Read Poumei Naga MAIPEI PHOUYU 11 Bible Online

MAIPEI PHOUYU 11 - Poumei Naga bible

MAIPEI PHOUYU 11

¹Maikhe mainou veahoyu sü ve daokhai-e, puletao nou veahoa MAPAO pei hi raore. MAPAO nou sükhesü chouloua rarou shore ae puhnou maikhe mai hi mei sü seive peie ae mei nou puletao vei fühao kainghou alilova hai deihawure.

²Maikhe mainou kra-a Moses hinou soukha sü kho-e ae puhnou MAPAO hi veachi paoa khoyu donou mei sü nghitare.

³Südonou buh sünasü Taberah (Mei taoyu) tea kuwe, daiolouzü buh sühinou MAPAO vei mei nou puletao hrohinou taopare.

⁴Shetumai kamai-a nou Israel maiye koa nou tawe, puletao nou sou hai tounü sholoure alia Israel mai-a haibüa nou noulealea loure, “Sou tounü lere.”

⁵Etao nou Ejipt hio halia phamoa kha hai tounü toua baiwe. Mata, hao, shaoro, khimairei ae shinamara khesü licho khaio?

⁶Ana chuo Etao vei khouko hai hazhi toure. Toure halia hazhi toure— halia toure hazhi toure, ana teithechü hai manna likhei nou toua baire.

⁷(Manna hai marashithou raiwe, ae kaathou vavawe.

⁸Haina hai khei teile hinou vidzü sa-a kouwe. Thainesho shona hai maikhe mainou kolouwe, ae deithou sou büa souloua nou khotouwe alia raokhao khaotouwe. Haina hai oliv theadzü nou koa raokhao soukhai touyu büa touvei-e.)

¹⁰Puletao vei ki veishi hinou maikhe mainou vamoa nolealeayu sü Moses nou chouloure. Puh hai vamore, daiolouzü MAPAO nou puletao hi rarou loure,

¹¹ae puhnou MAPAO hi paoe, “Ne kilai Eye daisounou haibüa souveawe? Ne daisounou Eye dzüphiwe? Ne daisounou mai haitao hrülaiye zhure vah sü ahi peiwe?

¹²Enou mai haitao sü soupei moe, moa nalou moe. Ana daisounou mai haitaoye nenou peilai tea puletao vei puopaoh hi paopei khaitouyu teidei hi Eye panou nah naonaoyu pfü ali büa Eye panou bah hinou daopfü poa tawo touvu?

¹³Mai haitao nou toulou süyu sou sü E daikinou ngaoloulai? Puletao nou tobai soumoa sou peio tea ahinou kho-a bure.

¹⁴E lah likhei mai haitaoye zhulou hore, haisü Eye donou pfülou hore.

¹⁵Nenou Eye haibüa soupeilai toulouzü, zhuvea-a Eye southa peio, sükulouzü nevei zhai ashi nasü Enou ngaopu moa thai-a bailai.”

¹⁶MAPAO nou Moses hi paoe, “Israel mai hrohinou tsümai, süthai-apei mai rainai hai Enou buyu Sahpao hisü kupove jülo ae puletaoye ne pe hinou lalo tea paopeio.

¹⁷Enou buh sühinou neye takou kealai, ae Enou neye peikhai touyu rako daotu hai ne hinou popaloua puletao hisü peilai. Süthaisü mai sütao nou maikhe maiye zhure vah khesü neye soukha peilai ae ne likhei koupo nasü pfüpulai moe.

¹⁸Chuo maikhe mai hi haibüa paopeio, ‘Dosho neletao nou sou sü toulaire, südonou neletao hai lahkuku soushee-a bulo. Neletao nou nolealeayu, sou tounüwe tea raoyu ae Ejipt hinou buyua veipure tea raoyu sü MAPAO nou chouloure. Chuo MAPAO nou neletaoye sü sou peilaire, ae neletao nou sou sü toulaire.

¹⁹Neletao nou sou sü teithe ali, moa ahai, moa teithe angou moa teithe kirou, moyuma teithe kai likhei toua bailai moe,

²⁰ana khouh sasasü neletaoye panou mü hi khetemo koute hai sou sü panou toulai. Daiolouzü neletao nou MAPAO ye sü malaiwure ae Ejipt teidei hinou buyu nanou veipu hia tea raode.’ ”

²¹Moses nou MAPAO hi paoe, “Enou salaiyu mai hai 600,000 bue ae kabüa nenou puletaoye khouh ali koute hai toulou süyu sou sü peilai touwe?

²²Puletao nou khalou süyu kikhaorü ae zhaotu khesü daikinou poloua datha peilai? Zai hi kha veishi hai hüloua peiyuma puletaoye donou khalou süvu?”

²³MAPAO nou chila peie, “Eye donou dai-e soulou hoyu bue? Enou paoyu avei chipao hai vete laiho vetelai moyu sü nenou thasho-a nou ngaolai!”

²⁴Südonou Moses nou vakou tapaloua MAPAO nou paoyu khesü maikhe mai hi paopeie. Puhnou süthai-apei mai rainai hai save jüloure ae Sahpao sü panou sühao loure.

²⁵Süthaisü MAPAO nou teihao hinou takouloua Moses ye cha-e. Puhnou Moses hi peikhai touyu rako chitya hai poloua süthai-apei mai rainai hisü peie. Rako sünou puletao hi velouyu phaki, puletao hai rachipaola peiyu mai büa raopare, ana teile sho-a nou puletao hisü bumoe.

²⁶Süthai-apei mai rainai hinou mai ahai, Eldad ae Medad hai Sahpao hisü velou moa fühao hinou bue. Puhai hisü rako sünou veloure ae puhai hai rachipaola peiyu mai büa raopare.

²⁷Nahlemai ali nou tuho Moses hisü Eldad ae Medad nou soua buyu vah haso sü paopeie.

²⁸Süthaisü nahle-a bukinou Moses ye soukha-apeio, Nun nahpoutu Joshua nou Moses hi paoe, “Apaopuwo, puhaiye sü panou paopu khaiso!”

²⁹Moses nou chila peie, “Ne Eye donou puhaiye ngaoraivu? MAPAO nou puhvei rako hai puhvei mai hrülai hi thoupeiwua puletao hai rachipaola peiyu mai büa buyu sü Enou jüpa-e!”

³⁰Süthaisü Moses alia Israel maivei süthai-apei mai rainaitao hai lah puletao vei fühao hisü vetare.

³¹Teile sübü hinou MAPAO nou teikhai sü seive panou zai hinou buyu rehou khesü hüpoa vepeie. Rehou taonou deiphi nghinono poa nou zhaopoa nou ve fühao hi ae fühao kainghou teitei hisü kilomitar ali la-a phoutao loure.

³²Südonou maikhe mai hai hea-khei soumoa nou rehou hai da-a nüa nou bure; mai ali nou pojü louyu hai sühcho theli khe loumoa pojüloue. Puletao vei fühao pe teitei hisü puletao nou rehou hai southa loua nou phukire.

³³Puletao nou toure sou hai alao soumoa buyu teile hinou MAPAO nou lekha loua puletao hisü rahta rahvu hai seive peire.

³⁴Buh süna zhih hai Kibroth Hahaavah (Sünavei qo hai “Tounü Sonüyu vei Khüh”) tea sapeie, daiolouzü sou tounüa thaiyu maitao vei thaiphao hai buh sühinou vupeie.

³⁵Buh sühinou maikhe mainou Hazeroth touyu buh hisü ho fühao soua bue.