Read Poumei Naga MAIPEI PHOUYU 10 Bible Online

MAIPEI PHOUYU 10 - Poumei Naga bible

MAIPEI PHOUYU 10

¹MAPAO nou Moses hi paoe,

²“Shahu nou shabe ahai soulo; süsü poa neletao nou Israel maisou kuve jülaiyu phaki ae fühao hraloua talaiyu phaki panou nghou peilai.

³Shabe ahai khinou kho shohshoa nghou louzü, Enou buyu Sahpao nghoujü hinou Israel mai hrülai hai tave jüloulai.

⁴Ana shabe ali nghoua bailouzü, khü khü hi süthai-apei maitao likhei ne hisü tave-a bailai.

⁵Shabe kho hai jüa nou nghoupei louzü, teinghei palova nou fühao soua buyu khütao nou tashu talai.

⁶Shabe kho ahai chenasoua nghoupei louzü khelova nou fühao soua buyu khütao nou tashu talai. Südonou shabe kho hai jüa nou nghoupei louzü fühao hrapoa nou talai,

⁷ana Israel maisouye kuve jülai toulouzü shabe kho hai sho-a nou nghou peilai.

⁸Shabe hai Aaron nahpoutu maitao, napao maitao nou nghoua bailai. “Zhai haitao hai teisa nou talai.

⁹Lah neletao vei teidei hinou lah neletaoye vuloure donou ngaoba maiye soureih soulouzü, reihbu hinou shabe hai nasü nghoupei khaio. Neletao vei Ramai MAPAO Enou neletaoye tave soukha peilai ae ngaobayu maitao bah hinou neletaoye vupa peilai.

¹⁰Neletao nou asah soua khonüh nüyu phaki, neletao nou meidei-a posheela peiyu phaki, ae neletao nou chavei lathao-a buloure vei posheela hai posheela peiyu phaki, shabe hai nasü nghoukhaio. Süthaisü Enou tave neletaoye soukha peilai. E hai nelatao vei Ramai MAPAO-e.”

¹¹Israel mainou Ejipt hinou tapa louyu po ahai navei khouh ahai vei khoukha kai zhou MAPAO nou Sahpao pei hinou buyu teihao hai panou patare,

¹²ae Israel mainou Sinai radeiki sü thaowua tapoa nou tare. Teihao sünou Paran vaohro hinou kou chaore.

¹³MAPAO nou Moses hi kharochi peiyu thaifüa puletao nou tapoa nou tare,

¹⁴ae puletao nou tayu chüsü, paopeiyu thaifüa puletao nou ta-e. Judah vei khü hi louyu maime nanou raikasoua talai ae puletao vei maime nahai Amminadab nahpoutu Nabshon nou peikhowo soua sata peie.

¹⁵Issakar maitao vei me hisü Zuar nahpoutu Nethanel nou peikhowo soua satapeie,

¹⁶ae Zebulun maitao vei maime nahisü Helon nahpoutu Eliab nou peikhowo soua sata peie.

¹⁷Süthaisü Sahpao hai hrakouloua Gershon ae Merari maitao nou sünasü kaopoa nou talai.

¹⁸Süthai hai Reuben vei khü hi buyu maime nanou tapalai ae puletaoye Shedeur nahpoutu Elizur nou süthaisa-a talai.

¹⁹Zurishaddai nahpoutu Shelumiel nou Simeon khü hi louyu maime nahisü süthai-apei hai soue,

²⁰ae Gad khü vei süthai-apeio hai Deuel nahpoutu Eliasaph nou soue.

²¹Süthaisü Levi khü hinou Kohath maitao nou sheeyu natao hai poloua nou talai. Puletao nou fühao soua bure buh hisü koulouyu phaki Sahpao nahai soushupuloua nou bulai.

²²Süthai hai Ephraim vei khü hi louyu maime nanou tashupoa nou talai, ae Ammihud nahpoutu Elishama nou puletao vei süthai-apeio sü soua satalai.

²³Pedahzur nahpoutu Gamaliel nou Manesseh vei khü hi süthai-apeio sü soue,

²⁴ae Gideoni nahpoutu Abidan nou Benjamin khü vei süthai-apeio sü soue.

²⁵Akhai soua thailo nou maime teiteiye reihkhao soure donou Dan maivei maime nanou tashu talai. Puletao vei peikhowo hai Ammishaddai nahpoutu Ahiezer nou soue.

²⁶Okhran nahpoutu Pagiel nou Asher khü vei peikhowo sü soue,

²⁷ae Naphtali khü vei süthai-apeio hai Enan nahpoutu Ahira nou soue.

²⁸Israel mainou puletao vei fühao thaokhaiwua füsho tare chüsü, haibüa maimeme nou soua talai.

²⁹Moses nou puh mo Midia puona Jethro nahpoutu Hobab hi haibüa paoe, “MAPAO nou Etaoye peilai tea paokhai touyu teidei hisü tare donou Etao hai chuo tashu talaire. MAPAO nou Israel maiye haveih soupeilai tea paopei khaitoue, südonou Etaoye koa ta-a baishe, Etao vei kini khesü ne-a zha zhipeilai.”

³⁰Hobab nou chila peie, “E talai moe, E lah avei teidei hisü dakhai talaire.”

³¹Moses nou paoe, “Etaoye zhuvea nou thaowua tapeiso, daiolouzü rekou vaohro hi kabüa fühao soua bulai touyu hai nenou süwe, ae nenou Etao vei paodou-apeio sü soua sata peio.

³²Nenou Etaoye koa sata peilouzü, MAPAO nou Etao hi ha peiyu teitei sü neye zha zhipeilai.”

³³Maikhe mainou sheeyu Sinai deichi nasü thaowua tapayu phaki, puletao hai teithe asü ta-e. MAPAO vei Vo Sübvü nasü puletao jünou rai-a takou tewe, ae buh daikinou fühao soua bulai touyu sü phoutawe.

³⁴Puletao nou fühao ali thaokhaiwua fühao ali hi kouyu phaki, MAPAO vei teihao nanou puletao vei pei hinou hea teile hi bupeie.

³⁵Vo Sübvü nasü kaopoa tayu chüsü Moses nou haibüa paoe, “Oh MAPAOwo tashulo, neye ngaobayu maiye sü soupho rarou laipeio, ae neye ngaorayu maiye sü ne vei nghoujü hinou pa tuta-o!”

³⁶Alia Vo Sübvü nahai chaoyu chüsü puhnou haibüa paoe, “Oh MAPAOwo, Israel mai thethe buyu hisü dakhai ve peio.”