Read Poumei Naga MAIPEI PHOUYU 24 Bible Online

MAIPEI PHOUYU 24 - Poumei Naga bible

MAIPEI PHOUYU 24

¹Chuo louzü Balaam nou süloure, süolouzü MAPAO nou Israel maiye ha peiyu hai jüpawe, südonou puhnou kabü laisa touyu hai raichoki büa zhuta more. Puhnou radeiki hilova reiloure,

²ae Israel mainou khü-khü nou fühao soua buyu sü zhingao loure. Ramai vei rako nou puh hisü koulou loure,

³ae puhnou haibüa rachi sü paore: “Beor nahpoutu Balaam vei rachi, sheesha tea nou ngaoyu maina vei chipao.

⁴Ramai nou paoyu chipao choulou süyu maina, Khoukhoulai Ramai hinou zho ngaoyuna kaoduta-a buyuma sheesha tea nou ngaolou süyu maina vei chipao.

⁵Israel maivei sahpao hai daizhou koute hüvei sarou,

⁶Habe veisho-a hrüpoa tayu soure, reipe hinou buyu kipei büre, MAPAO nou shokhai touyu kaibonghou (aloes) büre, ae dzü buyu pe hinou paopayu sedar süübe kure.

⁷Puletao hisü teishih teile vei-a teirü peilai, ae puletao vei taimou hai dzü veiyu hinou thouloulai. Puletao vei veo hai Agag jünou dupulai ae puhnou holo ae hailo dushopoa nou khasa-a hrülai.

⁸Ramai nou puletaoye sü Ejipt hinou sapa peie; puhnou puletaoye donou rekou chode ali büa dupeie. Puletao nou puletaoye ngaobayu maitaoye sü souha peie, puletao vei rao khesü dacha peie ae puletao vei voulouthou khesü sousasa peie.

⁹Souveo ali büa tyahrü süna hai khouko bue; Puhnou dazüyu phaki, mai talia puhye sü soukai pi-e. Mai taralia Israel maiye ha peiyu maisü shiha peilai, ae mai talinoua Israel maiye chaa peiyu mai sü chaa ngaolai.”

¹⁰Balak hai rarou shopoa nou bahzü züloure ae Balaam hi paoe, “Eye ngaobayu maitaoye panou chaa peire donou Enou neye sü kuve-a baie, ana nenou bakha asü koute hai puletaoye shiha peia baie.

¹¹Chuo lah ne ki hi dakhai veta-o! Enou neye veisho-a nou buu sü peilai tea paopeikhai toue, ana MAPAO nou neye panou buu nasü ngaolou bare.”

¹²Balaam nou chila peie, “Enou rai-a nou nevei kopomaitao hi paomowu?

¹³Puhnou Eye puhvei vedei hi buyu shahu ae sana teitei nou peiyuma, Enou MAPAO vei kharochi zümoa lah ado soua halia soulou shi-e. MAPAO nou ahi paopeiyu likhei E sü pao-a bailai.”

¹⁴Balaam nou Balak hi paoe, “Chuo Enou avei maitao hi dakhai talaire, ana E tamo jünou haithai naki Israel maitao nou nevei maitao hi daisoulai touyu hai paopeilai.”

¹⁵Süthaisü puhnou haibüa rachi sü paopeie: “Beor nahpoutu Balaam vei rachi, sheesha tea nou ngaoyu maina vei chipao,

¹⁶Ramai nou paoyu sü choulou süyu ae Kukulai hi Abuo hinou veye tsüdo sülou süyu maina, Khoukhoulai Ramai hinou sheesha tea nou zho ngaoyu maina vei chipaoe.

¹⁷Enou haithai naki zhuyu phaki, Israel maivei tyahrü hai zhingao-e. Veo mai ali, vavei shoyu teivuh ali büa tyahrü süna hinou palai, zhaoyu vutao ali büa Israel mai hinou palai. Puhnou Moab maivei süthai-apei maitao pei hai dakho peilai, ae khaophu soua mai shiyu maiye sü puhnou danakou khaipeilai.

¹⁸Puhye ngaobayu Edom mai jünou koloulai, ae puletao vei teidei sü puhvei souloulai, ae Israel mainou thaokhai toumoa sübüa veilailai khelai.

¹⁹Israel maivei tyahrü sünou puletaoye khasa-a hrülai, ae hria buyu mai ali koute-a souhakhai toua bailai.”

²⁰Süthaisü Balaam vei zho kounou Amalek maiye haibüa nou ngao-e: “Tyahrütao hrohinou Amalek mai hai khoukayu tyahrü ali-e, ana haithai kou akhai hio puletao hai teisa nou ha-a bailai.”

²¹Puhvei zho kounou Ken maiye ngao-e, ae haibüa puhnou rachi sü paoe: “Nenou buyu buh hai veisho-a nou soukhaiwure, ae chuhlya peitaoh hinou raohouphe soukhai touyu büa nou bue,

²²ana Ken maitaore, neletao-a souha bailai, Assaria mainou neye sü nüpoa ta-a bailai.”

²³Balaam nou rachi hai nasü paopeie: “Reilova nou vejüa buyu maitao sü daisouyu maige?

²⁴Kaipras hinou dzüluki khesü pfüa velai, puletao nou Assaria ae Eber mai jünou reih veiloulai, ana puletao-a haithaio teisa nou hakata-a bailai.”

²⁵Süthaisü Balaam nou kushuloua lah ki hi dakhai tare ae Balak-a lahvei ludu sü tare.