Read Poumei Naga MAIPEI PHOUYU 35 Bible Online

MAIPEI PHOUYU 35 - Poumei Naga bible

MAIPEI PHOUYU 35

¹Jeriko palova buyu Jordan rei hinou alilo vatha buyu Moab maivei deikho hinou MAPAO nou Moses hi paoe,

²“Israel mai hi paopeio, süolouzü puletao nou ngaolouyu füteidei hinou Levi maiye panou hrüre donou nuhdu daotu ae süpehao hinou buyu heiphao noupu loua nou peio.

³Nuhdu sütao hai Levi maivei soulai, ae nuhdu sütao hinou puletao nou hrülai. Heiphaotao hai puletao vei kikhaorüye panou bulai.

⁴Kikhaorü panou bure donou nuhdu vei kaopo pohaokhai touyu hinou mitar 450 hai dua nou kainghou veishi hinou peilai.

⁵Sübüa nuhdu nasü panou toutsü hi bua pehao veishi hisü mitar 900 hai bulai.

⁶Neletao nou Levi maiye tutsüa bailoure vei nuhdu arou hai peilai, sübüa maiye sümoa soumah nou southayu maiye panou tuve nuhdu sütao hinou baichao loulai. Süpei hinou puletaoye nuhdu raidaihai,

⁷ae heiphao noupu loua nou peio, sübüa nuhdu raidaicha hai puletao vei soulai.

⁸Levi maitaoye peire nuhdutao hai Israel maivei khü dutai thaifüa nou zhuloua zhipeilai.”

⁹MAPAO nou Moses hi paoe,

¹⁰“Israel maitao hi paopeio, süolouzü neletao nou Jordan rei tachopa loua Kanaan teidei hi loulouyu phaki,

¹¹tutsü loure vei nuhdutao hai soumah-a maiye southayu maitaoye panou tuve bailoure donou dopa khailo

¹²Thaiyu mai navei kityarai maitaoye panou khüngu phoulou more donou nuhdu sütao hinou tuve tutsü loulai. Maiye southayu mai taralia maisou nghoujü hinou popa chikulou mojü hai panou southalai moe.

¹³Nuhdu arou sü dopalo,

¹⁴nuhdu asü hai Jordan vei teinghei palova noulai, ae nuhdu asü hai Kanaan teidei hinoulai.

¹⁵Maiye soumah louyu hinou southayu mai, süsü Israel mai-a moyuma vakou mainou Israel maiye koa hrüzho-a buyu mai-a nuhdu sütao hinou tuve tutsüa bailoulai.

¹⁶“Hakinou mai alinou hu moa chuh moa süü nou poa maiye southa louzü, puhnou maiye southayu mah sü puh hi bure, südonou puhye sü southa bailai.

¹⁹Thaiyu mai navei nghikayu kityarai mai nanou maiye southayu mainaye ngaolouyu phaki, puhnou puhye sü southawulai.

²⁰“Mai alinou mai aliye ngaoraiyu hinou khaoduho southa louzü, moa halinou poa datha louzü,

²¹moyuma bahzü züloua khoutha louzü, puh hai maiye southayu mah sü bure, südonou puh-a southawulai. Khüngu phouyu mainou puhye ngaolouzü puhye sü southawulai.

²²“Ana ngaoraiyu hinou moa soumah louyu hinou mai alinou mai aliye southa louzü,

²³moyuma ngaobayu hinou moa ngaomoyu hinou mai alinou mai aliye chuh nou laikou deitha louzü,

²⁴maisou nou chikuyu hai khüngu phoure kityarai maitao phaobo peilai moe, maiye soumah loua nou southa khaitouyu mai navei phaobo pei-a chiku peilai.

²⁵Maisou nou soumah khaitouyu mai naye sü khüngu phoure maitao bah hinou vupa peilai, ae puletao nou puhye sü panou tutsüa buloure vei nuhdu ali hi tuho tutsü loulai. Puhnou nuhdu sühinou Napao Peichana thaimo koute hai bulai.

²⁶Ana maiye southayu mai nanou hakinou puhnou tuve tutsüa buyu nuhdu hinou vakou tapa louzü,

²⁷ae hakinou thaiyu mai navei kityarai mainou puhye ngaoloua southa louzü, haisü khüngu phoulouyu baie, maiye southayu vei mah sü puh hi ha-e.

²⁸Maiye southayu mai nanou tutsüa buloure vei nuhdu hinou Napao Peichana thaimo koute hai sühinou tutsüa bulai, ana süthai nou puh hai lah vei ki hi dakhai velai.

²⁹Zhai hai nasü neletao nou buh tarali hinou buyuma vere khaphao veishi hinou talai.

³⁰“Mai alinou mai aliye southawure touyu chila peimai ahai moa süjünou la-a bulouzü puhye sü southalai; ana mai taralia shakimai alikhei bailouzü puhye sü southalai moe.

³¹Maiye southayu mai nanou zho alao soumoa zhopeiyuma süsü polai moe, ana puhye sü southalai.

³²Maiye southa khaitouyu mai nanou tutsüa buyu nuhdu hinou lah ki hi dakhai vere donou Napao Peichana thaimo jünou zho hai zhopeiyuma süsü neletao nou polou shi-e.

³³Neletao nou haibüa soure touyu thaio, neletao nou hrüa buyu teidei nasü souzhaiwure. Maiye southa dathayu sünou teidei sü souzhaiwure, ae teidei hai naanou soua soushee loure vei ludu kukhe halia ha-e, maiye southayu mainaye sü southayu likhei baie.

³⁴Neletao nou hrüa buyu teidei nasü souzhaiwuso, daiolouzü E hai neletao vei MAPAO-e, ae Enou Israel maiye koa nou hrüa bue.”