou paoe, “Oh Israel maitaore, Bethel vei sheeyu buhtao hi taho mah soukhaio; Gilgal hi taho mah sü eihtea soupu khaio, alia teithe asü zhou chü nevei zha kirou hinou zha ali nasü pove peikhaio.

⁵Khei thoumoyu raokhao nou kalo vei sheelayu nasü pove peikhaio, alia lah jüpa hinou sheelayu nasü maikhe mai hi shapao khaio; daiolouzü hai büa souyu nasü neletao nou jüpae.

⁶“Enou neletao vei nuhdu teitei hi sheeyu huh peie, alia neletao vei buh liki tokaayu sü seive peie, ana neletao nou ahi dakhai velou moe.

⁷Neletao chachi mojü khouh asü jünou Enou teirü sü panou rükou peimore, Enou teirü sü nuwure. Enou nuh ali hi teirü koupeie alia nuh ali hi panou rükou peimoe; dou ali pei hi rükou peie alia dou ali pei hi panou teirü koupei moa kitae.

⁸Südonou nuh hi hrüa buyu maitao nou dzü kere donou nuh kukhe li hi phou sühao tae, ana puletao nou reikha louyu ngaolou moe. Sübüa buyuma neletao nou ahi dakhai velou moe.

⁹“Enou neletao vei peida ae darkha kipei khesü teikhai teirüshi ae khanou pa kouh soushi peie; neletao vei doushibe ae oliv süübe khesü pa khazü nou touloue, sütoua buyuma neletao hai ahi dakhai vemoe.

¹⁰“Ejipt hi seiveyu zhaibüa Enou rahtahyu nasü neletao hrohi seive peie; Enou neletao vei nahlemai ye sü khoche nou daotha peie; Enou neletao vei rhei khesü souha peie; alia neletao nou chaoyu buhkhe hisü tangiyu kai hai Enou neletao nghou qulu hi panou kheloue, ana neletao nou ahi dakhai velou moe.

¹¹“Sodom ae Gomarah ye souhayu büa Enou neletao khamai-a souha peie, alia neletao hai mei hinou khaipa louyu meisüde kuwe, ana neletao hai ahi dakhaive moe” tea MAPAO nou paoe.

¹²“Südonou, Oh Israel maitaore, Enou neletaoye sü souvea talaire. Enou neletaoye souvea talaire südonou neletao Ramai ye daore donou soudalo, Oh Israel maitaore.”

¹³Daiolouzü zhukhaio, deichi soupeio, teikhai soupeio, thailaiyu Emai hi puhtsü süngao apeio, teizhi teiva sou-apeio, Puh hai deiphao kukulai hinou tawe. Puh zhih hai hrülai pei hi Ramai MAPAO touwe.