Read Poumei Naga MAIPEI PHOUYU 14 Bible Online

MAIPEI PHOUYU 14 - Poumei Naga bible

MAIPEI PHOUYU 14

¹Süthaisü kheimathe hai maikhe maisü levea nou kra-a bure.

²Puletao nou Moses ae Aaron pei hi vamoa haibüa raore, “Etaoye panou Ejipt teidei hinou thaiyu nou veipure, moa vaohro hai hinou thaiyua veipure!

³Daisounou MAPAO sü Etaoye teidei sühi savelai touwe? Etaoye reihbu hinou southa-a bailai ae Etao kipfü ae nahmaitao sü nüloua bailai. Südonou Ejipt hi dakhai tayunou veipua bailai mowu?”

⁴Puletao hai alinou ali hi haibüa paoe, “Etao süthai-apei mai ali dopaloua Ejipt hi dakhai ta-a bailai khe!”

⁵Süthaisü Moses ae Aaron nou maisou nghoujü hinou deiphi nakou khurüe.

⁶Alia reikeih potayu maitao hrohinou Nun nahpoutu Joshua ae Jephunneh nahpoutu Kaleb nou puhai vei sabanü khesü leveayu donou paiphawure,

⁷ae maikhe mai hi haibüa paoe, “Etao nou taho zhutayu teidei nasü veisho-e.

⁸MAPAO nou Etaoye zhuvea peilouzü, puhnou Etaoye chonaodzü ae laivoudzü nou küa buyu teidei hisü save thoupeilai,

⁹MAPAO ye khaityaso alia sühinou hrüyu maitaoye ngaopiso, daiolouzü Etao nou puletao jünou reih veilousü. MAPAO nou Etaoye salai peiwe ae puletaoye vupeia buyu rahtao sü Puhnou veiloure, südonou ngaopiso.”

¹⁰Ana Israel maisou nou puletaoye sü chuh nou deithalai tea piloure, ana sübüyu teile hinou MAPAO vei khouko ava sünou Sahpao hisü kou vangao peire.

¹¹MAPAO nou Moses hi paoe, “Mai haitao nou teile kasho Eye khaitya bukou laige? Enou khupayu vah haso alao soungao peiyuma mai haitao nou teile kasho Eye louche moa bukou laige?

¹²Enou rahta ali seive puletaoye sü souhawulai, ana Enou neye puletao jünou mai pouyu ae khouko bupuyu tyahrü ali vei puo sü soupeilai!”

¹³Ana Moses nou MAPAO hi paoe, “Nenou mai haitaoye sü nevei khouko sünou Ejipt hinou sapa peikhaitoue. Nenou nevei maitao hi soupeikhai touyu vah khesü Ejipt mainou choulouyu phaki,

¹⁴puletao nou teidei hai hi hrüyu maitao hisü paolai. Oh MAPAO, nenou Etaoye koa salaiwe, nevei teihao sünou Etao pei hi buyu, hea teile hi teihao vei deka nou ae khei teile hi mei vei deka nou salai peiwe touyu khesü teidei hai hi maitao nou chouloure.

¹⁵Chuo nenou nevei mai haitaoye southa louzü, nevei kathe ae khouko ava süyu tyahrütao nou haibüa paoshulai,

¹⁶süolouzü, nenou nevei maitaoye peilai tea paokhai touyu teidei hisü savete louhoyu donou nevei maitaoye sü nenou vaohro hinou southa laiwure.

¹⁷Südonou chuo MAPAOwo, Enou ne hi veachi paowe, nevei khouko nasü Etao hi paongao peio ae nenou haibüa Etao hi chaachou soukhai touyu nasü soupeio,

¹⁸‘MAPAO E hai rarou haha chamoe, ae tobai soumoa zhuvea leshi peiyu dusho-e alia mahmo soukhai touyu ae khaityayu khesü khaipeia baiwe. Ana pfüpuo nou soumah khaitouyu mah khesü Enou puletao vei nahmaitao ae tyaosholea maiphao asü adai hi koute-a tudeeyu sü peikoulai.’

¹⁹Oh MAPAOwo, mai haitao nou Ejipt teidei hinou tapa louyu nou poa zhou koute nenou khaipeiyu büa nevei dushoyu zhuvea leshi hinou mai haitao vei mahmo khesü khaipeio tea Enou ne hi veachi paowe.”

²⁰MAPAO nou chila peie, “Nenou khoyu thaifüa Enou puletaoye sü khaipeilai.

²¹Ana Enou chaachou soua paowe, süolouzü Enou hriyu thaifüa ae avei khouko sünou teideiphao phoutao-a buyu thaifüa,

²²mai haitao ali koute-a teidei sühisü panou loulai moe. Puletao nou avei ava alia Enou Ejipt hinou ae radeiki hinou khupayu vah haso soupeiyu khesü ngaoloure, ana Eye ngaophou moa vu taoli hai avei chi zübare.

²³Enou puletao vei puopaoh hi peilai tea paopeikhai touyu teidei hisü puletaoye panou talou ngaolai moe ae Eye khaityayu mai ali koute-a teidei sühisü panou loulai moe.

²⁴Ana avei kilai Kaleb hai mai kukhe jünou tyaku hi alia achi hai puhnou züa bubaie, südonou puhnou taho zhuyu teidei hisü Enou puhye save thoupeilai alia puhvei tyaosholea maitaoye panou

²⁵Amalek mai ae Kanaan mainou chu hrüa buyu deikho nasü thaoloulai. Dosho neletao hai dakhai poa Zai Ho hilova kouyu vaohro hisü louta-o.”

²⁶MAPAO nou Moses ae Aaron hi paoe,

²⁷“Mai shiyu haitao nou teile kasho-a apei hi rao-a bukou laige? Puletao nou nolealeayu hai E kei thoulou hore!

²⁸Puletao hi haibüa nou chila peio: Neletao nou jüpa-a khoyu nasü E hriyu thaifüa neletao hi soupeilai.

²⁹Apei hi vamoa raoyu po kai jünou layu mai hrülai hai panou vaohro hai hinou thaita khaitoua bailai, mai ali koute-a panou teidei sühisü loulai moe.

³⁰Enou neletaoye panou velou bulai tea chaachou soukhai touyu teidei hisü Kaleb ae Joshua likhei panou velou hrüa bailai.

³¹Neletao vei nahmaiye ngaobamai nou nülou shulai tea neletao nou pao-a buyu nahmaitaoye sü Enou teidei sühi, neletao nou malaiyu füdei hisü puletaoye panou bure donou Enou savethou peilai.

³²Neletao louzü vaohro ae radeiki hai hinou thaita-a bailai.

³³Neletao nou chilee cheche moyu donou neletao hai vaohro hinou thaita khaimo koute neletao vei nahmaitao nou po raidai hai vaohro hai hinou sühao poa nou talai.

³⁴Reikei poyu maitao nou teithe raidai loua nou teidei nasü sühao poa nou zhuta-e, südonou teithe ali hai po ali soua neletao nou mah souyu donou neletaoye panou po raidai sühao poa nou talai. Neletao nou Eye vamoa khaityayu hai kabüwe touyu sü panou süloulai.

³⁵Eye meme souloua khaityayu mai ashi haitao hisü Enou sübüa soupeilai tea chaachou souwure. Vaohro hai hinou puletao mai hrülai hai thaita khaitoulai, MAPAO Enou hai nasü paowe!”

³⁶Teidei taho zhure donou Moses nou seitayu maitao hai dakhai veyu phaki, puletao nou da-a maikhe mai hi ko ashi sü paopeia maikhe maiye panou MAPAO hi khaityare. Südonou MAPAO nou puletao hisü rahta rahvu seive peia puletaoye southare.

³⁸Reikei taho potayu mai kiahai hisü Joshua alia Kaleb likhei hria baie.

³⁹MAPAO nou paoyu chipao khesü Moses nou Israel maisou hi paopeiyu phaki puletao hai levea shoa nou dopfüre.

⁴⁰Thaineso shona sü puletao nou deichi vanou buyu nuhtao hi reih souloure donou soudaloua nou haibüa paoe, “Chuo MAPAO nou Etao hi peilai touyu teidei hisü tare donou Etao hai souda loure. Etao nou mah sü souwure touyu hai süloure.”

⁴¹Ana Moses nou paoe, “Süthaisü neletao daisounou chua MAPAO vei chi sü zübawe? Neletao hai veiloulai moe!

⁴²Taso, MAPAO nou neletaoye kozho peilai moe, neletaoye ngaobayu maitao nou neletaoye sü hraongu peia bailai.

⁴³Neletao nou Amalek mai ae Kanaan maiye reih souyu phaki, reihbu hinou neletao hai thai-a bailai; MAPAO nou neletaoye kozho peilai moe, daiolouzü neletao nou puh thaisü fübare.”

⁴⁴Ana puletao nou deichi vanou buyu nuhtao hisü MAPAO vei Vo Sübvü potamoyuma ae Moses nou fühao hinou tamoyuma talai teanou ba-a nou tare.

⁴⁵Nuh sütao hinou hrüa buyu Amalek mai ae Kanaan maitao nou puletaoye sü reih hulou hraongu soupeiwure ae puletaoye sü Hormah hi koute hai thaihuta peie.