Read Poumei Naga MAIPEI PHOUYU 28 Bible Online

MAIPEI PHOUYU 28 - Poumei Naga bible

MAIPEI PHOUYU 28

¹MAPAO nou Israel mai hi haibüa paopeio tea Moses hi kharochi peie, “Paokhai touyu teiletao hisü kaozü soua Eye thoudzü vei posheela khesü pove peio, süsü Enou jüpa-e.”

³MAPAO hi thoudzü vei posheela haitao hai pove sheela peilai: chaa lia ha-a nou po ali payu zhaotsü ahai hai teithechü nou meidei-a posheela peilai.

⁴Zhaotsü ali nou shona noulai, ae ali nanou koukhe nou posheela peilai,

⁵ae posheela sünaye koa nou thoudzü vei posheela soua sou sühcho ali hai oliv theadzü veikayu tyanou sühchovou ali hai thouhrüloua posheela peilai.

⁶Haisü teisa nou meidei-a posheela peiyu sü soulai, haibüyu hai Sinai Deichi hinou arai nasoua thoudzü vei posheela peie. Haibüa posheela peiyu kai hai MAPAO nou ngivei-e.

⁷Zhaotsü arai naye koa nou darkha zhaoh vei posheela hai sühchovou ali sü posheelabu hi nghoupeio.

⁸Koukhe hi-a shona vei posheela peiyu raibütoua zhaotsü ali nasü darkha zhaoh noupu koa posheela peio. Hai nasü thoudzü vei posheela peiyu-e, süsü MAPAO nou jüpa-e.

⁹Soteithe zhou hai chaa lia ha-a nou po ali payu zhaotsü ahai hai sou sühcho ahai hi oliv theadzü thouhrüloua nou thoudzü vei soua posheela peio, alia darkha zhaoh hai-a posheela peio.

¹⁰Soteithe zhou hai teisa vei soua posheela peiyu pei hinou meidei-a posheela peiyu hai nasü posheela peilai.

¹¹Khoukha ashu ngaorai zhouchü hai MAPAO hi posheela haitao sü pove sheela peilai: chode ahai, zhaotu ali, po ali payu zhaotsü anai, haitao hai chaa hayu tyanou pove peilai.

¹²Thoudzü vei posheela vei soua oliv theadzü noupu sou hai posheela peio. Chode aliva nou sou hai sühcho asü, ae zhaotsü ali hi sou sühcho ahai;

¹³ae zhaotu ali hi sou sühcho alili peio. Meidei-a posheela peiyu hai nasü thoudzü vei asheela-e, haisü MAPAO nou jüpa-e.

¹⁴Chode ali hi darkhazhaoh sühchovou ahai, zhaotsü ali hi darkhazhaoh litar ali-a da, ae zhaotu ali hi darkhazhaoh litar alili hai koa nou posheela peilai. Haisü po hi khouh ngaorai zhousa hai haibüa posheela peilai.

¹⁵Teithechü vei darkhazhaoh ae meidei-a posheela peiyu pei hinou nghitsü ali hai mah vei posheela soua posheela peilai.

¹⁶MAPAO ye tsükhouyu hinou Tachopa Nüh hai khouh arai navei khoukha kiadai zhou nou nütalai.

¹⁷Khoukha kiangou zhou nou poa teithe anai koute hai khonüh nülai, ae süteile hi hai kheih thoumoa souyu raokhao likhei toua bailai.

¹⁸Khonüh nüta raikai zhou hai maisou nou vejüloua ratholai, ae vah lia soulai moe.

¹⁹MAPAO hi thoudzü vei posheela hai meidei-a posheela peio, süolouzü chaa lia hayu chode ahai, zhaotsü ali, ae po ali payu zhaotsü anai hai posheela peio.

²⁰Thoudzü vei posheela hai sou veikayu nou theadzü thouhrüloua posheela peio: chode alili hi sou sühcho asü, zhaotsü ali hi sou sühcho ahai,

²¹ae zhaotu ali hi sou sühcho alili hai sheela peio.

²²Süpei hinou nghitu ali hai mah vei posheela soua maikhe maiye sousheeyu vei naanou hai soupeio.

²³Haitao hai teithechü vei meidei-a posheela peiyu pei hinou posheela peio.

²⁴Haibüa nou teithe anai koute hai MAPAO hi thoudzü vei posheela sü posheela peio, haisü MAPAO nou jüpa-e. Posheela haisü teithechü nou meidei-a posheela peiyu ae darkhazhaoh nghou peiyu pei nou posheela peio.

²⁵Teithe anai zhou sü neletao nou vejüloua ratholai; vah lia soulai moe.

²⁶Chanüh nüyu teithe araizhou, neletao nou MAPAO hi thoudzü ngaolou raikayutao hai pove sheela peiyu phaki, neletao nou tave jüloua ratholai, süzhou hai neletao nou vah lia soulai moe.

²⁷MAPAO panou kai nüveire donou chaa lia taomoyu chode ahai, zhaotsü ali, po ali payu zhaotsü anai hai meidei-a posheela peio.

²⁸Thoudzü vei posheela soua theadzü thouhrü khaitouyu sou noupu chode ali hi sou sühcho asü, zhaotsü nahi sou sühcho ahai,

²⁹ae zhaotu alili hi sou sühcho alili hai poa sheela peilai.

³⁰Süpei hinou nghitsü ali hai mah vei posheela peio, sübüa maikhe maiye sousheeyu vei naanou sü soupeio.

³¹Haitao hai teithechü nou meidei-a posheela peiyu ae thoudzü vei posheela peiyu jünou tyakua darkhazhaoh vei posheela soua posheela peio.