Read Poumei Naga MAIPEI PHOUYU 25 Bible Online

MAIPEI PHOUYU 25 - Poumei Naga bible

MAIPEI PHOUYU 25

¹Israel maitao nou Akasia vei Deikho hinou ve fühao soua buyu phaki, puletao nou Moab maipfüye sabu sazü tare.

²Moab maipfü nou puletaoye sü homaitao vei rathoyu vei posheela nüh hisü velou peio tea kuloure ae puletao touso sü koa touzho loure ae puletao vei rah sü thotare.

³Südonou Israel mainou Peor hinou Baal rah sü tho tare, ae MAPAO nou Israel mai pei hi rarou loure,

⁴ae MAPAO nou Moses hi paoe. “Israel maiye süthaiyu mai hrülaiye sü saloua hea teivayu teile hinou southa khaitou-o, sükulouzü Enou maikhe mai hi lekhapu laimoe.”

⁵Moses nou peikho maitao hi paoe, “Neletao mai hrülai nou Peor hi Baal rahye thotayu mai alili hai southalai.”

⁶Israel mai ali nou Midian maipfü ali hai Moses ae maisou nou MAPAO nou buyu Sahpao bomü hinou dopfüa buyu teile hinou puhvei sahpao hisü sa-a loure.

⁷Aaron tyao, Eleazar nahpoutu napao Phinehas nou sünaye ngaoloukhaie, maisou vejüa buyu buh hinou puhnou tashuloua tare. Puhnou heung sü poloua

⁸puhaiye sü sahpao hi thaijü loure, ae puhnou puhaiye sü heung nou phyathare. Süvanou Israel maiye southayu rahta rahvu nasü baire,

⁹ana rahta rahvu nou Israel mai thekaidai hai southare.

¹⁰MAPAO nou Moses hi paoe,

¹¹“Enou Israel maiye lekhayu nasü Phinehas nou souha peiwure. Puh hai Eye baimoa rah kukhe liye thotayu hai heameapoa nou buthoulou hore, südonou Enou avei lekha hinou puletaoye sü souhapu khailai more.

¹²Südonou Enou puhye koa haithai vere teile veishi hia panou hamore vei vo ali soupeilai tea puh hi paopeio.

¹³Puh alia puhvei tyaosholea maitaoye panou teisa sü napao vei kuvah hai soulai, daiolouzü puhnou Eye donou noubasho-a Israel maivei mahmo khailoure vei vah haso hai soupeiwure.”

¹⁴Midian maipfüye koa southayu Israel maina zhih hai Simeon pfümounah hi peikhowo Selu nahpoutu Zimri toue.

¹⁵naotupai hai Midian mai peikhowo Zur nahnaotupai Kozbi toue.

¹⁶MAPAO nou Moses hi kharochi peie,

¹⁷“Midian maiye sü reih soukhaio, ae puletaoye sü souhawo,

¹⁸daiolouzü puletao nou neletaoye Peor hinou shodo ashi souloua souvea peiyu donou, ae Peor hinou rahta rahvu veyu phaki Kozbi ye southayu donou.”