Read Poumei Naga MAIPEI PHOUYU 30 Bible Online

MAIPEI PHOUYU 30 - Poumei Naga bible

MAIPEI PHOUYU 30

¹Moses nou Israel maivei süthai-apei maitao hi tare zhai haitao hai peie.

²Mai talinou MAPAO hi hali donou chaachou soukhai touyu nasü puhnou puhvei chaachou hai pfüphe pfüpholai moe, puh mü hinou paopayu nasü thaifüa souvete peiyu sü soulai.

³Puh puo ki hinou buyu loumainah ali nou MAPAO hi hatarali vanou chaachou soukhai toulouzü,

⁴ae honapai puo nou sünasü chouloua halia paomo louzü, honapai nou soulai tea chaachou soukhai touyu nasü souvete peilai.

⁵Ana honapai vei puo nou sünasü chouloua honapaiye panou souba louzü, honapai nou süsü soumoa bailai, MAPAO nou puhye sü khaipeilai, daiolouzü puhye sü puh puo nou pa souba-a baie.

⁶Loumainah alinou hatarali vanou chaachou soukhaitoua nghita louzü,

⁷ae haisü puh kipuo nou süloua halia paomo louzü, honapai nou soulai tea chaachou soukhai touyu nasü souvete peilai.

⁸Ana puh cha nou sünasü puhye panou soubare toulouzü, honapai nou sünasü soumoa bailai, MAPAO nou puhye sü khaipeia bailai.

⁹Mimeapfü alinou moa reikhaimai alinou chaachou soukhai touyu nasü puhvei chipao thaifüa souve teyu sü soulai.

¹⁰Maipuo phi hinou buyu naotumai alinou hatali donou chaachou soukhai toua bulouzü,

¹¹ae honapai vei cha nou halia paomo louzü honapai nou chaachou soukhai touyu nasü souvete peilai.

¹²Ana honapai cha nou sünasü chouloua honapaiye panou souba louzü, honapai nou soumoa bailai, daiolouzü honapai ye sü puh cha nou pa souba-a baie.

¹³Honapai nou chaachou soukhai touyu hataralia maipuo nou aetou peilaiyuma moa panou soulai moe tea nuyuma puhvei zü hai bue.

¹⁴Ana honapai vei kipuo nou choulouyu teithe hinou haliro paomore toulouzü, honapai nou sünasü souvete peilai. Puhnou chouloua chi lia paomo louzü, süsü puhnou ae-ao touwe touyu vei shee soungao-e.

¹⁵Ana haithai naki honapai nou chaachou soukhai touyu nasü puhnou pa soulai moe tea nulouzü, mah nasü puhnou pfüa bailai.

¹⁶Zhai haitao hai MAPAO nou Moses hi loumainah ali nou moa nghitayu naotumai ali nou chaachou soukhai touyu phaki panou tare donou peie.