Read Poumei Naga MAIPEI PHOUYU 17 Bible Online

MAIPEI PHOUYU 17 - Poumei Naga bible

MAIPEI PHOUYU 17

¹MAPAO nou Moses hi paoe,

²“Israel mai khü chekhei hinou süpo alili hai pove peio tea paopeio. Süpo hisü puletao vei zhih hai rülo,

³ae Levi maivei süpo nasü Aaron vei zhih rüthoulo. Khükhü hi süthai-apeio maitao hai süpo chekhei bulai.

⁴Süpo sütao hai poloua Enou buyu Sahpao hi ae Vo Sübvü buyu nghoujü hi Enou neletaoye ve daoyu buh hi pokhailo.

⁵Süthaisü Enou dolouyu maina vei süpo hai bo lapalai. Haibüa soupeia Enou Israel maiye panou ne pei hi tobai soumoa raoyu nasü souha peilai.”

⁶Südonou Moses nou Israel mai hisü paopeie ae puletao nou süpo kiahai, khü chekhei hinou süpo chekhei hai pove peie ae Aaron vei süpo-a sühi koa nou thoukhai peie.

⁷Moses nou süthaisü süpotao hai Sahpao hi Vo Sübvü nghoujü hisü polou khaipeie.

⁸Thainesho hai Moses nou Sahpao hi louyu phaki, Levi mai khü thaosoua Aaron vei süüpo nasü süübo lapa-a nou ngaoloue. Süüpo süna hai bo lapa-a poupah-a papyare ae almond rashithou shikou mei-a nou ngaoloue!

⁹Moses nou süpo sünasü poloua Israel maitao hi ngaoe. Puletao nou kabüa vepare touyu khesü ngaoloure ae süthai-apei maitao nou linaonao vei süpo sü podakhai tare.

¹⁰MAPAO nou Moses hi paoe, “Aaron vei süpo nasü Vo Sübvü nghoujü hi podakhailou khai-o. Süpo hai nanou Israel mai talinoua khaitya raolealeayu sü bailou more toulouzü puletao hai thai-a bailai touyu vei paopi peiyu shee soua bulai.”

¹¹MAPAO nou kharochi peiyu thaifüa Moses nou soupeie.

¹²Israel maitao nou Moses hi paoe, “Süthaisü Etao hai sühinou che-a baie!

¹³Hakinou mai talinoua Sahpao nghiki takou louzü thai-a bailai touyu thaio, Etao hai thaiyu mai ali bütoua baire!”