Read Poumei Naga JONAH 2 Bible Online

JONAH 2 - Poumei Naga bible

JONAH 2

¹Süthaisü Jonah nou puhvei MAPAO Ramai hi khahpou khevai nou veachi haibüa paoe,

²“E veahoa buki MAPAO hisü veachi paoa nou khoe, Enou khoyu veachi sü puhnou keipeie; Rabedushao teikhai hinou Enou kra nou khoe, alia sühi koutea Puhnou Apai sü keipeie.

³Daiolouzü Puhnou Eye zai thou hisü laithouwure, zai touchü hisü laithouwure, alia zai dzü sünou Eye sühao loure; Apehao teitei hisü dzünou sühao khailoure.

⁴Süthai Enou paoe, ‘Eye sü ne nghoujü nou polaire; chuo kabüa nou nevei rathoki nasü ngaopu khailou laige?’

⁵Dzünou Eye sü holoure, thoushoyu zai dzünou Eye sühao loure, zai hi pouhou taonou Apei hisü holoure.

⁶Deichi phikhai hi delouyuma, deinou Eye belouyuma, Nenou Eye sü dei kaorao thou hinou popa peie, Oh MAPAO A Ramai.

⁷E veahoa zhitalai touyu phaki, Enou MAPAO ye licholoue; Enou Nehi veachi paoa khoyu phaki, Avei veachi sü Nenou keipeie.

⁸Hamako hinou bashara ye thoyu mainou puletao vei acheche nasü thaore.

⁹Ana avei kaloyu paisüla noupu Neye poa sheela peie. Enou paokhai touyu nasü souche peilai. Khailu peiyu nasü MAPAO likhei baie!”

¹⁰Süthai MAPAO nou khah hisü Jonah ye zai pe hinou pa rüpapeio teanou kharochi peie, sübüa nou khah nou puhye sü zai pe hi pa rüpa khaipeie.