Read Poumei Naga MAIPEI PHOUYU 19 Bible Online

MAIPEI PHOUYU 19 - Poumei Naga bible

MAIPEI PHOUYU 19

¹MAPAO nou Moses ae Aaron hi Israel maiye panou tare zhai haitao hai peie. Moses ae Aaron hi cho hoyu ali chaa hayu ae sa-a vah soukhai toumoyu ali hai pove peio,

³ae puletao nou sünasü napao Eleazar hi peilai. Cho sünasü fühao vei vakou hupaloua nou puhvei nghoujü hinou datha loulai.

⁴Süthaisü Eleazar nou souzhe daotu hai poloulai ae puh bah toutu süloua Sahpao buyu hilova hai bakha anai kavu peilai.

⁵Cho nasü teitei nou— souhee, souke, zhe ae lesou veishi nou napao nghoujü hinou meideiwulai.

⁶Süthaisü puhnou sedar süü daotu, loube boli ae pha hoyu ke ali poloua mei hisü laithou deiwulai.

⁷Süthai hai puhnou puhvei sabanü hai dzü shaowulai ae puh pfüphao hai dzü khüloulai, süthaisü puh hai fühao hisü taloua bailai, ana puh sü koukhe koute hai naanou hinou sheelai moe.

⁸Cho poa mei deiyu maina-a puhvei sabanü hai dzü shaolai ae puh pfüphao hai dzü khüloulai, ana puh-a koukhe koute hai naanou hinou sheelai moe.

⁹Süthaisü naanou hinou sheeyu mai ali nou cho meidei khaitouyu vounai sü veloua fühao vei vakou hi naanou hinou sheeyu buh ali hisü khailoulai, sübüa Israel maisou nou naanou hinou sheemoyu nasü poa sousheere dzü hi thoulai. Naanou hai nasü mah sousheere donou soulai.

¹⁰Vounai vüyu maina-a puhvei sabanü hai dzü shaoloulai, ana puh-a koukhe koute sheelai moe. Zhai hai nasü vere teile veishi hi ae Israel mai hrülai hi alia shetumai hia talai.

¹¹Mai talinou thaiphao hai deire toulouzü, puhsü teithe anai koute sheelai moe.

¹²Puhnou sousheeyu dzü poloua teithe asü zhou ae teithe anai zhousü soushee loulai, süthaisü puh hai naanou hinou shee-a bailai. Ana puhnou teithe asü zhou ae teithe anai zhou hai soushee loumore toulouzü, puhsü shee moa bailai.

¹³Mai talina thaiphao deiwua puh sü soushee loumore toulouzü puh hai sheemoa bua bailai, daiolouzü poa sousheeyu vei dzü nou puhye lazü peimoe. Puhnou MAPAO vei Sahpao hai souzhaiwure, südonou puhye sü Ramai vei mai soua popeipu khailai moe.

¹⁴Mai ali nou sahpao hinou thaita louzü, puh thaiyu teile hi sahpao sühi buyu maitao moa sahpao sühi louyu mai hai teithe anai koute sheelai moe.

¹⁵Sahpao sühinou buyu bvü moa leekhao tarali hai pei homoa bulouzü, na sütao hai shee moa bailai.

¹⁶Mainou southa khaitouyu moa vakou nou lah thaiyu thaiphao hai mai talinou deilouzü, moa hakinou mai ali nou mairao moa khüh hai deilouzü, puh-a teithe anai koute hai sheelai moe.

¹⁷Shee moyu nasü sousheelai toulouzü, mah sousheere donou cho hoyu navei meidei khaitouyu vounai nasü daotu poloua lee ali hi thouloulai, ae sühisü veiyu dzü lathou loulai.

¹⁸Rairailai soua sheeyu mai ali nou loube ali poloua dzü hisü thoupfü loulai, ae sahpao veishi hi kavu peilai, sühi buyu na teitei ae sühinou buyu maitaoye kavu peilai. Ahai chena soua sheeyu mai ali nou dzü sü poloua thaiphao deiyu moa mairao moa khüh deiyu mai neye kavu peilai.

¹⁹Naanou hinou shee-a buyu mai ali nou teithe asü zhou ae kou teithe anai zhou hai sheemoyu mainaye dzü poloua kavu peilai, ae teithe anai zhou sü puh hai shee-a bailai. Mai naye soushee peiyu puh sü puhvei sabanü hai dzü shaowulai ae puh pfüphao hai dzü khüloulai, süthaisü puh hai koukhe kou shee-a bailai.

²⁰Mai taralia naanou hinou sheemo louzü ae puhnou soushee loumo louzü puh hai sheemoa bubaie, daiolouzü soushee peiyu dzü nasü puh hi kavu peimoe. Puhnou MAPAO vei Sahpao hai souzhaiwure ae puhye sü Ramai vei mai soua popeipu laimoe.

²¹Neletao nou chikha hai nasü vere teile veishi hia soulai. Maiye soushee peiyu dzü kavu peiyu maina-a puhvei sabanü hai dzü shaolai, mai talinou soushee peiyu dzü deilouzü puh hai naanou hinou koukhe koute hai sheelai moe.

²²Shee moyu mai nanou deiyu na veishi hai sheemoa bailai, ae mai talinou sütao hai deilouzü puh hai naanou hinou koukhe koute hai sheelai moe.