Read Poumei Naga MAIPEI PHOUYU 33 Bible Online

MAIPEI PHOUYU 33 - Poumei Naga bible

MAIPEI PHOUYU 33

¹Israel mainou Ejipt hinou meme soupoa Moses ae Aaron nou süthaisa-a tapayu phaki puletao nou shoshonou fühao soua buyu sü haitao-e.

²MAPAO nou kharochi peiyu thaifüa puletao nou tave fühao soua buyu teitei sü Moses nou rükhai toue.

³Israel mainou Ejipt teidei thaowua khouh arai navei khoukha kiangou zhou, Tachopa Nüh nülouyu thainesho hai ta-e. MAPAO vei vupeiyu hinou puletao nou Rameses nuhdu nasü Ejipt maisou ngheingao hinou khuveisho-a nou tare.

⁴Süteile hi MAPAO nou Ejipt maiye nah naraio mai hrülaiye southa khaitouyu khesü puletao nou daovuh-a nou bue. Haibüa soupeiyu hai Ejipt maivei ramaitao jünou MAPAO nou khoupu hie touyu sü soungao peie.

⁵Israel maitao nou Rameses sü thaokhaiwua Sukkoth hinou ve fühao soua bue.

⁶Süthai hai puletao nou radeiki kainghou hi buyu Etham touyu buh hinou fühao soua chao-e.

⁷Puletao nou Etham hinou tapoa nou Baal Zephon vei teinghei palova buyu Pi Hahiroth hilo dakhaikou Migdol nghia buyu buh hinou fühao soua bue.

⁸Puletao nou Pi Hahiroth hinou tapoa Zai Ho tachopa Shur radeiki hisü kou-e; ae puletao nou Ethan vei radeiki hinou teithe asü tapoa kou Marah hinou fühao soua bue.

⁹Puletao nou Marah hinou tapoa dzünghou kiahai buyu ae habe rainai buyu Elim hi ve fühao soua bue.

¹⁰Puletao nou Elim hinou tapoa nou ve Zai Ho vei pehao hinou fühao soua bue.

¹¹Sühinou puletao nou tapoa ve Sin radeiki hinou fühao soua bue.

¹²Süthaisü puletao nou Dophkah,

¹³süthai hai Alush hinou fühao soua bue.

¹⁴Süthaisü puletao nou Alush hinou tapoa maikhe mainou dzü ngaokelou hoyu Rephidim hinou ve fühao soua bue.

¹⁵Puletao nou Rephidim hinou tapoa Hor Deichi hi veyu hisü buh haitao hinou fühao soua nou bue: Sinai Radeiki, Kibroth Hattaavah (moa Tounü Sonü vei Khüh), Hazeroth, Rithmah, Rimmon Perez, Libnah, Rissah, Kehelathah, Shepher Deichi, Haradah, Makheloth, Tahath, Terah, Mithkah, Hashmonah, Moseroth, Bene Jaakan, Hor Haggidgad, Jotbathah, Abronah, Eziongeber, Zin vei Radeiki (süsü Kadesh hie), ae Edom maivei dei kainghou hinou buyu Hor Deichi.

³⁸MAPAO nou kharochi peiyu thaifüa napao Aaron hai Hor Deichi vasü taopa tare. Puh hai po 123 payu phaki, Israel mainou Ejipt teidei thaowua tapayu po raidai kou khouh angou vei khoukha arai zhou puh sü thaitare.

⁴⁰Kanaan maivei teidei khelo nou buyu Arad hi veo nou Israel mai hai laire touyu ko sü chouloure.

⁴¹Hor Deichi hinou Moab maivei deikho hi velou louyu koute hi Israel mainou buh haitao hinou fühao soua bue: Zalmonah, Punon, Oboth, Moab teidei hinou soushi khaitouyu Abarim, Dibon Gad, Almon Diblathaim, Nebo nghia buyu Abarim Deichitao, ae Beth Jeshimoth alia Akasia Deikho ahai kohinou fühao soua bue.

⁵⁰Jeriko nghia buyu Moab maivei deikho Jordan reipe hinou MAPAO nou Moses hi kharochi haitao hai Israel mai hi paopeio tea paoe, “Neletao nou Jordan tachopa Kanaan maivei teidei hi loulouyu phaki,

⁵²teidei sühi hrüyu mai hrülai hai hulaikhai touwo. Chuh nou ae hu nou soukhai touyu bashara veishi ae puletao nou rathoyu buh teitei hai souha laikhai tou-o.

⁵³Teidei sü neletao nou poloua füsholo, daiolouzü Enou teidei sü neletao hi peiwure.

⁵⁴Dei sü rako pozhuloua nou khü khü nou dade zhilo, ae mai pouyu ae chiyu thaifüa füdeitao hai zha zhilo.

⁵⁵Ana neletao nou teidei sühinou hrüyu maitaoye hulai loumo louzü, shokhaitoua buyu maitao nou neletao hisü ngheithou hi nghou louyu büa ae tha hi shuh nou khükhai touyu büa neletaoye sü souchoro peilai.

⁵⁶Hakinou neletao nou puletaoye hulai loumo louzü, Enou puletaoye souhare donou tsüchoda khaitouyu nasü neletaoye nou souha-a bailai.”