Read Poumei Naga MAIPEI PHOUYU 16 Bible Online

MAIPEI PHOUYU 16 - Poumei Naga bible

MAIPEI PHOUYU 16

¹Levi vei khü hinou Kohath vei pfümounah hinou buyu Izhar nahpoutu Korah nou Moses pei hisü khaitya pare. Puhye Reuben khü hinou mai asü— Eliab nahpoutu Dathan ae Abiram, alia Peleth nahpoutu On, ae Israel mai hrohinou matsü shoyu süthai-apei mai 250 louzho loua Moses vei khakhe hi bulai more tea puhye sü dutare.

³Puletao nou Moses ae Aaron nghoujü hinou vejüa buloure ae puhai hisü haibüa paore, “Ne hai lazhu lere! Etao mai hrülai hai MAPAO vei baie ae MAPAO nou Etao mai hrülai hisü bue. Moses, ne lah daisounou MAPAO vei maitao pei hinou aduna soua nou buwe?”

⁴Moses nou chi haisü choulou khaie, puhsü deiphi hi kaokoulou-a veachi paore.

⁵Süthaisü puhnou Korah alia puhye thaifüyu maitao hisü paoe, “Dosho shona hai MAPAO nou thaonou puhvei mai-e ae thaonou sheewe touyu sü pongao peilai, ae puhnou dolouyu maiye sü panou puh hi nghikoulai.

⁶Dosho shona sü ne alia neye thaifüyu maitaoye panou poukai nüvei deiyu maibvü polo, ae sühisü meithou ae poukai nüvei hai MAPAO nghoujü hinou thoulo. Süthaisü MAPAO nou thaoye doloure touyu hai Etao nou ngaolai. Levi maitaore, soupfü layu nasü neletao nou baie!”

⁷

⁸Moses nou Korah hi paopue, “Levi maitaore, Enou chi paoyu sü keilo!

⁹Israel maivei Ramai nou neletaoye souku paloua panou puh nghiki nou buyu ae Israel maisou nghoujü hinou la-a nou vah souyu ae MAPAO vei Sahpao hinou kuvah souyu hai neletaoye donou taile revu?

¹⁰MAPAO nou neletaoye alia Levi mai hrülaiye haibüa tsükhouyu vahbu peie, süpei hinou chuo neletao nou naanou souyu napao maivei vahbu-a poloulai tea tewu?

¹¹Neletao nou Aaron pei hi rao-a khaityayu hai chechevuzü nou ne alia neye thaifüyu maitao nou MAPAO pei hi khaitya-a baie.”

¹²Moses nou maiye seiho Dathan ae Abiramye kue, ana puhai nou paoe, “Ahai-o velai moe!

¹³Veisho-a buyu Ejipt teidei hinou Etaoye nenou sapa radeiki hai hinou southalai touyu haisü hazho toulia moe tea ne tsüchowu? Chua nenou Etao pei hinou paopu soua Etaoye tukhalaivu?

¹⁴Nenou Etaoye sü teidei aveih hi save peimoe, moa Etaoye ki-lu ae darkha kipei khesü peimoe ae chuo nenou Etaoye sü lalai toua soure. Südonou Ewo velai moe!”

¹⁵Moses nou rarou loua MAPAO hi haibüa paoe, “Mai haitao nou posheela peiyu khesü popeiso. Enou puletao hisü vah mah lia soumoe ae puletao vei rheisü ali koute-a Enou polou moe.”

¹⁶Moses nou Korah hi paoe, “Dosho shona ne alia nevei mai 250 sü saloua MAPAO nou buyu Sahpao hisü velo, Aaron-a sühisü velai.

¹⁷Lahkuku vei poukai nüvei deiyu meibvü sü polo, ae sühisü poukai nüvei noupu thoulo, sübüa posheelabu hinou posheela peilai.”

¹⁸Südonou mai hrülai nou poukai nüvei deiyu meibvü poloua sühi poukai nüvei thouloua Sahpao hi taloure bomü hinou Moses ae Aaron ye koa nou bure.

¹⁹Süthaisü Korah nou Israel maisouye kuve jüloure, ae puletao nou Sahpao hi taloure bomü hinou Moses ae Aaron hilova rei-a nou buloure. Süteilebü hinou MAPAO vei khouko ava nasü mai hrülai hisü ngaopeire,

²⁰ae MAPAO nou Moses alia Aaron hi paoe,

²¹“Mai haitao hinou thaichü talo, Enou puletaoye sü thashoa-a nou souhawulai.”

²²Ana Moses ae Aaron nou deiphi pei pfüa nakou loua paoe, “Oh Ramai, ne sü hriyu veishi pei hi Ramai-e, mai ali nou mah soupeikhai-e mai hrülai pei hi ne rarou laivu?”

²³MAPAO nou Moses hi paoe,

²⁴“Israel maisou hisü Korah, Dathan ae Abiram nou buyu sahpao hinou tavai talo tea paopeio.”

²⁵Süthaisü Moses nou Israel maiye süthai-apei maitaoye saloua Dathan ae Abiram hisü ve-e.

²⁶Puhnou maikhe mai hi paoe, “Mai shiyu hai navei sahpao hinou tavai talo, ae puhvei na haliro deiso, sükulou molouzü puletao vei mahtao koa nou neletao-a souha bailai.”

²⁷Südonou maisoutao nou Korah, Dathan ae Abiram vei sahpao hinou tavai taloure. Süthaisü Dathan ae Abiram nou puhai vei maipfü ae nahmaitao saloua nou puhai vei sahpao bomü hinou tapa la-a nou bue.

²⁸Süthaisü Moses nou haibüa paoe, “MAPAO nou Eye seive haisü soua baie touyu hai neletao nou süloulai ae haisü lah Enou sounüa soumoe.

²⁹Hakinou mai haitao hai Ramai nou tudee peimoa mai büa thai-a bailouzü, Ramai nou Eye seive moe.

³⁰Ana MAPAO nou raichoki sükhai toumoyu hali soupeilai, ae dei nou kopaloua puletao vei buyu na veishi nou koa puletaoye zhaoloure toulouzü, ae puletao hai hria nou athai maivei teidei hi hoture toulouzü, MAPAO nou mai haitaoye malaiwure touyu hai neletao nou süloulai.”

³¹Moses nou chi paocheyu thaisü, Dathan ae Abiram nou la-a buyu dei sü kopare,

³²ae puletaoye sü zhaoloure alia puletao vei kihikhamai hrülai, Korah vei thaifümai hrülai ae puletao vei natao nou koa dei nou zhaoloure.

³³Puletao hai sübüa nou hria puletao vei natao nou koa athai maivei teidei hisü hotare. Süthai hai deisü koumuloua nou puletao hai hatare.

³⁴Sühinou buyu Israel mai hrülai hai puletao nou krayu pai sü choulou khai-e, puletao hai tutare. Puletao nou haibüa shura sou-a nou paoe, “Tutalou khaio, dei nou Etao-a zhaolou shulai!”

³⁵Süthaisü MAPAO nou mei seikou poukai nüvei deiyu meibvü poa buyu mai 250 sü deithawure.

³⁶Süthaisü MAPAO nou Moses hi paoe,

³⁷“Napao Aaron nahpoutu Eleazar panou poukai nüvei deiyu meibvütao hai mei nou deitha khaitouyu maitao hinou polo tea paopeio ae sühi buyu meithou sü vakou popa laiwo, daiolouzü sütao hai sheewe.

³⁸Sütao hai MAPAO vei posheelabu hi pokou peiyu phaki, shee-a baie. Südonou poukai nüvei deiyu meibvütao hai puletao vei mah donou meinou deitha khaitouyu maitao hinou polo, sütao hai deithou hukao ali büa poureih toulo ae poa posheelabu hoyu sü soulo. Hai nasü Israel mai soupi peiyu ali soua panou ngao-a bulai.”

³⁹Südonou napao Eleazar nou poukai nüvei deiyu meibvütao sü poloua posheelabu hore donou deithou poureih touloure.

⁴⁰Hai nanou Israel mai hi, mai taralia Aaron vei tyaosholea moyu mai ali nou MAPAO nghoujü nou mei dei-a posheela peilai moe, hakinou puletao nou sübüa soulouzü Korah alia puhvei maitao büa souha bailai touyu vei paopi peiyu ali soua bulai. MAPAO nou Moses hinou Eleazar hi kharochi peikhai touyu teitei sü puhnou souche peie.

⁴¹Thainesho hai Israel maisou nou Moses ae Aaron pei hisü rao-a nou haibüa paoe, “Ne hai nou MAPAO vei maiye sü southawure.”

⁴²Maisou nou Moses ae Aaron pei hi vamoa puhaiye dulai tea vejü loure ae puletao nou Sahpao hilova reive zhuyu phaki, teihao nou kou Sahpao nasü jüloure ae MAPAO vei khouko ava nasü ngaoloure.

⁴³Moses ae Aaron nou Sahpao nghoujü hisü takou laloure,

⁴⁴ae MAPAO nou Moses hi paoe,

⁴⁵“Mai haitao hinou tavai talo, buh hai hinou Enou mai haitao sü souhawulai!” Puhai nou deiphi hi pei pfüa nakou loure,

⁴⁶ae Moses nou Aaron hi paoe, “Nevei poukai nüvei deiyu meibvü nasü poloua posheelabu hinou meithou thoulo ae poukai nüvei nasü thoudei loura-o, sübüa thashoa nou maisou hrohisü takouloua puletaoye sousheeyu vei naanou soupei khaio, daiolouzü MAPAO vei lekha rarou nasü pare, ae maikhe mai hi rahta rahvu sü vere.”

⁴⁷Moses nou paoyu chi züa Aaron nou puhvei meibvü nasü poloua maisou vejüa buyu hrohisü tukou loure. Puhnou rahta rahvu hai maisou hi veyu sü ngaolou khaie, puhnou poukai nüvei nasü meibvü hi thoudeilou-a maikhe mai vei mahmo soushee loure vei naanou hai soupeie.

⁴⁸Puhnou haibüa soupei khaie rahta nasü chaore ae puhsü hriyu mai ae thaiyu mai kohinou la-a bure.

⁴⁹Süzhou teithe mai thaiyu hai mai 14,700 thaire, haisü Korahye koa khaityayu hinou thaiyu maitao phou moe.

⁵⁰Rahta veyu nahai baiyu thai, Aaron nou Sahpao bomü hi Moses nou buyu hisü dakhai koure.