Read Poumei Naga MAIPEI PHOUYU 34 Bible Online

MAIPEI PHOUYU 34 - Poumei Naga bible

MAIPEI PHOUYU 34

¹MAPAO nou kharochi hai nasü Israel mai hi paopeio tea Moses hi paoe, “Neletao nou Kanaan teidei, Enou neletao hi peilaiyu teidei hi loulouyu phaki, neletao vei deirai khesü haikulai.

³Khelova vei deirai hai Zin radeiki hinou Edom maivei dei sasü koulai. Haisü teinghei palova Athai Zai vei kai hinou poa talai.

⁴Süthaisü neletao vei deirai hai khelova shoukouloua Akrabbim hinou Zin talakou Kadesh Barnea hi koutelai. Süthaisü reilova teinghei loulo khe Hazaraddar kheloua Azmon hi koulai,

⁵sühinou dakhai poa Ejipt maivei deirai deikho hi kouloua Mediterranean Zai kainghou hi koutelai.

⁶“Teinghei loulova deirai hai Meditarranean Zai hi noulai.

⁷“Reilova deirai nou Meditarranean Zai hinou Hor Deichi hi koute,

⁸ae Hor Deichi hinou Hamath vei Ludu ae sühinou Zedad hi koute,

⁹ae sühinou Ziphran, alia Hazar Enan vei akhai hi koutelai.

¹⁰“Teinghei palova vei deirai hai Hazar Enan hinou poa Shepham koutelai,

¹¹süthaisü Shepham hinou khelo kou Harbel, Ain vei teinghei palova, ae Galilee vei Zai teinghei palova buyu deichitao hi koulai,

¹²süthaisü Jordan Rei vei khelova nou Athai Zai hi koutelai. “Haitao hai neletao vei deirai soulai.”

¹³Moses nou Israel mai hi paoe, “Teidei haitao sü MAPAO nou khü akü-a datao hi peire teidei-e, ae teidei hai rako pozhuloua zha zhilo.

¹⁴Reuben ae Gad maitao alia Manasseh vei khü dali hai Jeriko vei palova buyu Jordan rei vei teinghei palova nou puletao vei teidei hai ngaoloure.”

¹⁶MAPAO nou Moses hi paoe,

¹⁷“Napao Eleazar ae Nun nahpoutu Joshua nou maikhe maiye teidei hai dadezhi peilai.

¹⁸Süpei hinou khü chekhei hinou süthai-apei mai chekhei hai panou puhye soukha peire donou dothoulo.”

¹⁹MAPAO nou mai haitao hai dopaloue: [Tyahrü] — [Süthai-apeio] Judah — Jephunneh nahpoutu Kaleb Simeon — Ammihud nahpoutu Shelumiel Benjamin — Khislon nahpoutu Elidad Dan — Jogli nahpoutu Bukki Manasseh — Ephod nahpoutu Hanniel Ephraim — Shiphtan nahpoutu Kemuel Zebulun — Parnakh nahpoutu Elizaphan Issakar — Azzan nahpoutu Paltiel Asher — Shelomi nahpoutu Ahihud Naphtali — Ammihud nahpoutu Pedahel

²⁹Mai haitao hai MAPAO nou Israel maitaoye Kanaan teidei sü panou zha dadezhi peire donou dopa louyu maitao-e.