Read Poumei Naga MAIPEI PHOUYU 32 Bible Online

MAIPEI PHOUYU 32 - Poumei Naga bible

MAIPEI PHOUYU 32

¹Reuben alia Gad maityatao hai kikhaorü taoli bue. Puletao nou Jezer ae Gilead teidei hai kikhaorü kiyu donou buh veishoyu sü ngaolou khaie,

²puletao nou Moses, Eleazar ae süthai-apei maitao hi ve paoe,

³“MAPAO nou Israel maiye soukha peia panou polouyu Ataroth, Dibon, Jezer, Mimrah, Heshbon, Elealeh, Sibmah, Nebo, ae Beon nuhdutao hai kikhaorü kire donou buh veisho-e, ae neletao vei kilai Etao hai kikhaorü taoli bue.

⁵Zhuvea nou teidei haitao hai Etao vei zha panou souloure donou Etao hi peio, ae Etaoye panou Jordan Rei sü tachopa holova bumoa baio.”

⁶Ana Moses nou puletao hi haibüa chila peie, “Neletao vei thaihou jürai soua buyu Israel mai kukhetao nou soureih souta-a buyu phaki, neletao nou buh hai hinou so-a bünüa baivu?

⁷MAPAO nou peikhai touyu teidei nasü neletao daisounou Israel maiye panou Jordan rei tachopa thaoloure sü chathai tayu vah soupeiwe?

⁸Sübütoua nou neletao vei puopaoh maitaoye Enou Kadesh Barnea hinou teidei taho zhutare donou seitayu phaki puletao nou soupeie.

⁹Puletao nou Eshkol Deikho hi koute hai taho teidei sü zhuta-e, ana puletao nou dakhai veyu phaki, MAPAO nou puletaoye peikhai touyu teidei hisü puletao nou maikhe maiye panou talou poloure sü paochathai peie.

¹⁰Süzhou teithe MAPAO nou rarou loua haibüa chaachou soue:

¹¹‘Enou Abraham, Isaak ae Jakob hi peilai tea paokhai touyu teidei hisü Ejipt hinou tapayu po kai jünou layu mai ali-a panou talou ngaolai more, daiolouzü puletao nou Eye sü louche more.’

¹²Hai hisü Keniz puona Jephunneh nahpoutu Kaleb, ae Nun nahpoutu Joshua puhai louzü loumoe, daiolouzü puhai nou puhai vei tsüle veishi nou peia achi züwe.

¹³MAPAO nou Israel mai pei hi rarouloua puh nghoujü nou vah ashi souyu khaphao veishi sü thaita khaimo koute hai panou po raidai sü sühaopoa nou ta-e.

¹⁴Chua neletao vei puopaoh maitao büa MAPAO nou Israel maiye panou raroupure vei vah sü neletao nou soua bure.

¹⁵Chuo Reuben ae Gad maitao nou puh thaifü balouzü, puhnou Israel mai hrülaiye sü panou radeiki hai hinou thaokhaiwua bailai, ae puletaoye soushiyu hai neletao vanou baie tea paolai.”

¹⁶Puletao nou Moses hi ve haibüa paoe, “Etaoye panou buh hai hinou Etao vei kikhaorü khaire buh sü soulo ae Etao vei toudzü maitaoye panou baichao loure vei nuhdu khesü soushulo.

¹⁷Süthaisü Etao thaihou jürai soua buyu Israel mai kukheye koa soureih soutalai, ae puletaoye panou teidei sü poloua füsho loumo koute hai Etao nou rai-a soureih sü soupeilai. Haibüyu teile hi pehao hinou hrüyu maitao hinou Etao vei maipfü ae nahmaitaoye panou baichao loure donou kaopo poa nuh khesü souloua bulo.

¹⁸Israel mai kukhetao nou füdei sü poloua füsho loumo koute hai Etao nou lah Etao vei füdei hai hisü dakhai velai moe.

¹⁹Etao nou Jordan rei talapa polouyu füdei hisü Etao vei zha khalai moe, daiolouzü Etao vei zha hai Jordan rei hailova nou ngaoloure.”

²⁰Moses nou chila peie, “Neletao nou sübülai toulouzü, reih soutare donou MAPAO vei nghoujü nou reihna sü tudalo.

²¹Jordan rei talapa MAPAO nghoujü nou puhye ngaobayu maitaoye hulai loumo koute,

²²ae teidei sü poloumo koute hai neletao nou soureih sü soulai. Süthaisü neletao hai lahvei füdei hisü dakhai ve-a bailai, daiolouzü neletao nou MAPAO hi ae Israel mai hi soupeire vah hai soupeiwure. Süthaisü teidei hai nasü neletao zha soua poloua bailai, haisü MAPAO nou aetou peilai.

²³Ana neletao nou paokhai touyu sü souvete peilou more toulouzü, neletao hai MAPAO nghoujü nou mah souwure, ae neletao vei mah thaifüa veahoyu sü lah neletao nou ngao-a bailai.

²⁴Südonou neletao vei nuhdutao ae kikhaorü khesü buh soushulo, ana neletao nou paokhai touyu nasü souvete peio.”

²⁵Gad ae Reuben maitao nou paoe, “Apaopuwo, nenou kharochi peikhai touyu thaifüa Etao nou soulai.

²⁶Etao vei chapfü ae nahmaitao, alia Etao vei kikhaorü ae zhaotu khesü Gilead nuhdu hai hi khaiwulai.

²⁷Ana MAPAO vei kharochi thaifüa soureih soulou süyu Etao mai hrülai nou Jordan rei tachopa nenou paoyu bütoua soureih sü soutalai.”

²⁸Südonou Moses nou kharochi hainasü Eleazar, Joshua ae Israel mai pei hinou khoyu mai hrülai hisü paoe,

²⁹“Hakinou Gad ae Reuben maitao nou Jordan tachopa MAPAO vei kharochi thaifüa soureih soulouzü, ae puletao vei soukha vanou neletao nou teidei hai khesü reih veiloua poloure toulouzü, puletaoye Gilead teidei hai nasü puletao vei zha soua puletao hi peio.

³⁰Ana puletao nou Jordan tachopa neletaoye koa reih soumo louzü, neletao nou Kanaan teidei hinou neletaoye raibütoua zha sü ngao-a bailai.”

³¹Gad ae Reuben maitao nou chila peie, “Apaopuwo, MAPAO nou kharochi peiyu thaifüa Etao nou soupeilai.

³²Etao nou Kanaan teidei hisü MAPAO vei nghoujü nou soureih hai soutalai, sübüa Jordan rei teinghei palova nou buyu teidei haisü Etao vei zha soua khailoulai.”

³³Südonou Moses nou Gad, Reuben ae Manasseh khü dali hisü Amor maivei veo Sihon vei teideitao ae Bashan hi veo Og vei vedeitao alia süpehao hinou buyu teideitao hai peiwure.

³⁴Gad maitao nou Dibon, Ataroth, Aroer,

³⁵Atroth Shophan, Jazer, Jogbehah,

³⁶Beth Nimrah, ae Beth Haran nuhdutao hai soushu dakhai loure.

³⁷Reuben maitao nou Heshbon, Elealeh, Kiriathaim,

³⁸Nebo, Baal Meon (haina vei zhih hai sadare), ae Sibmah nuhdu haitao hai soushu dakhai loure. Puletao nou soushu dakhai louyu nuhdu haitao hai puletao nou zhih ashu nou sapeiwure.

³⁹Manasseh nahpoutu Makhir vei khü nou Gilead maivei teidei sü reih hulou poloure ae buh sühinou hrüyu Amor maiye sü hulaiwure.

⁴⁰Südonou Moses nou Gilead teidei hai Makhir khü hi peiwure, ae puletao nou sühinou hrüe.

⁴¹Manasseh khü hinou buyu Jair maitao nou nuh teidei taoli soureih soua poloure, ae nuh teidei sütao hai “Jair vei Nuhdutao” tea zhih sadaloure.

⁴²Nobah touyu maitao nou Kenath ae süpehao hi buyu nuhtao hi soureih soulou poloure, ae buh sütao hai Nobah tea puh vei zhih hinou saloure.