Read Poumei Naga MAIPEI PHOUYU 13 Bible Online

MAIPEI PHOUYU 13 - Poumei Naga bible

MAIPEI PHOUYU 13

¹MAPAO nou Moses hi paoe,

²“Israel maivei khü kiahai buyu hinou süthai-apei mai chekhei hai dopalo ae puletaoye sü panou Kanaan teidei hai kabüa busa touyu reikei poloure donou seita-o.”

³Moses nou paochi züa Paran vaohro hinou süthai-apei mai haitao hai seita-e: [Khü] — [Süthai-apeio] Reuben — Zakkur nahpoutu Shammua Simeon — Hori nahpoutu Shaphat Judah — Jephunneh nahpoutu Kaleb Issakhar — Josef nahpoutu Igal Ephraim — Nun nahpoutu Hoshea Benjamin — Raphu nahpoutu Palti Zebulun — Sodi nahpoutu Gaddiel Manasseh — Susi nahpoutu Gaddi Dan — Gemalli nahpoutu Ammiel Asher — Mikhael nahpoutu Sethur Naphtali — Vophsi nahpoutu Nahbi Gad — Makhi nahpoutu Geuel

¹⁶Moses nou mai haitao hai panou rai-a taho teidei zhure donou seita-e. Puhnou Nun nahpoutu Hoshea zhih hai Joshua tea nou sada peie.

¹⁷Moses nou puletaoye seitayu phaki, haibüa paopeie, “Neletao hai hinou reilova takhe loua nou Kanaan maivei teidei khelova hisü palo ae süthaisü deichi hinou buyu nuhtao hisü khelo.

¹⁸Teidei sü kabüa bue touyu hai zhulo, ae teidei sühi mai kazhou bue alia sühi hrüyu maikhe mai hai daizhou koute khouko bue touyu khesü phoupalo.

¹⁹Teidei hai veiho shi-e touyu phoupalo, ae maikhe mai nou hrüyu nuh khesü kaopo pohao khaitoua hrüho hrümoe touyu khesü zhulo.

²⁰Puletao vei füdei hai kabüa bue alia vaosüü hrüho hrümoe touyu sü zhulo. Alia neletao nou dakhai veyu phaki, sühinou rashithou shiyu khesü daotu poa nou vewo.” Teile süphaki darkha shithou meipayu teile-e.

²¹Südonou puletao nou reilova nou tapoa teidei sü khelova buyu Zin vaohro hinou reilova Hamath hi louyu ludu nghia buyu Rehob hi khete hai zhuta-e.

²²Puletao nou raikaisoua khelo nou buyu teidei sü zhuta-e, ae süthaisü puletao nou Hebron touyu teidei nasü zhue. Teidei sühi hai Ahiman, Sheshai ae Talmai mainou hrüwe, alia mai dushoyu maitya Anakim tea kuyu maitao nou nuh teidei sühisü bue. (Hebron hai Ejipt hi Zoan tea buyu nuhdu najünou po anai hai rai-a soushu loure.)

²³Süthaisü puletao nou Eshkol vei deikho hisü veloue, buh sühinou puletao nou darkha shithou baokao ali hai jüdeloue ae sünasü süü ali thaithouloua panou mai ahai nou kaopoa nou ta-e. Puletao nou vajüshi ae doushi hai-a daotu pove-e.

²⁴(Buh sünasü puletao nou Eshkol tea zhih sapeie, daiolouzü buh sühinou Israel maitao nou darkha shithou bo ali shaodeloue.)

²⁵Reikei pomaitao nou teidei sü teithe raidai sühao poa nou zhuta-e ae puletao nou,

²⁶Moses, Aaron alia Israel maisou hisü Paran vei vaohro hinou buyu Kadesh hisü dakhai ve puletao nou ngaoyu khesü paongao-e alia puletao nou poveyu darkhashi sü ngao-e.

²⁷Puletao nou Moses hi paoe, “Nenou Etaoye seitayu teidei hisü Etao nou taho zhure; teidei sühisü laivoudzü ae chonaodzü küa nou bue; sühi rashithou sü hainare.

²⁸Ana teidei sühi hrüyu maitao hai khouko pfüshowe ae nuhdu khesü veishoa kaopo pohao khaitoue, alia dushowe. Süpei hinou teidei sühisü duso shoyu Anak maiye Etao nou ngao-e.

²⁹Amalek mainou teidei khelova hai hrüwe; Hit mai, Jebus mai, ae Amor mai nou deichi vasü hrüwe; ae Kanaan mainou Mediterranean zai pehao hi alia Jordon rei pehao hisü hrüwe.”

³⁰Kaleb nou Moses hi vamoa raoyu maitaoye sü nuchao khaiwua puhnou haibüa paoe, “She, Etao thasho-a nou taho soureih soua teidei nasü polou laikhe; daiolouzü veilou süyu khouko sü Etao hi bue.”

³¹Ana Kaleb ye koa tayu maitao nou paoe, “Etao nou puletaoye reih soulou hoe, daiolouzü puletao hai Etao jünou khouko bupu hie.”

³²Südonou puletao nou da-a nou Israel mai hisü ko ashi hai paotare. Puletao nou haibüa paoe, “Etao nou zhutayu teidei nasü sühinou hrüa buyu maitao-a thoudzü hai chejüa nou bubaie. Teidei sühi hrüyu maitao sha shonana-a nou bue,

³³ae Etao nou mai dushoyu tya, Anak vei tyaosholea maitao-a ngao-e. Puletao hi kou Etao hai khazü touli büa baie, ae puletao nou Etaoye sü sübüa ngaoloua baie.”