Read Poumei Naga MAIPEI PHOUYU 4 Bible Online

MAIPEI PHOUYU 4 - Poumei Naga bible

MAIPEI PHOUYU 4

¹MAPAO nou Moses hi Levi mai khü hinou buyu Kohath maitao hai kihikhamai alili nou ae pfümounah alili nou maipei hai phoulo,

³ae poutumai po shirou hinou poa po raingou kohinou buyu, MAPAO nou buyu Sahpao hi vah soulou süyu mai hrülai zhih sü rülo tea paopeie.

⁴Puletao nou sheelayu vah hai nasü panou soulai.

⁵MAPAO nou Moses hi haibüa soulo tea paodou peie. Puletao nou fühao hai kua nou shota laire toulouzü, Aaron ae puh nahpoutu maitao nou Sahpao hisü talouloua nou Vo Sübvü hinou buyu haosah khesü paloua Vo Sübvü nasü züloulai.

⁶Puletao nou souhee nou veishoa soukhai touyu souhee sah nou süpei hinou züloulai, teidaiyu sah ali nou süpei hisü holoulai, ae poa tare süüpo nasü thaithou loulai.

⁷MAPAO hi posheela peiyu raokhao khaire taibel nasü teidaiyu sah ali nou khupeilai, ae süphao vasü khao, poukai nüvei deiyu bvü, posheelare khaoshao, darkhadzü nghouyu pai tea nou khaipeilai. Süphao hisü raokhao hai khaipei koutelai.

⁸Puletao nou homarayu sah ali nou sütao pei hisü hopeilai, süphao hi veishoyu souheesah ali nou züpeilai, süthaisü kaopoa tare süüpo hai thaithou peilai.

⁹Puletao nou teidaiyu sah ali poloua meivabvü khaibu, meivabvütao, mei sounghiyu na, ae oliv theadzü thouyu bvü teitei hai züloulai.

¹⁰Puletao nou na sütao veishi hai veishoyu souheesah nou züloua sünasü kaopoa tare süüpo hisü khikhai loulai.

¹¹Süthaisü sana nou soukhai touyu posheelabu nasü puletao nou sah teidaiyu ali nou züloulai ae süpei hinou veishoyu souheesah ali nou züloua kaopoa tare süüpo sü thaithou loulai.

¹²Puletao nou Sheeyu Buh hi poa vah souyu paikhao teitei hai sah teidaiyu ali nou joloulai ae veishoyu souheesah nou süpei hinou züloua poa tare süü vasü khikhai loulai.

¹³Puletao nou posheelabu phao hi vounai buyu taosü polai peilai ae süphao hi vahvayu sah ali nou hopeilai.

¹⁴Puletao nou süphao hisü posheelabu hinou poa vah souyu na veishi: karalee, leecha, leebea ae raikhaotao hai khaipeilai. Süthaisü souheesah ali nou süpei jüloua poa tare donou süüpo hai thaithou peilai.

¹⁵Fühao hai hrapoa buh datayu phaki, Aaron ae puhvei nahpoutu maitao nou sheeyu natao hai zhua sah nou hocheyu thai, Kohath vei khü nou sheeyu natao hai kaopoa nou talai, ana puletao nou sheeyu natao deilai moe, daiolouzü puletao nou süsü deilouzü puletao hai thai bailai. Puletao nou fühao ashu shotayu chüsü Kohath vei khü nou vah haitao hai soulai.

¹⁶Napao Aaron nahpoutu Eleazar nou Sahpao hi buyu na veishi alia meivabvü, meivabvü hi thou taore theadzü, poukai nüvei, thoudzü posheelare, nare theadzü, ae Sahpao hi buyu na teitei hai zhulai.

¹⁷MAPAO nou Moses ae Aaron hi paoe,

¹⁸“Kohath maitaoye panou sheesheelai natao nghiki taloua panou thai more donou Aaron ae puh nahpoutu maitao nou talouloua puletaoye lahkuku nou pore natao hai zhipeilai.

²⁰Ana Kohath maitao nou Sahpao hi talou napao maitao nou poa tare sheeyu natao hai tu-a buyu sü ngaoloure toulouzü puletao hai thai bailai.”

²¹MAPAO nou Moses hi Levi khü hinou buyu Gershon pounah maitao hai kihikha mai alili zhih nou rülo tea kharochi peie.

²³Po shirou hinou poa po raingou kohinou buyu, Sahpao hinou vah soulou süyu poutumai hrülai zhih hai rüthoulo.

²⁴Puletaoye panou na haitao hai poa talai:

²⁵Rathoyu Sahpao, kikha ae kijü hokhai touyu haosahtao, sahpao pei hi hokhai touyu souhee sahtao, sahpao hi taloure hi haosah,

²⁶kikhu hi haosahtao ae sahpao pehao alia posheelabu vei pehao teitei hi haosahtao, raitao, Sahpao poa soure natao teitei hai puletao nou poa talai; ae sütao hi molouzü shiyu teitei-a puletao nou zhuloua soulai.

²⁷Aaron alia puh nahpoutu maitao nou Gershon maitao hi vah peikhai touyu khesü puletao nou soukhai louho-a souchelou moyu sü Moses ae Aaron nou zhulai.

²⁸Gershon maitao nou Sahpao donou vah soure sü haitao-e; puletao hai Napao Aaron nahpoutu Ithamar nou süthaisa-a soulai.

²⁹MAPAO nou Moses hi Levi khü hinou buyu Merari maitao hai pfümounah alili nou ae kihikha mai alili nou maipei phoulo tea paopeie,

³⁰ae MAPAO nou buyu Sahpao hi vah soulou süyu poutumai, po shirou payu hinou poa po raingou khete hai maipei kizho buyu sü zhih rülo tea paopeie.

³¹Puletao nou Sahpao vei süütao, hutao, dekatao, ae beikheitao hai poa talai,

³²alia Sahpao pehao hinou buyu maisou nou vejüa buyu navei dekatao, beikheitao, hushutao, ae raitao alia sütao poa soure na veishi hai potalai. Mai hrülai nou linaonao nou polou süyu na chekhi hai poa talai.

³³Merari maitao nou Sahpao donou soure vahtao sü haitao-e; puletao nou napao Aaron nahpoutu Ithamar nou paoyu thaifüa soulai.

³⁴MAPAO nou kharochi peikhai touyu thaifüa Moses, Aaron ae peikhoyu maitao nou Levi maivei khü asü: Kohath, Gershon ae Marari maitao zhih rüyu sü kihikha alili nou ae pfümounah alili nou po shirou nou poa po raingou payu khete, Sahpao hinou vah soulou süyu mai hrülai maipei phouyu sü haitao-e: [Khü] — [Maipei] Kohath — 2,750 Gershon — 2,630 Merari — 3,200 Mai Veishi: — 8,580

⁴⁹MAPAO nou Moses hi kharochi peiyu thaifüa mai alili nou phouloue, ae MAPAO nou Moses hi kharochi peiyu thaifüa puletao mai alili nou vah soure moa na poa tare sü zhipeiwure.