Read Poumei Naga MAIPEI PHOUYU 20 Bible Online

MAIPEI PHOUYU 20 - Poumei Naga bible

MAIPEI PHOUYU 20

¹Israel mainou Zin touyu radeiki hisü khouh araina hinou velou loure ae maisou nou Kadesh touyu hinou fühao soua buloure; ae buh sühinou Miriam sü thaitare ae buh sühinou puhye daovure.

²Israel maitao nou fühao soua buyu buh hisü dzü ha-e, südonou puletao hai ve me souloua Moses ae Aaron pei hi raore.

³Maikhe mainou puhai hi haibüa paoe, “Etao thaihou jürai maitao koa nou Etao hai MAPAO vei Sahpao nghoujü nou thaiyu-a veipure.

⁴Daisounou ne Etaoye haibüyu radeiki hisü savewe? Etaoye panou buh hai hinou Etao vei kikhaorü koa thailai touwu?

⁵Daisounou ne Etaoye Ejipt hinou sapaloua shishoyu teidei, haibüa halia paomoyu buh hisü save khaipeiwe? Buh hai hisü thou, doushi, darkhashi ae vazüshithou ali koute-a ha-e. Kere dzü-a aliro ha-e.”

⁶Moses ae Aaron nou maisou hinou tavai taloua Sahpao vei bomü hinou kou laloure, ae puhai nou deiphi hi pei pfüa nakou khailoure ae MAPAO vei khouko ava sünou puletao hisü valoure.

⁷MAPAO nou Moses hi paoe,

⁸“Vo Sübvü nghoujü hi khaitouyu süpo nasü polo ae süthai hai ne alia Aaron nou maisouye kuve jülo. Maisou vejüa buyu nghoujü hinou chuhlya tao hisü keapei khaio, sükulouzü chuhlya hinou maikhe maiye donou ae puletao vei kikhaorü taoye panou ke loure dzü sü küpa peia bailai.”

⁹MAPAO nou kharochi peiyu thaifüa Moses nou talou süpo nasü poloure.

¹⁰Moses ae Aaron nou Israel mai hrülaiye sü chuhlya nghoujü hi kuve jüloure ae Moses nou paoe, “Khaityayu maitaore, haisü keilo! Chuhlya hai hinou neletaoye donou dzü sü popa peilaiho?”

¹¹Süthaisü Moses nou süpo nasü polaloua chuhlya hisü bakha ahai hai khoupeire, ae dzü taoli hai küpare alia maisou ae kikhaorütao nou dzü sü keloure.

¹²Ana MAPAO nou Moses ae Aaron pei hi vamo loure. Puhnou paoe, “Ne hai nou Israel maisou nghoujü hinou Eye louchetou loumoa avei sheeyu khouko nasü puletao nghoujü hi soungao peimoyu donou, Enou peilai tea paokhai touyu teidei hisü ne hai nou mai haitaoye sapoa loulai more.”

¹³Haibüyu hai Meribah touyu buh hinou vepa-e, daiolouzü Israel maitao nou buh sühi sünou MAPAO pei hi rao-a nolealeare ae puhnou puletao hi puh hai sheewe touyu sü soungao peie.

¹⁴Moses nou Kadesh hinou Edom hi veo hisü haibüa kopomaiye seita-e, “Nevei thaihou jürai soua buyu Israel mainou haibüa paowe: Etao nou veahoyu veishi hai nenou süwe,

¹⁵süolouzü Etao vei puopaoh maitao nou Ejipt hi teile taoli hai hrüa bure; ae Ejipt mainou Etao vei puopaoh mai hi ae Etaoye alaosou souvea shopeie,

¹⁶ae Etao nou kra-a MAPAO hi soukha sü khoe. Etao nou krayu sü puhnou chouloua puhnou rakivamai seive Etaoye Ejipt hinou sapa peie. Chuo Etao hai Kadesh, nevei deirai nghia buyu nuhdu hisü nou bure.

¹⁷Zhuvea nou Etaoye panou nevei teidei hinou tacho palouo. Etao nou ae Etao vei kikhaorüye panou ludu hinou tala laimoe, moyuma panou neletao vei dou moa kipei hisü loulai moe, ae Etao nou neletao vei dzükhao hinou dzü sü kelai moe. Etao nou nevei teidei tala loumo koute ludu hinou ta-a bailai.”

¹⁸Ana Edom mainou haibüa chila peie, “Neletaoye panou Etao vei teidei sü tacholai moe! Hakinou neletao nou tacho talai toulouzü, Etao nou talou neletaoye reih soua bailai.”

¹⁹Israel mainou haibüa paoe, “Etao nou ludu hinou bua bailai ae hakinou Etao nou moa Etao vei hikhaorü nou neletao vei dzü ke louzü, Etao nou süvei muma hai peilai, Etao nou jüpayu louzü neletao vei teidei nasü tacho louyu likhei bailai.”

²⁰Edom mainou haibüa paopue, “Neletaoye panou tacho loulai moe!” Puletao nou khoushoyu reihmai me saloua Israel maiye reih hukoure.

²¹Edom mainou puletao vei teidei sü Israel maiye panou tacho bayu donou Israel mainou ludu kukhe hinou tapoa nou tare.

²²Israel maisou sünou Kadesh thaokhaiwua Hor Deichi hisü veloure,

²³sünasü Edom maivei deirai hinou bue. Buh sühinou MAPAO nou Moses ae Aaron hi paoe,

²⁴“Enou Israel maiye peilai tea paokhai touyu teidei hisü Aaron nou talou ngaolai more; puh sü thaita laire, daiolouzü puh nou Meribah buh hinou avei kharochi hai zübare.

²⁵Aaron ae puh nahpoutu Eleazar sü saloua Hor Deichi hi pakhaio,

²⁶ae sühinou Aaron vei naazao hai phaloua nou Eleazar hi noupeio. Aaron hai buh sühinou thaita-a bailai.”

²⁷MAPAO nou kharochi peiyu büa Moses nou soupeie. Puletao nou Hor Deichi vasü Israel mai hrülai nou zhingaoyu hinou tare,

²⁸ae Moses nou Aaron vei naazao hai phaloua nou Eleazar hi thoupeiwure, ae Moses alia Eleazar hai dakhai vere.

²⁹Israel mainou Aaron hai thaire touyu hai süloure, südonou puletao nou puhye donou teithe shirou hai dopfüe.