Read Poumei Naga MAIPEI PHOUYU 15 Bible Online

MAIPEI PHOUYU 15 - Poumei Naga bible

MAIPEI PHOUYU 15

¹MAPAO nou Moses hi Israel maitaoye panou puhnou peilaiyu teidei hi velou bulouyu thai naanou soure zhaitao sü haibüa soulo tea paopeie.

³Chode ali, zhaotsü ali, zhaotu ali, moa nghitu ali hai MAPAO hi meidei-a posheela peire donou peia bailai, moa chaachou soukhai tou-a vete louyu vei posheela soua moa peinüa peiyu posheela sou-a moa khonüh nüyu phaki posheela peiyu sou-a peia bailai; haibüa posheela peiyu hai MAPAO nou jüpawe.

⁴Mai talinoua zhaotu moa nghitu hai MAPAO hi meidei-a posheela peilai toulouzü, hrikhaona süna koa nou sou sühcho ali hai oliv theadzü sühchovou ali hai thoudzü vei posheela soua darkhadzü sühchovou ali noupu pove peilai.

⁶Zhaotsü ali nou poa sheela peilouzü, sou sühcho ahai hai oliv theadzü sühchovou ali-a da hai thouhrüloua thoudzü vei posheela hai peilai.

⁷Süna koa nou darkhadzü sühchovou dali noupu pove peilai. Haibüa nou posheela peiyu hai MAPAO nou jüpa-e.

⁸Chode nou poa MAPAO hi meidei-a posheela peilouzü, moa chaachou soukhai toua posheela peilouzü, moa chavei lathao-a buloure vei posheela soua peilouzü,

⁹thoudzü vei sheela sou-a sou sühcho asü hai oliv theadzü sühchovou ahai thouhrüloua pove peilai,

¹⁰süpei hinou darkhadzü sühchovou ahai noupu peilai. Haibüa posheela peiyu hai MAPAO nou jüpawe.

¹¹Neletao nou chode, zhaotsü, zhaotu moa nghitu hai posheela peilouzü hai zhai büa poa sheela peilai.

¹²Kikhaorü ali jünou la-a posheela peilouzü, hrikhaona ali posheela peiyu phaki posheelana kukhe louyu zhoubüa loupulai.

¹³Israel mai hrülai nou thoudzü vei posheela peiyu phaki hai zhaibüa soulai ae haibüa posheela peiyu hai MAPAO nou jüpa-e.

¹⁴Neletao hinou ve teile daotuli donou hrüa buyu vakou mai ali nou moa neletaoye koa nou teisa nou buyu shetumai ali nou posheela hai peilai toulouzü, puh-a neletao bütoua soulai. Süsü MAPAO nou jüpa-e.

¹⁵Vere teile veishi hinou zhai haitao raibütou-a neletao hia ae vakou mai hia ta-a bailai. Neletao-a ae puhtao-a MAPAO vei nghingao hiolouzü raibütoua baie;

¹⁶chikha ae zhaitao hai raibütoua neletao hia alia puletao hia ta-a bailai.

¹⁷MAPAO nou chikha haitao hai Moses hi Israel maitaoye puhnou peilaiyu teidei hi velouyu thai soupfülo tea peie.

¹⁹Neletao nou teidei sühi velou loua touso hai ngaotou tare toulouzü, MAPAO hi posheela haitao hai pove peio.

²⁰Neletao nou raokhao hai thouthou nou poa raokhao khaolou raikayu nasü MAPAO hi posheela peilai. Neletao nou hai nasü chachiyu phaki posheela peiyu bütoua posheela peio.

²¹Vere teile veishi hi neletao nou raokhao khaolouyu nasü MAPAO hi veisho-a nou posheela peio.

²²Ana MAPAO nou Moses hi peikhai touyu chikhatao hai mai ali nou sümoa soulou more toulouzü,

²³ae MAPAO nou Moses hi peikhai touyu kharochi hai maisou nou haithai naki sülou moa soumah louzü,

²⁴maisou nou sümoa soumah louzü, neletao nou meidei-a posheela soure donou chode ali hai pove peilai, ae haisü MAPAO nou jüpa-e. Hai nasü thoudzü vei posheela ae darkhadzü vei posheela koa nou posheela peilai. Süpei hinou nghitsü ali hai mah vei posheela soua sheela peilai.

²⁵Napao nou maisouye sousheeyu vei naanou hai soupeilai, ae puletaoye sü khaipeilai, daiolouzü puletao nou sümoa soumah loua baie ae puletao nou puletao vei mah posheela hai thoudzü vei posheela soua MAPAO hi posheela peilai.

²⁶Israel mai hrülai ae puletaoye koa hrüyu shetumai hrülaiye sü khaipeilai, daiolouzü maisou nou mahyu hisü loukhai toure.

²⁷Mai ali nou sümoa mah hai soulouzü, puhnou soumah khaitouyu vei posheela hai po ali payu nghikü ali hai pove peilai.

²⁸Posheelabu hinou napao nou mai süna vei mah hai soushee peire donou naanou soua soushee peilai ae puhnou puhye sü khaipeilai.

²⁹Zhai hai nasü sümoa soumah khaitouyu Israel mai moa shetumai hrülai hisü raibütoua talai.

³⁰Ana mai talinou süa nou mah soulouzü, puh sü Israel maiyuma moa shetu maiyuma MAPAO ye ngaophou moa souyu donou puhye sü southawulai.

³¹Daiolouzü puhnou MAPAO vei chipao hai ngaophou moa puhvei kharochi sü pfüthowure, puhnou lah athai nasü soupfü loua baie.

³²Vuli Israel mainou rekounou ta-a buyu teile hinou mai ali hai soteithe zhou nou süü raopfüa nou ngaoloue.

³³Puhye sü Moses, Aaron ae maisou hi nüpoa nou ve-e,

³⁴ae puhye sü hukhaki hi thoube khaire, daiolouzü puh hisü kabülai touyu hai sheesha tea nou süloumo hie.

³⁵Süthaisü MAPAO nou Moses hi paoe, “Mai sünaye southawo; maisou nou puhye sü fühao vakou sapaloua chuh nou deitha-o.”

³⁶Südonou MAPAO nou kharochi peiyu thaifüa puhye sü maisou nou fühao vakou sapaloua chuh nou deithawure.

³⁷MAPAO nou Moses hi haibüa Israel mai hi paopeio tea paoe, “Neletao vei sah kainghou hinou sahbou leilo ae sühisü pha tei-daiyu ali thoulo. Neletao nou haibüa vere teile teitei hinou soulai.

³⁹Neletao nou sah leikhai touyu nasü ngaolouyu chüsü avei kharochi khesü licho loulai ae sükhesü züloulai; sükulouzü neletao nou ahinou tarei talai moe, ae neletao vei kezhe jüpa vah nasü soutalai moe.

⁴⁰Sah leikhai touyu nanou neletaoye panou avei kharochi teitei hai licho loulai, ae neletao hai avei mai soukoute loulai.

⁴¹E hai neletao vei Ramai MAPAO-e; Enou neletao vei Ramai soure donou neletaoye Ejipt hinou sapa peikhai toue. E hai MAPAO-e.”