Read Poumei Naga MAIPEI PHOUYU 27 Bible Online

MAIPEI PHOUYU 27 - Poumei Naga bible

MAIPEI PHOUYU 27

¹Mahlah, Noha, Hoglah, Milkah, ae Tirzah hai maitao hai Hepher nahpoutu Zelophehad nahnaotu maitao-e. Hepher hai Gilead nahpoutu-e, Gilead hai Mikhir nahpoutu-e, Makhir hai Manasseh nahpoutu-e, Manasseh hai Josef nahpoutu-e.

²Puletao tounah maitao nou Moses, napao Eleazar, süthai-apei maitao ae maisou hisü MAPAO nou buyu Sahpao kijü hisü veloua nou paoe,

³“Etao puo hai radeiki hinou nahpoutu ali-a hrümoa thaitare. Puh hai MAPAO pei hi khaitya raoyu Korah thaifümai hrohi loumoe; puh sü lah puhvei mahmo donou thai-a baie.

⁴Puhnou nahpoutu hayu vanou daisouyu donou puh zhih sü panou Israel mai hinou halai touwe? Epuo vei thaihou jürai maitao koa nou Etao hi Epuo vei kaalo khesü peio.”

⁵Moses nou puletao vei chi sü MAPAO hi popapeie,

⁶ae MAPAO nou puh hi paoe,

⁷“Zelophehad nahnaotu maitao nou khoyu nasü kaowe, puletaoye sü puletao vei puo thaihou jürai maitaoye koa nou kaalo sü peio. Puhvei kikaa nasü panou puletaoye ngaolo.

⁸Israel mai hisü haibüa paopeio, süolouzü mai talinou nahpoutu ha-a nou thaita louzü, puhvei kaalo hai nahnaotu maitao nou thaoloulai.

⁹Hakinou puh hai nahnaotu mai-a halouzü, puhvei thaihou jürai mainou puhvei kaalo sü thaolai.

¹⁰Hakinou puh hai thaihou jürai mai lia halouzü, puhvei kaalo hai puh puo vei thaihou jürai maitao nou thaolai.

¹¹Hakinou puh puo thaihou jürai mai-a hare toulouzü, puhvei kaalo nasü puhye nghikayu kityarai mai ali nou thaolai. Hai hai MAPAO nou Moses hi kharochi peikhai touyu thaifüa Israel mainou teisa nou chikha ali soua talai.”

¹²MAPAO nou Moses hi paoe, “Abarim vei Deichitaoh hisü taopaloua Enou Israel maiye peilaiyu teidei sü zhukhaio.

¹³Nenou teidei süna ngaolouyu thai, nevei jüraio Aaron büa ne-a thaita bailai,

¹⁴daiolouzü ne hai nou avei kharochi hai Zin vei radeiki hinou pfüthowure. Israel maisou nou Meribah hinou Eye khaitya-a raoyu phaki, nenou avei sheeyu khouko nasü puletao vei nghoujü hinou soungaopei more.” (Meribah touyu hai Kadesh hinou dzüla payu nasü paowe, ae süsü Zin vei radeiki hinou bue.)

¹⁵Moses nou MAPAO hi haibüa veachi paoe,

¹⁶“Mai hrülai pei hinou buyu Ramai MAPAO, maikhe maiye süthaisa-a tapeilou süyu mai ali dolo tea Enou veachi paowe,

¹⁷sübüa nevei maitaoye panou kaozü hinou süthaisa-a talo, sükulouzü nevei maitao hai zhaokhowo hayu zhaotu ali bülai moe.”

¹⁸MAPAO nou Moses hi paoe, “Soulou süyu Nun nahpoutu Joshua sü saloua puh pei hi ne bah khaipeio.

¹⁹Puhye panou napao Eleazar ae Israel maisou nghoujü nou lalo, ae puletao vei nghoujü nou puhye sü ne thai hai süthai-apeio nasü soulaire tea paosüpa peio.

²⁰Israel maitaoye panou puh chi züloure donou puh hi nevei khouko sü daotu peio

²¹Puhnou napao Eleazar ye koa vah soulai, ae Eleazar nou Urim ae Thummim poloua nou avei leli nasü zhulai. Haibüa nou Eleazar nou Joshua ye sü kabüa Israel maiye khasa-a hülai touyu hai paodou peilai.”

²²MAPAO nou kharochi peiyu büa Moses nou souloue. Puhnou Joshua sü panou napao Eleazar ae Israel maisou nghoujü hinou pa laloure.

²³MAPAO nou kharochi peikhai touyu bütoua Moses nou Joshua pei hisü puh bah khailoua puhye nou puh thaosü thaolai tea paosüpa peie.