Read Poumei Naga MAIPEI PHOUYU 12 Bible Online

MAIPEI PHOUYU 12 - Poumei Naga bible

MAIPEI PHOUYU 12

¹Moses nou Kush maipfü nayu donou Miriam ae Aaron nou puhye sü paoshire.

²Puhai nou haibüa paoe, “MAPAO nou Moses hi likhei cha-a baiwu? Puhnou ahai hia kea movu?” Puhai nou raoyu sü MAPAO nou chouloure.

³(Deiphao hi Moses büa tainouyu mai kukhe ali-a ha-e.)

⁴Lichokhai timoa buyu teile hinou MAPAO nou Moses, Aaron ae Mariam hi paoe, “Neletao mai asü nou Sahpao hi veyu hai Enou jüpawe.” Puletao nou Sahpao hisü vere,

⁵ae MAPAO nou teihao deka hinou Sahpao vei bomü hisü kouloure ae “Aaron! Mariam!” tea kuloure. Puhai nou nghoujülo takou loure,

⁶ae MAPAO nou haibüa paoe, “Chuo Enou paore achi sü keilo! Neletao hi buyu rachipaola peiyu maitao hisü Enou zho kounou ngao-a baiwe ae puletao hisü zhiho mekou hinou Enou kea-a baiwe.

⁷Ana Enou avei kilai Moses hisü tyakua nou chawe; avei Israel mai hrülaiye sü puhye panou khore donou puh bah hi Enou khouko sü thaothou peikhai toue.

⁸Südonou Enou puhye sü zhuhaohao nou ve cha peie, nada nou chamoa puhye Enou dukhya nou keawe; puhnou avei khao-zhai hai ngaore! Nehai nou avei kilai Moses ye paoshiyu sü ngaopi mowu?”

⁹MAPAO nou puhai pei sü rarou loure ae puhnou ratayu thai,

¹⁰teihao nou Sahpao hinou patayu thaibü, Miriam vasü loukhaora taoloua puhvei vasou veishi hai vüra büa kaapha toure. Aaron nou Miriam ye zhuyu phaki, Miriam hai loukhaora soua nou ngaoloure.

¹¹Aaron nou Moses hi paoe, “Oh apaopuwo, ahai nou tsüche moa nou mah soukhai touyu donou haibüa panou veahoyu sü ngaosho.

¹²Honapaiye panou thaiyu mai ali büa vasou dalilo hai hanou touloua pfü pou hinou nakouyu mai ali büa soupeiso.”

¹³Südonou Moses nou kra-a MAPAO hi paoe, “Oh Ramai, honapaiye sü souvei peio!”

¹⁴MAPAO nou haibüa chila peie, “Honapai pah hi hakinou puh puo nou taidzü süsho peilouzü, honapai hai teithe anai koute hraongu pfüa bulai movu? Honapaiye panou fühao vei vakou sapaloua teithe anai koute bukhaio ae süthai nou honapaiye sü fühao hi sa-a dakhai velo.”

¹⁵Miriam ye sü vakou sapaloua teithe anai hai bekhaiwure ae puhye fühao hi sa-a dakhai vemo koute hai maikhe mainou tamoe.

¹⁶Süthaisü puletao nou Hazeroth thaowua tapoa nou Paran vei vaohro hisü velou fühao soua buloure.