Read Poumei Naga JONAH 1 Bible Online

JONAH 1 - Poumei Naga bible

JONAH 1

¹MAPAO vei chipao sü Amittai nahpoutu Jonah hi ve haibüa paoe,

²“Tashulo alia taho Nineveh nuhdu hisü haibüa paokhaio; puletao nou vah ashi souyu haire Ahi vere teanou.”

³Ana Jonah nou MAPAO nghoujü nou tureipoa Tarshish hi tare. Puhnou Joppa hi kouhyu phaki Tarshish hi tayu dzüluki ali daoloue; südonou puhnou MAPAO hinou tarei taloure donou tayu mu peiwua puletao ye koa dzüluki hi tapalou loure.

⁴Ana MAPAO nou zai hisü teikhai teirü shishoyu seivere, südonou dzüluki sü talou shire.

⁵Süthaisü dzüluki hi buyu mai hrülai nou ngaopi shoa nou lahkuku vei rah hisü veachi paoe; alia panou dzüluki nasü thare donou sühi buyu nakhesü zai hi laithoure. Ana Jonah louzü dzüluki teikha hi louloua sühinou zhitare.

⁶Puh zhiyu ngaoloua nou dzüluki hi peikhowo nou puh hi paoe, “Ne daisou haihi nou zhia bue? Tashuloua nou ne rah hisü veachi paokhaio. Sükulouzü puhnou Etaoye hakare hinou khailu peishulai.”

⁷Dzüluki hi buyu taonou chuo alinou alihi haibüa paore, “Thao vanou haibüa Etao hi rako shiyu vewe touyu süloure donou rako zhulai she.” Sübüa nou souyu phaki, Jonah vei zhih sü pare.

⁸Süthaisü puletao nou puh hi noue, “Daivanou haibüa veayu hai etao hi vewe touyu paokhaio. Ne dai vah souwe? Ne daiki nou ve-e? Alia ne dai maie?”

⁹Puhnou puletao hi paoe, “E Hebrew maie; alia E hai teidei ae zaidu soupeiyu rakiva buyu Ramai MAPAO thoyu maie.”

¹⁰Süthaisü puhmaitao nou ngaopi shoa puh hisü noupue, “Ne dai vah souwure?” Daiolouzü puletao hisü puhnou paore, puh hai Ramai nghoujü nou tutayu mailie tiyu hai.

¹¹Süthaisü puletao nou puh hi paoe, “Zai dzü soukaonya loure donou Etao ne hi dai soulai? Daiolouzü teikhei teirü sü shipu khaikhai baire.”

¹²Puhnou puletao hisü paoe, “Eye kaopoloua zai dzü hi laithouo. Sükulouzü neletao ye donou zai dzü sü khaita bailai; daiolouzü Enou süwe teikhai teirü shiyu hai Ah donou baie.”

¹³Ana dzüluki pfümaitao nou dzüluki nasü deihi pfüpalai teanou te-e, ana teikhai teirü sü shipu lailai louyu vanou pfüpalou ho baire.

¹⁴Südonou puletao nou MAPAO hisü kra-a nou paoe, “Oh MAPAOwo, zhuvea nou mai haina hrü hai polouo, Etao ye souha peisouo, alia haina vei zhe sü panou etao pei hi kou peisouo, Oh MAPAO, hai teitei hai neye donou baie, Ne dosü soulouo.”

¹⁵Sübüa paowua puletao nou Jonah ye sü poloua zai hi laithouwure; süthai zai dzü sü nyatare.

¹⁶Süthaisü mai hrülai nou MAPAO ye ngaopi shore, alia puletao nou MAPAO ye posheelaye alia puh vah soulai teanou chaachou soue.

¹⁷Süthai MAPAO nou Jonah ye panou yaoloure donou khah aduli souda khai peie; Jonah hai khahpou khevai nou hea asü alia khei asü bue.