Read Poumei Naga MAIPEI PHOUYU 31 Bible Online

MAIPEI PHOUYU 31 - Poumei Naga bible

MAIPEI PHOUYU 31

²“Midian mainou Israel mai hi soupeiyu büa puletao hisü khüngu hai phoulo. Süthaisü ne hai thaita-a bailai.”

³Südonou Moses nou maikhe mai hi paoe, “Midian mai pei hi soureih soure donou soudalo, daiolouzü puletao nou MAPAO pei hi vah ashi soukhai touyu thaifüa tudee peilai.

⁴Israel maivei khü alili hinou soureihmai hai thelili seitalai.”

⁵Südonou Israel mai khü chekhei hinou mai theli theli hai soudaloua soureih soure donou mai 12,000 sü sapaloure.

⁶Moses nou soureih maitaoye süthaisa-a panou tare donou napao Eleazar nahpoutu Phinehas sü seitawure, ae puhye panou sheeyu natao alia shee soungao peire donou shabe sü pa pota-e.

⁷MAPAO nou Moses hi kharochi peiyu thaifüa puletao nou Midian mai pei hisü reih soutare, ae poutumai hrülaiye sü southawure.

⁸Puletao nou Midian maivei veo angou: Evi, Rekem, Zur, Hur, ae Reba hai maitao-a southare. Puletao nou Beor nahpoutu Balaam-a southawure.

⁹Israel mainou Midian naotumai ae nahmai hrülai sü nüloure, alia puletao vei kikhaorü ae kini veishi hai poloure,

¹⁰ae puletao nou nuhdu teitei hai meidei laire.

¹¹Puletao nou polouyu kinitao, nülouyu maitao, ae kikhaorü khesü

¹²Moses, Eleazar ae Jeriko nou Jordan rei alilo vatha buyu Moab maivei deikho hinou fühao soua buyu Israel maitao hisü poa nou ve-e.

¹³Moses, napao Eleazar alia süthai-apei maitao nou puletao vei fühao hinou vakou tapaloua soureih maitaoye sü sühloue.

¹⁴Moses nou soureih hinou dakhai veyu reihmai peikho maitao, mai theli peikhoyu ae mai kaihli peikhoyu maitao hisü raroure.

¹⁵Moses nou puletao hi paoe, “Neletao daisounou naotumai haitaoye southa mowe?

¹⁶Naotumai nou Balaam vei chi züloua Israel maiye Peor hinou süthaimah peie touyu sü sülo. Südonou MAPAO vei maitao hi rahta sü pove peie.

¹⁷Südonou chuo nahpoutu mai hrülai ae poutu maiye sabu sazüyu naotumai hrülai hai southawo,

¹⁸ana neletaoye donou poutumaiye sazükhai toumoyu loumai nahtao hai khailoua bailai.

¹⁹Maiye southayu mai hrülai moyuma thaiphao deiyu mai hrülai hai fühao vei vakou nou teithe anai koute bulai. Teithe asü zhou ae teithe anai zhou hai lah neletaoye naanou hinou sousheelo ae neletao nou hukhamai soua nülouyu naotu maitao-a sousheelo.

²⁰Neletao vei sabanü veishi, ae souhee, nghitumai alia süü nou soukhai touyu natao-a sousheelo.”

²¹Napao Eleazar nou soureih souyu hinou dakhai veyu maitao hisü paoe, “Haitao hai MAPAO nou Moses hi peikhai touyu chikha-e.

²²Mei taolou hoyu na veishi, süolouzü sana, shahu, baosahu, hu, tinhu moyuma mishinghu hai mei hinou thou sousheelai. Ana na kukhetao hai dzü hinou naanou soua sousheelai.

²³

²⁴Teithe anai zhou hai neletao vei sabanü khesü dzüshao loulai; sükulouzü neletao hai naanou hinou shee-a bailai, ae neletao vei fühao hisü talouloua bailai.”

²⁵MAPAO nou Moses hi paoe,

²⁶“Ne ae Eleazar alia Israel mai khü-khü hinou peikhoyu maitao koa nou soureih hinou shaopoa veyu natao, nüpoa veyu hukha maitao ae kikhaorü veishi sü phoulo.

²⁷Sütao hai raibütoua zha ahai soua dade zhilo, zha ali hai soureih soutayu maitao hi peilai, ae zha ali nahai Israel maisouye donou tea zha zhipeilai.

²⁸Soureih soutayu maitao zha hinou MAPAO hi kikha soua peire hai hukhamai kaihngou hinou mai ali hai peilai, sübütoua kikhaorü, rheisüh, zhaotu ae nghitu-a peilai.

²⁹Sütao hai MAPAO hi posheela peiyu soua napao Eleazar hi peio.

³⁰Maisou hi peikhai touyu zha hinou hukhamai, kikhaorü, rheisüh, zhaotu ae nghitu raingou hinou ali hai MAPAO vei Sahpao hi poa vah soure donou Levi maitao hi peio.”

³¹MAPAO nou kharochi peikhai touyu büa Moses ae Eleazar nou soupeie.

³²Soureih soutayu maitao nou shaopoa veyu natao hai puletao vei zha noupu loua zhaotu ae nghitu nou 675,000, kikhaorü nou 72,000, rheisüh nou 61,000, ae loumainah nou 32,000.

³³

³⁴

³⁵

³⁶Soureih soutayu maitao vei zha sü haitao-e: zhaotu ae nghitu nou 337,500, hai hinou MAPAO vei kikha hai 675 sü peie; kikhaorü nou 36,000, hai hinou 72 hai MAPAO hi kikha peie; rheisüh nou 30,500, hai hinou 61 hai MAPAO hi kikha peie; ae loumainah nou 16,000, hai hinou loumainah 32 sü MAPAO hi kikha peie.

³⁷

³⁸

³⁹

⁴⁰

⁴¹MAPAO nou kharochi peiyu thaifüa MAPAO hi posheela peikhai touyutao sü Moses nou napao Eleazar hi peiwure.

⁴²Maisou vei zha hai-a soureih soutayu maitao vei raibütoue: zhaotu ae nghitu nou 337,500, kikhaorü nou 36,000, rheisüh nou 30,500, ae loumainah nou 16,000.

⁴³

⁴⁴

⁴⁵

⁴⁶

⁴⁷Zha haitao hinou Moses nou hukhamai soua nüpoa veyu loumai nahtao ae kikhaorü tao-a raingou hinou ali hai poloua MAPAO hi sheela peie, ae MAPAO nou kharochi peikhai touyu thaifüa MAPAO vei Sahpao hi poa panou vah soure donou Levi maitao hi peiwure.

⁴⁸Süthaisü süthaisa-a soureih soutayu hi peikhoyu maitao nou Moses hi ve

⁴⁹haibüa paoe, “Apaopuwo, ne kilai Etao nou satayu reihmaime hi reihmai ali-a hamoe.

⁵⁰Südonou Etao vei hrümamai khailupa peiyu donou Etao nou ngaolouyu sana vei zhusanatao, baokha, baosa, noubo, ae tou khesü MAPAO hi Etaoye panou vupa peire donou pove peiwe.”

⁵¹Puletao nou zhusanatao pove peiyu hai Moses ae Eleazar nou poloure.

⁵²Peikho maitao nou pove peiyu sanatao hai sühcho kaih-hai phali-e.

⁵³Reihmai kukhetao hai puletao nou polouyu sü lahkuku hi khailoure.

⁵⁴Südonou MAPAO ye panou Israel maiye vupa peire donou Moses ae Eleazar nou sanatao hai Shapao hi pove peiwure.