Read Poumei Naga MAIPEI PHOUYU 23 Bible Online

MAIPEI PHOUYU 23 - Poumei Naga bible

MAIPEI PHOUYU 23

¹Balaam nou Balak hi paoe, “Eye donou posheelabu anai soupeio, ae chode anai alia zhaotsü anai ahi pove peio.”

²Puhnou paoyu thaifüa Balak nou soupeie, ae posheelabu alili hinou chode alia zhaotsü ali hai posheela peire donou pove peie.

³Süthaisü Balaam nou Balak hi paoe, “Meidei-a posheela peiyu buh hai hinou ne la-a buwo, MAPAO nou Eye daolaiho daolai mosa E taho zhuta laihie. Puhnou ahi ngaoyu veishi sü Enou ne hi paongao peilai.” Südonou Balaam nou lah likhei deichi pei hisü patare,

⁴ae Ramai nou puhye kou daopeie. Balaam nou Ramai hi paoe, “Enou posheelabu anai soupei khaitoue ae posheelabu alili hisü chode ali ae zhaotsü ali posheela peikhai toue.”

⁵MAPAO nou Balaam hisü daitea paolai touyu hai paopeiwua Balak hi seidakhai koure.

⁶Süthai hai Balaam nou dakhai kouyu phaki, Balak hai posheela buh hinou Moab maivei süthai-apei maitao koa nou la-a buyu sü ngaoloue.

⁷Balaam nou haibüa rachi sü paopeie: “Moab maivei veo Balak nou Eye Sairia maivei teinghei palova buyu deichitao hinou buh hai hi save-e. Puhnou ahi paoe, ‘Eye donou tave chi paopeio, ae Israel maiye chaa peio.’

⁸Ramai nou chaa peimoyu maiye sü Enou kabüa chaa peikhailai? Moyuma Ramai nou malai moyu maiye sü Enou kabüa malai loulaige?

⁹Kushoyu deichi vanou Enou puletaoye zhingao-e; Enou deichi vanou puletaoye zhu-e. Puletao hai lahnou hrilou süyu tyahrü ali-e ae tyahrü kukhetao jünou puletaoye shiha peipu khaitouyu hai lah puletao nou süwe.

¹⁰Thaonou naihü zhou-a buyu Israel maivei tyaosholea maitaoye phoulou süyu sü bue, mai süzhou buyu taosü thaonou choloulai? Avei hümamai sü Ramai vei mai ali büa akhai soupeio; Eye panou checheyu mai ali büa thaipeio!”

¹¹Süthaisü Balak nou Balaam hi paoe, “Ne daisounou sübüa ahi soupeiwe? Enou neye sü Eye ngaobayu maitaoye panou chaa peire donou hai hi save baie, ana sübü peimoa nenou puletaoye sü ha peia baire.”

¹²Puhnou chila peie, “MAPAO nou Eye paopeio touyu likhei E pao-a bailai.”

¹³Süthaisü Balak nou Balaam hi paoe, “Israel mai daotu zhingao-a bailaiyu buh ali hi Eye koa talai she. Buh sühinou Eye donou puletaoye chaa peio.”

¹⁴Puhnou puletaoye sü Pisgah Deichi peitaoh, Zophia vei dou hi sakou loure. Puhnou buh sühia posheelabu anai souloua sütao hisü chode alili ae zhaotsü chekhei hai posheela peie.

¹⁵Balaam nou Balak hi paoe, “Meidei-a posheelayu buh hai hinou ne la-a nou bu-o, ae reilova E takhe Ramai ye daolai hie.”

¹⁶MAPAO nou Balaamye dao-e, ae puh hi daitea Balak hi paolai touyu chipao sü paopeia puhye seidakhai kouwure.

¹⁷Puhnou dakhai kouyu phaki, Balak hai posheelabu hinou Moab maiye süthai-apei maitao koa nou buyu sü ngaoloue. Balak nou puh hi Ramai nou daitea paowe tea nou-e,

¹⁸ae Balaam nou haibüa rachi sü paola peie: “Zippor nahpoutu Balak, ne hai hi takoulo ae Enou paoyu achi sü keinoulo.

¹⁹Ramai hai mai büa da-a moe; ae mai büa puhvei tsüle hai da chamoe. Puhnou paokhai touyu thaifüa puh hai soua baiwe, ae puhnou chi paokhai touyu nasü vete-a baiwe.

²⁰Eye ha peia baio tea lüpeia baie, ae Ramai nou shiha peikhai touyu nasü Enou podakhai louhoe.

²¹Israel mai hi kaozhou ashi vere halia Enou ngaomoe, ae puletao nou veaho laiyu sü E zhingao moe. Puletao vei Ramai MAPAO nou puletaoye kozho peia nou bue, ae puletao vei veo hai puh baie tea puletao nou shapaowe.

²²Ramai nou puletaoye sü Ejipt hinou sapapeie; Puhnou puletaoye donou rekou chode büa boupeie.

²³Kheikhupado moa rashi sayu maivei do ashi sünou Israel maiye halia soushi peilou hoe. Chuo maikhe mainou Israel maiye donou haibüa paolai, ‘Zhukhaio, Ramai nou puletaoye donou soupei khaitouyu vahtao!’

²⁴Israel tyahrü hai souveo ali büa khouko bue; puhnou nütoure ngaoloumo koute ae puhnou nülouyu zhe sü ke loumo koute puhnou solai moe.”

²⁵Süthaisü Balak nou Balaam hi paoe, “Nenou Israel maiye sü chaa peio toukhaie nenou puletaoye sü chaa peibare, ana puletaoye sü ha peiso.”

²⁶Balaam nou Balak hi paoe, “MAPAO nou ahi paopeiyu teitei sü Enou sou-a bailai tea ne hi paomowu?”

²⁷Balak nou paoe, “She Enou neye buh kukhe ali hi satalai hie. Sühio louzü Ramai nou neye panou puletaoye chaa peishulai.”

²⁸Südonou puhnou Balaamye saloua radeiki zhilou ngaoyu Peor Deichi hisü sapa loure.

²⁹Balaam nou puh hi paoe, “Eye donou buh hai hinou posheelabu anai soupeio, ae chode anai alia zhaotsü anai pove peio.”

³⁰Balak nou paopeiyu thaifüa soupeie, ae chode ali ae zhaotsü alili hai posheelabu alili hinou posheela peie.