Read Poumei Naga MAIPEI PHOUYU 22 Bible Online

MAIPEI PHOUYU 22 - Poumei Naga bible

MAIPEI PHOUYU 22

¹Süthaisü Israel mainou tapoa nou Moab maivei deikho, Jordan hinou teinghi palova ae Jeriko vei pahlova nou fühao soua nou bure.

²Israel mainou Amor mai hi soupeiyu ko khesü Moab hi veo, Zippor nahpoutu Balak nou choulou khai-e,

³puh alia puhvei mai hrülai nou ngaopi shore.

⁴Moab mainou Midian hi süthai-apeio maitao hisü paoe, “Lahvei touyu ki-lu lia ha-a nou teisa nou sühao poa laiyu mai haitao nou Eletao mai hrülaiye sü cho nou poudai toukhai louyu büa souhakhai toulaire.” Südonou Moab maivei Balak veo nou

⁵Beor nahpoutu Balaam ye kupoa vere donou kopomaiye Amaw maivei teidei, Euphratis reipe hinou buyu Pithor hisü seive haibüa paoe, “Ejipt hinou tyahrü ali hai tapaloua teidei veishi sü phoutao loure, ae puletao nou Etao vei teidei sü poloure donou soupi nou bure touyu hai neye panou sülou nüwe.

⁶Puletao hai Etao jünou pouloure, südonou zhuvea tave Eye donou puletaoye sü chaa peio, sükulouzü Etao nou puletao jünou veiloua puletaoye sü teidei hinou hulai lousüe. Enou süwe, süolouzü nenou shiha peikhaie, maikhe mai hai ha ngaoloua baiwe, ae nenou chaa peiyu mai hai chaa pfüa baiwe.”

⁷Südonou Moab mai ae Midian maivei süthai-apei maitao nou chaa peiyu vei muma sü poloua Balaam hisü tare, ae puletao nou Balak vei chipao hai puh hi paongao peie.

⁸Balaam nou puletao hisü paoe, “Zhoukhei hai hinou chaolo, dosho shona MAPAO nou ahi paoyu chipao khesü Enou neletao hi paopeilai.” Südonou Moab maivei süthai-apei maitao hai Balaam hinou chaore.

⁹Ramai nou Balaam hisü ve haibüa nou chi noure, “Ne hi ve chao-a buyu maitao sü thao-e?”

¹⁰Puhnou chila peie, “Moab hi veo Balak nou mai haitao hai ahi seive haibüa paoe,

¹¹süolouzü Ejipt teidei hinou tapayu maitao nou teidei veishi sü phoutao loure. Puhnou Eye panou puletaoye sü chaa peinüwe, sükulouzü puhnou puletaoye sü reih soua hulai loulai touwe.”

¹²Ramai nou Balaam hi paoe, “Mai haitaoye koa taso, ae Israel maitaoye sü chaa peiso, daiolouzü Enou puletaoye sü ha peiwure.”

¹³Shona sü Balaam nou Balak vei kopomaitao hisü paoe, “Ki hi dakhai ta-a baio; MAPAO nou Eye panou neletaoye koa tabare.”

¹⁴Südonou puhtao hai Balak hisü dakhaive Balaam nou puletaoye koa tabare tea paopeie.

¹⁵Süthaisü Balak nou süthai-apei mai hai poupua nou ae raichoki maitao jünou matsü puyu maitao nou Balaam hisü seive pure.

¹⁶Puletao nou Balaam hisü ve Balak vei chipao hai paopeie, “Zhuvea nou ahi vepei bayu sü soupeiso!

¹⁷Nenou jüpayu teitei sü Enou ne hi peilai, zhuvea nou hai hi veloua Eye donou mai hotao sü chaa peio.”

¹⁸Ana Balaam nou chila peie, “Balak nou puhvei vedei hi buyu shahu ae sana veishi Eye peiyuma, avei Ramai MAPAO nou kharochi peiyu jünou halia pua paolou shie.

¹⁹Ana zhoukhei zhuvea nou hai hinou chaolo, MAPAO nou ahi halia paopu peilai homosa E zhulai hie.”

²⁰Süzhou khei Ramai nou Balaam hisü ve haibüa paoe, “Hakinou mai haitao nou neye koa talai tea kulouzü, puletaoye koa sata-o, ana Enou ne hi paopeiyu likhei pao-a bailai!”

²¹Südonou thainesho shona sü Balaam nou puhvei rheisüh pfüloua Moab maivei süthai-apei maitao koa nou tare.

²²Ana Balaam nou takhai-e Ramai hai rarou loure, ae Balaam nou rheisüh sü pfüa nou puhvei kilai mai ahai koa ta-e, MAPAO vei rakivamai nou puhvei ludu sü kou nuloure.

²³Rakivamai nanou puh bah hi khoche poa nou ludu hinou la-a buyu hai rheisüh nanou ngaolou khaie, rheisüh nasü ludu hi tamoa nou dou hisü loutare. Balaam nou rheisüh sü dapoa ludu hisü paloure.

²⁴Süthaisü darkha kipei ahai kohinou holo ae hailo-a chuh bua nou ludu taiyu buh hinou rakivamai nanou daloure.

²⁵Rheisüh nanou rakivamai naye ngaoulou khaie, chuh khokhai touyu hilova taraikou Balaam phi hai bipeie, südonou Balaam nou rheisüh nasü dapeipue.

²⁶Süthaisü rakivamai nanou tareikhe zhoulo-a ae nalova-a reilou shiyu ludu atai buh ali hinou laloure.

²⁷Rheisüh nanou rakivamai naye ngaolou khaie, rheisüh nasü deiphi hi kou dazü loure; ae Balaam hai rarou sholoua puhvei süpo sünou rheisühye sü poa dare.

²⁸Süthaisü MAPAO nou rheisüh hisü chi paolou süyu khouko hai thoupeiwure, ae rheisüh nou Balaam hi paoe, “Enou ne hi dai soupeiwure? Ne daisounou Eye avu asü hai dapeiwe?”

²⁹Balaam nou chila peie, “Nenou Eye pfüa tabayu donou-e! Abah hi khoche buyu thaio Enou neye daothawu laire.”

³⁰Rheisüh nou chila peie, “Nevei hrümai sasasü pfüa tayu rheisüh nasü E baimowu? Enou neye haibüa raichoki soupeidou?” “Sübü moe,” tea puhnou chila peie.

³¹Süthaisü MAPAO nou Balaamye panou rakivamai nanou khoche poa ludu hinou la-a buyu sü ngaoloure. Südonou puhnou pei pfüa nakou khurüe.

³²Rakivamai nanou Balaam hi noure, “Ne daisounou nevei rheisühye sü bakha asü koute haibüa nou dapeiwe? Enou nevei ludu sü nuchao loure donou vewe; daiolouzü ne hai zhouvu vei veidu hai nasü tayu kaomoe.

³³Ana nevei rheisüh nanou Eye ngaoloua bakha asü hai tavai loure, hakinou puhnou tavai talou moyu thaio, Enou neye daothawua nevei rheisüh nasü panou hria ta-a bailai.”

³⁴Balaam nou chila peie, “E mah souwure. Nenou Eye nuchaore donou ludu hinou la-a nou bue touyu sü Enou sülou more. Chua E hai tayu kaomoe touyu thaio, Enou ki hi dakhai ta-a bailai.”

³⁵Ana rakivamai nanou chila peie, “Mai haitaoye sü koa nou ta-o, ana Enou paoyu likhei sü pao-a baio.” Südonou Balaam nou puletaoye koa tare.

³⁶Balak nou Balaam sü laire touyu hai choulou khaie, puhnou puhye süloulai tea Moab maivei deirai, Arnon Reipe hinou buyu Ar nuhdu hisü vere.

³⁷Balak nou puh hi paoe, “Enou neye panou rai-a nou tave kuyu phaki, ne daisounou ahi vemoe. Nenou jüpayu nasü E neye peilou hoe tea ne tsüchovu?”

³⁸Balaam nou chila peie, “E ne hi vere movu? Ana ahi dai soulou süyu khouko sü bue? Ramai nou paoyu likhei E sü pao-a bailai.”

³⁹Südonou Balaam nou Balak ye koa Huzoth nuhdu hisü tare.

⁴⁰Balak nou chode ae zhaotu dathaloua nou Balaam ae puhye koa laiyu süthai-apei maitao hi peie.

⁴¹Thainesho shona hai Balak nou Balaam ye saloua nou Israel mai daotu zhingaoyu Bamoth Baal hisü sapa loure.